ភ្នំពេញ៖ ឧត្តមក្រុមប្រឹក្សាពិគ្រោះ និងផ្តល់យោបល់ ដែលបង្កើតដោយសម្ដេច ហ៊ុនសែន កាលពីថ្ងៃទី ២១ សីហារួចមក មានស្ថាប័នជាតិ ពិសេសគណបក្សតូចៗ និងមន្ត្រីបរទេសខ្លះគាំទ្រ ខណៈមជ្ឈដ្ឋានមួយចំនួន មិនទទួលស្គាល់ ហើយថា បង្កើតនេះជាភាពល្ងង់ខ្លៅ។
លោក សោម លាភ រាយការណ៍ជូនពីព័ត៌មាននេះ!
ក្រោយពីការបង្កើត «ឧត្តមក្រុមប្រឹក្សាពិគ្រោះ និងផ្តល់យោបល់» ដែលមានគណបក្សនយោបាយមិនទទួលបានអាសន្នៈក្នុងរដ្ឋសភាក្នុងការបោះឆ្នោតសភានីតិកាលទី៦ មានគណបក្សចំនួន១៦បានចូលរួមនោះ គេឃើញមានប្រទេសជិតខាង និងបក្សដែលចូលរួមពេញចិត្តនិងគាំទ្រចំពោះការបង្កើតនេះ។
លោក ម៉ាក ហ្វៀល អនុរដ្ឋមន្ត្រីក្រសួងការបរទេសទទួលបន្ទុកអាស៊ីប៉ាស៊ីហ្វិក របស់ចក្រភពអង់គ្លេស ត្រូវបាន លោក ប្រាក់ សុខុន រដ្ឋមន្ត្រីការបរទេសកម្ពុជា ស្រង់សម្ដីលោកថា បានគាំទ្រការបង្កើត «ឧត្តមក្រុមប្រឹក្សាផ្តល់ និងពិគ្រោះយោបល់» ដែលលោកថា លោកម៉ាក ហ្វៀល យល់ថា ជាស្មារតីផ្សះផ្សារជាតិខ្មែរ។ នេះបើតាមប្រសាសន៍របស់លោក កេត សោផាន់ អ្នកនាំពាក្យក្រសួងការបរទេសកម្ពុជា ប្រាប់អ្នកសារព័ត៌មានក្រោយជំនួបនេះ។ តែសម្រាប់ប្រសាសន៍ផ្ទាល់របស់លោក ម៉ាក ហ្វៀលដែលបានជួបលោកប្រាក់សុខុន បែរជាបានទទូចឱ្យកម្ពជាស្ដារលទិ្ធប្រជាធិបតេយ្យឡើងវិញដោយមានវត្តមានអ្នកតំណាងរាស្ត្របក្សសង្រ្គោះជាតិធ្វើសកម្មនយោបាយឡើងវិញ ដោយគ្មានការភ័យខ្លាច។
បន្ទាប់ចេញពីជំនួបជាមួយសម្ដេចហ៊ុនសែន លោក ម៉ាក ហ្វៀល បានបង្ហោះសារនៅលើបណ្តាញសង្គម Twitter របស់លោកថា លោកបានលើកឡើងនៅចំពោះមុខ សម្ដេច ហ៊ុន សែន ដោយទទូចឱ្យរាជរដ្ឋាភិបាលកម្ពុជាដកការរឹតត្បិតខាងនយោបាយនិងប្រព័ន្ធផ្សព្វផ្សាយផងដែរ។
ចំណែកឯ គណបក្សសញ្ជាតិកម្ពុជាវិញ តាមរយៈលោក លោក សេង សុខខេង បានចេញសេចក្ដីថ្លែងថាការបង្កើត «ឧត្តមក្រុមប្រឹក្សាពិគ្រោះ និងផ្តល់យោបល់» របស់សម្ដេចតេជោ ហ៊ុន សែនថា គឺដើម្បីបុព្វហេតុជាតិ និងមាតុភូមិ មិនមែនដើម្បីបក្ស ឬក្រុមណាមួយនោះទេ។ គណបក្សនេះ ពេញចិត្តយ៉ាងខ្លាំងលើការបង្កើតនេះ ហើយក៏នឹងចូលរួមអំពាវនាវដល់គ្រប់គណបក្សនយោបាយទាំងអស់ឱ្យចូលរួមក្នុងវេទិការនេះ។
ដោយលែកគណបក្សខ្មែរតែមួយ ក៏ចេញសេចក្តីថ្លែងការណ៍យល់ព្រមចំពោះការបង្កើត«ឧត្តមក្រុមប្រឹក្សាពិគ្រោះ និងផ្តល់យោបល់» ដែលបង្កើតឡើងដោយនាយករដ្ឋមន្ត្រីហ៊ុនសែនផងដែរ។
លោក កែម រិទ្ធិសិទ្ធិ បានចេញសេចក្តីថ្លែងការណ៍នៅថ្ងៃទី២២ ខែសីហា ឆ្នាំ២០១៨ថា ខ្លួនយល់ព្រមធ្វើការក្នុង «ឧត្តមក្រុមប្រឹក្សាពិគ្រោះ និងផ្តល់យោបល់» ដើម្បីរួមគ្នាបន្តរក្សាសន្តិភាព នៅក្នុងប្រទេសកម្ពុជា។
សម្រាប់ គណបក្សខ្មែរតែ បញ្ជាក់ថា គណបក្សរបស់ខ្លួនដែលចូលរួមក្នុងវេទិការនេះដើម្បីជំរុញការអនុវត្តការងារដល់មន្ត្រីថា្នក់ជាតិ និងថ្នាក់ក្រោមជាតិ ដោយរួមគ្នាបន្តការពារថែរក្សាមាតុភូមិកម្ពុជា និងការពង្រឹងគោលការណ៍ប្រជាធិបតេយ្យសេរី និងការគោរពសិទិ្ធមនុស្ស។
គណបក្សយុវជនកម្ពុជា ក៏មិនខុសគ្នាពីនេះប៉ុន្មាននោះទេ ដោយបានបបង្ហាញសារសម្ដែងការពេញចិត្ត និងគាំទ្រ ចំពោះការបង្កើត «ឧត្តមក្រុមប្រឹក្សាពិគ្រោះ និងផ្តល់យោបល់»នេះឡើងមក។ ជាក់ស្ដែង លោក ពេជ្រ ស្រស់ ថាការបង្កើតវេទិកានេះ ដោយសម្តេច ហ៊ុន សែន គឺដើម្បីផ្តល់ប្រយោជន៍ជូនជាតិ និងផ្តល់ឱកាសគណបក្សនយោបាយ មិនមានសំឡេងក្នុងរដ្ឋសភា បានចូលរួមកសាង និងអភិវឌ្ឍប្រទេសកម្ពុជា ឲ្យមានការរីកចម្រើនជានិច្ចនិរន្តរ៍។
ជាមួយគ្នានេះដែរ លោក គង់ មុនីកា ប្រធានគណបក្សឆន្ទៈខ្មែរ ក៏សម្ដែងការពេញចិត្តដែរ។ លោក គង់ មុនីការថា ការបង្កើតវេទិកានេះឡើង ដើម្បីឱ្យគណបក្សផ្សេងៗដែលគ្មានអាសន្នៈនៅក្នុងរដ្ឋសភា មានឱកាសចូលរួមបម្រើប្រជាពលរដ្ឋដើម្បីអភិវឌ្ឍប្រទេសជាតិឱ្យកាន់តែរីកចម្រើនថែមទៀត។
ក្នុងជំនួបពិភាក្សា ក្នុងវេទិកា ប្រឹក្សាពិគ្រោះ និងផ្ដល់យោបល់នោះ ដែលមានគណបក្សតូចៗ ចូលរួមចំនួន ១៦ នោះ មានគណបក្ស១៥ បានគាំទ្រគំនិតផ្ដួចផ្ដើមនេះ។ ដោយឡែក គណបក្សសាធារណរដ្ឋមិនទាន់បានឆ្លើយតបភ្លាមៗអំពីការគាំទ្រ ឬមិនគាំទ្រនោះទេ។ លោក លន់ ឫទ្ធិ កូនប្រុសអតីតសេនាប្រមុខ លន់ នល់ បានសុំទៅពិគ្រោះយោបល់ជាមួយសមាជិករបស់បក្សលោកជាមុនសិន។
ទោះជាយ៉ាងណា មានគណបក្សនយោបាយចំនួន៤ ដែលចូលរួមការបោះឆ្នោតជាតិ ប៉ុន្តែធ្វើពហិកាមិនចូលប្រជុំជាមួយលោកហ៊ុន សែន ថ្ងៃទី២១ សីហានោះទេ។ គណបក្សដែលមិនចូលរួមនោះមានដូចជា គណបក្សប្រជាធិបតេយ្យមូលដ្ឋាន គណបក្សសម្ពន្ធដើម្បីប្រជាធិបតេយ្យ គណបក្សខ្មែរឈប់ក្រ និងគណបក្សមាតុភូមិយើង។
តែជាមួយគ្នានេះ អតីតប្រធានគណបក្សប្រឆាំងវិញបានរិះគន់ការបង្កើតកិច្ចពិភាក្សានេះផងដែរ។ លោក សម រង្ស៊ី បានសរសេរក្នុងទំព័រហ្វេសបុករបស់លោកថា ការបង្កើតឧត្តមក្រុមប្រឹក្សាពិគ្រោះ និងផ្ដល់យោបល់នេះឡើង គឺជាការគិតខុសរបស់សម្ដេច ហ៊ុនសែន។
លោក សម រង្ស៊ីសរសេរថា សម្ដេច ហ៊ុន សែន គិតខុស ដែលតែងតាំងមនុស្សមកពីគណបក្សអំពិលអំពែកទាំង ១៩ ឲ្យធ្វើជា “រដ្ឋមន្ត្រីអាយ៉ង” ក្នុង “រដ្ឋាភិបាលថ្មី” របស់លោក ដែលការណ៍នេះ មិនស្របច្បាប់នោះទេ។ លោក បន្ថែមថា ការរៀបចំវេទិកានេះឡើង គឺរិតតែធ្វើឱ្យស្ថានការណ៍នយោបាយនៅកម្ពុជាកាន់តែធ្លាក់ដុនដាបខ្លាំង។
គួររំឭកថា មានតែគណបក្សប្រជាជនកម្ពុជាទេ ដែលទទួលបានជ័យជំនះទាំងស្រុងលើការបោះឆ្នោតសភានីតិកាលទី ៦ ហើយទទួលបានអាសន្នៈទាំង ១២៥លើ១២៥ ក្នុងរដ្ឋសភា។
ប្រមុខនៃរាជរដ្ឋាភិបាលកម្ពុជា សម្ដេច ហ៊ុន សែន បានសម្រេចបង្កើត «ឧត្តមក្រុមប្រឹក្សាពិគ្រោះ និងផ្ដល់យោបល់» នៅចំពោះមុខប្រធានគណបក្សនយោបាយទាំង១៦ នាព្រឹកថ្ងៃទី២១ ខែសីហា ឆ្នាំ២០១៨។
«ឧត្តមក្រុមប្រឹក្សាពិគ្រោះ និងផ្ដល់យោបល់»នេះ គឺជាយន្ដការថ្មីមួយទៀត ក្នុងការបម្រើផលប្រយោជន៍ប្រជាជនទូទៅ ហើយវាមិនមែនផ្ដល់ផលប្រយោជន៍ដល់រាជរដ្ឋាភិបាល ក៏ដូចជាប្រធានគណបក្សនយោបាយទាំងអស់ ដែលចូលរួមកិច្ចពិគ្រោះយោបល់នោះទេ។ សម្រាប់គណបក្សដែលបានចូលរួមក្នុងកិច្ចពិភាក្សានេះ នឹងទទួលបានការតែតាំងដោយព្រះរាជក្រិត្យ ស្នើដោយនាយករដ្ឋមន្ត្រី ដែលមានឋានៈស្មើនឹងទេសរដ្ឋមន្ត្រី និងរដ្ឋមន្ត្រី។ យ៉ាងណាក្ដី ឧត្តមក្រុមប្រឹក្សាពិគ្រោះ និងផ្ដល់យោបល់នេះ នឹងត្រូវបញ្ចប់នៅពេលដែលផុតអាណត្តិរបស់រាជរដ្ឋាភិបាលនីតិកាលទី៦នេះ៕
