ក្រុងភ្នំពេញ៖ ក្រោមព្រះទានលើកលែងទោសពី ព្រះមហាក្សត្រ អ្នកស្រី ទេព វន្នី ត្រូវបានតុលាការដោះលែងឲ្យមានសេរីភាពវិញហើយ នៅយប់ថ្ងៃទី ២០ ខែ សីហា ឆ្នាំ ២០១៨នេះ។ នេះបើយោងតាមព្រះរាជក្រិត្យលេខ នរ/សកត/ ០៨១៨/៨៧៦ នៃព្រះមហាក្សត្រ។
បើយោងទៅតាមព្រះរាជក្រិត្យដែលចុះនៅថ្ងៃទី ២០ ខែ សីហានេះ បានឲ្យដឹងថា ទណ្ឌិត ៤ រូប ត្រូវបានលើកលែងទោសឲ្យមានសេរីភាពឡើងវិញ។ ទណ្ឌិតទាំង ៤ រូបនោះរួមមាន អ្នកស្រី ទេព វន្នី, អ្នកស្រី ហេង មុំ, អ្នកស្រី បូ ឆវី, អ្នកស្រី គង់ ចន្ថា ដែលអ្នកទាំង ៤ ត្រូវបានជាប់ក្នុងពន្ធនាគារព្រៃសរ ករណីជេរប្រមាថរាជការសារធារណៈ និង ប្រឆាំងនឹងរាជការសារធារណៈ ដោយមានស្ថានទម្ងន់ទោស។ ភ្លាមៗបន្ទាប់ពីព្រះរាជក្រិត្យលើកលែងទោស បានបង្ហោះជាសារធារណៈ អយ្យការអមសាលាដំបូងក៏បានចេញ ដីការដោះលែង អ្នកទាំង ៤ អ្នកនោះ។
អ្នកស្រី ទេព វន្នី ត្រូវអាជ្ញាធររាជធានីភ្នំពេញចាប់ខ្លួន កាលពីថ្ងៃទី១៥ ខែសីហា ឆ្នាំ២០១៦ នៅពេលអ្នកស្រីចូលរួមយុទ្ធនាការថ្ងៃចន្ទពណ៌ខ្មៅ ដែលទាមទារឲ្យដោះលែងមន្ត្រីអាដហុក ៤រូប និងមន្ត្រី គ.ជ.ប.មួយរូប ព្រមទាំងជំរុញទៅរដ្ឋាភិបាលឲ្យវែកមុខរកឃាតករពិត នៅពីក្រោយការបាញ់សម្លាប់លោក កែម ឡី។
នៅថ្ងៃទី ២៣ ខែកុម្ភៈ ឆ្នាំ២០១៧ សាលាដំបូងរាជធានីភ្នំពេញ បានសើរើសំណុំរឿងចាស់កាលពីឆ្នាំ២០១៣ មកចោទប្រកាន់អ្នកស្រី ទេព វន្នី ដោយចោទពីបទ «ប្រព្រឹត្តហិង្សាដោយចេតនាមានស្ថានទម្ងន់ទោស» និងផ្តន្ទាទោសដាក់គុក ២ឆ្នាំកន្លះ(៣០ខែ)ពិន័យប្រាក់ ៥លានរៀល និងបង្គាប់ឲ្យបង់ប្រាក់ទៅដើមបណ្តឹងជាសន្តិខណ្ឌដូនពេញ ចំនួន ៩លានរៀល។ គិតមកដល់ពេលនេះ អ្នកស្រីទេពវន្នីបានជាប់ឃុំរយៈពេលជិត ២ឆ្នាំហើយ។
ជីវប្រវត្តិសង្ខេបរបស់អ្នកស្រីទេពវន្នី
សកម្មជនដីធ្លីតំបន់បឹងកក់ អ្នកស្រី ទេព វន្នី ត្រូវបានអ្នកបឹងកក់ជាច្រើនចាត់ទុកថា ជាស្ត្រីឆ្នើម ក្លាហាន និងស្មោះត្រង់ជាមួយប្រជាពលរដ្ឋក្នុងសហគមន៍។ អ្នកស្រីបានរងការចាប់ខ្លួនដាក់ពន្ធនាគារជាច្រើនលើកមកហើយ ។
អ្នកស្រី ទេព វន្នី ចាប់ផ្ដើមចេញតវ៉ាបញ្ហាដីធ្លីនៅតំបន់បឹងកក់ជាង ៧ឆ្នាំហើយ បន្ទាប់ពីសហគមន៍នេះរងការធ្វើទុក្ខបុកម្នេញដោយក្រុមហ៊ុន ស៊ូ កាគូ អភិវឌ្ឍន៍តំបន់បឹងកក់ ផ្ដល់សំណងមិនសមរម្យ និងបណ្ដេញអ្នកភូមិចេញពីលំនៅឋាន យកគ្រឿងចក្រឈូសឆាយកម្ទេចផ្ទះ និងបូមខ្សាច់ពន្លិចផ្ទះពលរដ្ឋជាដើម។ នេះបើ់តាម របាយការណ៍អង្គការសិទិ្ធមនុស្សទាំងអង្គការជាតិ និងអន្តរជាតិ ។
កាលពីពាក់កណ្ដាលឆ្នាំ ២០១២ សាលារាជធានីបានប្ដឹងស្ត្រី ១៣នាក់រួមទាំងអ្នកស្រី ទេព វន្នី ឲ្យជាប់ឃុំអស់ ៣៤ថ្ងៃ ពីបទរំលោភកម្មសិទ្ធិសាធារណៈ និងប្រឆាំងមន្ត្រីរាជការសាធារណៈ។
ការជាប់ពន្ធនាគាររបស់អ្នកស្រី ទេព វន្នី ពេលនេះ គឺជាលើកទី៤ ដោយមិនគិតការតវ៉ាកន្លងមក ដែលអាជ្ញាធរចាប់ឃុំខ្លួននៅស្នងការដ្ឋាននគរបាលរាជធានីភ្នំពេញរាប់ភ្លេចនោះ។
កាលពីខែមិថុនា ឆ្នាំ២០១៣ អ្នកស្រីត្រូវបានអង្គការ វ៉ាយថល វ៉យស៍ (Vital Voices) អញ្ជើញទៅសហរដ្ឋអាមេរិក ទទួលជ័យលាភីពានរង្វាន់ស្ត្រីឆ្នើម ស្ត្រីជាមេដឹកនាំពិភពលោក។ អ្នកស្រី ទេព វន្នី មានកូនពីរនាក់។ ខណៈអ្នកស្រីកំពុងស្ថិតនៅក្នុងការឃុំខ្លួននៅក្នុងពន្ធនាគារ ត្រូវបានរាយការណ៍មកថា ប្ដីរបស់អ្នកស្រីបានសុំបែកគ្នា៕
