ភ្នំពេញ៖ សម្ដេច ហ៊ុន សែន នាយករដ្ឋមន្ដ្រីកម្ពុជា ប្រកាសថា សម្ដេចនឹងដោះលែងមន្ដ្រីអតីតគណបក្សសង្គ្រោះជាតិ ចំនួន ១២នាក់ នៅថ្ងៃបុណ្យភ្ជុំបិណ្ឌឆ្នាំនេះតែសម្ដេចព្រមានចំពោះអ្នកណាដែលលើកឡើងថា ការដោះលែងនេះ ជាគំនាបរបស់បរទេស។ តែអ្នកវិភាគថា គឺជាសញ្ញានៃការផ្សះផ្សាជាតិ។
លោក រឿន ឬទិ្ធ ជូនសេចក្ដីរាយការណ៍ !
ការលើកឡើងរបស់សម្ដេចហ៊ុន សែន ដូចនេះ នៅក្នុងពិធីចុះជួបសំណេះសំណាល ជាមួយកម្មករ កម្មការិនី នៅភូមិព្រែកត្រែង២ ឃុំសំរោងធំ ស្រុកកៀនស្វាយ ខេត្តកណ្តាល នៅថ្ងៃទី២៣ ខែសីហា ឆ្នាំ២០១៨ នេះ។
នៅក្នុងពិធីនេះ សម្ដេច បានបញ្ជាក់ថា សម្ដេចចង់មានការលើកលែងទោសទ្រង់ទ្រាយធំដល់អតីតមន្ដ្រីរបស់បក្សប្រឆាំងទាំង ១២នាក់ ។តែសម្ដេចព្រមានថា ដូចថា៖«សូមកុំនិយាយថា បណ្ដាលមកពីការគៀបសង្កត់អន្ដរជាតិ ខ្ញុំស្អប់ណាស់ពាក្យនេះ។ ចឹងសុំបងប្អូន អ្នកដែលនៅក្នុងពន្ធនាគារដែលខ្ញុំគ្រោងលើក ១២ផ្សេងទៀត។ ចាំណា ប្រសិនបើខ្ញុំចង់អោយពួកអ្នកធ្វើការសុំទោស អ្នកបានធ្វើលិខិតរួចហើយ ក៏ប៉ុន្ដែបើសិនជាអ្នកណាមួយធ្វើការអធិត្ថាប្បាយពីការគៀបសង្កត់ពីអន្ដរជាតិ ខ្ញុំទុកសិន ទុករហូតដល់អ្នកធ្វើលិខិតសុំលើកលែងទោសថ្កោលទោសចំពោះអ្នកដែលនិយាយ ទើបខ្ញុំព្រម»។
សម្ដេច ហ៊ុន សែន បញ្ជាក់ថា គម្រោងដោះលែងមន្ដ្រីអតីតគណបក្សសង្គ្រោះជាតិទាំង១២នាក់ ធ្វើឡើងដោយសារតែអ្នកទាំងនោះបានធ្វើការសុំទោសដល់រូបលោក។
ជុំវិញគម្រោងដោះលែងមន្ដ្រីអតីតគណបក្សសង្គ្រោះជាតិទាំង១២រូបនេះដែរ លោក គឹមសុខ រ៉ា អ្នកវិភាគនយោបាយនិងសង្គមយល់ឃើញថា រាជរដ្ឋាភិបាលចាប់ផ្ដើមបើកចិត្តទូលាយជាអ្វីដែលកន្លងមក ហើយការណ៍នេះ នឹងជួយអោយប្រសើរឡើងដល់ស្ថានភាពនយោបាយនៅកម្ពុជា។
លោកថា ស្ថានភាពបច្ចុប្បន្ននេះ អ្នកនយោបាយខ្មែរ គួរជម្រះចោលនូវការចាត់ទុកខ្មែរ ឈាមជ័រតែមួយ ជាសត្រូវនឹងគ្នា។
លោក គឹម សុខ៖«យើងគួរឈប់និយាយថា គំនាបអ្នកនោះ គំនាបអ្នកនេះ។ យើងគួរនិយាយថាមកដល់ពេលនេះ យើងចេះសម្របសម្រួលគ្នាបានខ្លះ។ យើងចេះនិយាយត្រូវគ្នាខ្លះហើយ។យើងចេះស្ដាប់គ្នាខ្លះហើយ ។ចេះស្ដាប់គ្នា ក្នុងនាមអ្នកដឹកនាំនយោបាយនិងចេះស្ដាប់គ្នាក្នុងរង្វល់សំឡេង អ្នកដែលមានកំណើតក្នុងប្រជាជាតិតែមួយហើយក៏ចេះស្ដាប់គ្នាធ្វើការជាមួយគ្នាក្នុងលក្ខខណ្ឌនៃទំនាក់ទំនងអន្តរជាតិ ជាមួយសហគមន៍អន្តរជាតិ។ដូច្នេះអ្វីត្រូវការគឺថាអោយដល់គោលដៅមួយ ។គោលដៅដែលមានសេរីភាពរៀងៗខ្លួនហើយគោលដៅហ្នឹង គឺគោលសេរីភាពដែលយើងបានអនុវត្តសិទ្ធពេញលេញទាំងគ្រប់ភាគី»។
សម្រាប់លោក សុខ ឥសាន្ដ អ្នកពាក្យបក្សកាន់អំណាចបញ្ជាក់ថា ការលើកឡើងរបស់សម្ដេចខាងលើគឺជាជំហររបស់សម្ដេចដែលឆ្ពោះទៅរកការបង្រួបបង្រួមជាតិ និងការផ្សះផ្សាជាតិ ។លោក សុខ ឥសាន្ដ៖ «គណបក្សប្រជាជនតែងតែមានយោបាយនឹងហើយ ហើយបើមិនមានការបង្រួបបង្រួមជាតិ យើងមិនអាចរកកិច្ចព្រមព្រៀងទីក្រុងប៉ារីសឃើញបានទេ។ ទីពីរ. បើសិនជាគ្មានការបង្រួបបង្រួមជាតិក៏អត់មាននយោបាយឈ្នះឈ្នះដើម្បីនាំមកសន្ដិភាពពេញលេញដែរ ហើយបើមិនមានការបង្រួបបង្រួមជាតិក៏មិនបានចុះហត្ថលេខាពីរបីដងជាមួយគណបក្សប្រឆាំងដែរ…»។
គួរបញ្ជាក់ផងដែរថា ថ្មីនេះមានការដោះលែងអ្នកវិភាគបញ្ហាសង្គមដ៏ល្បីលោក គឹម សុខ ដោយមិនប៉ុន្មានថ្ងៃផងក៏មានការដោះលែងសកម្មដីធ្លី អ្នកស្រី ទេព វន្នី ហើយក្រោយមួយថ្ងៃនៃការដោះលែងអ្នកស្រីទេព វន្នី គឺ លោក អ៊ួន ឈិន និង លោក យាង សុធារិន្ទ អ្នកសារព័ត៌មានវិទ្យុអាស៊ីសេរីទាំងពីររូបក៏ត្រូវបានដោះលែងអោយនៅក្រៅឃុំផងដែរ។ ការណ៍នេះបានធ្វើអោយអ្នកវិភាគមើលឃើញថា បញ្ហានយោបាយនៅកម្ពុជាដែលជាប់គាំងនៅពេលកន្លងមកនោះ នឹងអាចវិលរកសភាពធម្មវិញក្នុងពេលខាងមុខ ខណៈដែលសម្ដេច ហ៊ុន សែន នាយករដ្ឋមន្ដ្រីកម្ពុជា និងជាប្រធានគណបក្សប្រជាជនកម្ពុជា បើចិត្តទូលាយ៕
