ព្រះសីហនុ៖ ជនជាតិចិន ៦នាក់នឹងត្រូវបានដោះលែងវិញ ក្រោមពីសមត្ថកិច្ចធ្វើការអប់រំ និងណែនាំពួកគេឱ្យគោរពទំនៀមទំលាប់ វប្បធម៌ និងសេចក្តីថ្លៃថ្នូររបស់កម្ពុជា បន្ទាប់ពីពួកគេបានដើរចែកខិត្តប័ណ្ណដែលបង្កប់នូវសេវារកស៊ីផ្លូវភេទ។
លោកឧត្ដមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានប្រាប់វិទ្យុស្រ្តីនៅថ្ងៃទី១៤ សីហានេះថា សមត្ថកិច្ចនឹងដោះលែងជនជាតិចិនទាំង ៦នាក់វិញ បន្ទាប់ពីបានសិក្សាផ្លូវច្បាប់ជាមួយព្រះរាជអាជ្ញាដោយរកពុំឃើញធាតុផ្សំនៃច្បាប់សម្រាប់ចោទប្រកាន់ពួកគេ។ តែយ៉ាងណាសកម្មភាព ដើរចែកខិត្តប័ណ្ណផ្សព្វផ្សាយពិសេសកម្មម៉ាស្សាដែលមានបង្កប់នូវសេវារកស៊ីផ្លូវភេទរបស់ជនជាតិចិនទាំងនេះ លោក ជួន ណារិន្ទ បញ្ជាក់ថាសមត្ថកិច្ចបានចាត់វិធានការណែនាំ អប់រំ និងធ្វើកិច្ចសន្យាឱ្យពួកគេបញ្ឈប់សកម្មភាពទាំងនេះបន្តទៀត ព្រោះបានប៉ះពាល់សេចក្តីថ្លៃថ្នូរ និងប្រពៃណីល្អរបស់កម្ពុជា។ លោកបន្តថា ប្រសិនបើពួកគេមិនរាងចាល សមត្ថកិច្ចនឹងអនុវត្តតាមច្បាប់អន្តោប្រវេសន៍ដោយបណ្ដេញពួកគេចេញពីកម្ពុជា។
កាលពីថ្ងៃទី១២ សីហាកម្លាំងសមត្ថកិច្ចខេត្តព្រះសីហនុបានឆ្មក់ចាប់បានជនជាតិចិនចំនួន ៦នាក់ដែលធ្វើសកម្មភាពដើរចែកខិត្តប័ណ្ណផ្សព្វផ្សាយពីសេវាម៉ាស្សា និងសេវាមួយចំនួនពាក់ព័ន្ធនឹងសុខភាព ដែលក្នុងនោះមានបង្កប់នូវសេវាកម្មរកស៊ីផ្លូវភេទផងដែរ។នេះបើតាមការគូសបញ្ជាក់បន្ថែមពីលោក ជួន ណារិន្ទ។
លោក ជួន ណារិន្ទ បញ្ជាក់ថា បើទោះបីជាការពិភាក្សាផ្លូវច្បាប់ពីករណីនេះ ជាមួយព្រះរាជអាជ្ញារកពុំឃើញមានបទចោទក្តី តែអាជ្ញាធរបានដឹងប្រាដកថាជនជាតិចិនទាំងនោះ បានធ្វើសកម្មភាពដោយបង្កប់នូវការរកស៊ីផ្លូវភេទ ទើបសមត្ថកិច្ចចាត់វិធានការអប់រំដល់ពួកគេ។
បើតាមលោក ជួន ណារិន្ទ សកម្មភាពដើរចែកខិត្តប័ណ្ណនេះរបស់ពួកគេ ធ្វើឡើងនៅពេលយប់ហើយមានលក្ខណៈលួចលាក់ដោយជនជាតិចិនទាំងនោះដាក់ខិត្តប័ណ្ណតាមកញ្ចក់រថយន្ត តាមសណ្ឋាគារ ផ្ទះសំណាក់ បឹងហ្គាឡូ និងកន្លែងកំសាន្តនានាជាដើម។
លោកស្នងការនគរបាលខេត្តព្រះសីហនុរូបនេះបន្ថែមថា កាលពីពេលកន្លងទៅសមត្ថកិច្ចធ្លាប់បានបង្រ្កាប និងណែនាំជនជាតិចិនមួយក្រុមផងដែរ ករណីដូចគ្នានេះ។
ជាការកត់សម្គាល់ ការឃាត់ខ្លួនជនជាតិចិនដែលធ្វើសកម្មភាពចែកខិត្តប័ណ្ឌរកស៊ីផ្លូវភេទនេះ ធ្វើឡើងពីអ្នកលេងបណ្តាញសង្គមហ្វេសប៊ុកបានបង្ហោះចែកចាយខិត្តប័ណ្ណដែលមានសេវាកម្មរកស៊ីផ្លូវភេទនេះ។ នៅក្នុងខិត្តប័ណ្ណដែលត្រូវបានមើលឃើញលើបណ្តាញសង្គមនេះ មានដាក់រូបភាពស្ត្រីចិនអាក្រាតកាយ សរសេរអក្សរចិន និងលេខទូរស័ព្ទទំនាក់ទំនងផងដែរ។
ជុំវិញរឿងនេះលោកមេធាវី ជូង ជូងី មានប្រសាសន៍ថា ការដោះលែងឱ្យជនជាតិចិនទាំង ៦នាក់មានសេរីភាពឡើងវិញដោយគ្រាន់តែប្រើវិធានការអប់រំបែបនេះ អាចដោយសារសកម្មភាពទាំងនោះពុំមានចែងក្នុងច្បាប់ទើបព្រះរាជអាជ្ញាខេត្តព្រះសីហនុមិនអាចចោទប្រកាន់។ តែយ៉ាងណាលោកមេធាវីបញ្ជាក់ថា ទង្វើដេលបានប្រព្រឹត្តិដោយជនជាតិចិនទាំង៦នាក់នោះ គឺបានបំពានលើសីលធម៌ ប្រពៃណី និងវប្បធម៌ល្អរបស់កម្ពុជា។
សូមរំលឹកថា កាលពីចុងខែសីហាឆ្នាំ២០១៨នេះ ប្រតិភូពីស្ថានទូតចិនបានពិភាក្សាជាមួយអាជ្ញាធរខេត្តព្រះសីហនុ ជុំវិញការការពារសន្តិសុខដល់អ្នកវិនិយោគចិន ខណៈចំនួនជនជាតិចិនដែលកំពុងស្នាក់នៅក្នុងខេត្តជាប់មាត់សមុទ្រមួយនេះ បានកើនឡើងដល់ប្រមាណ ៤ ម៉ឺននាក់ ខណៈសារព័ត៌មាននានាតែងតែចុះផ្សាយពីការកើតមានបទល្មើសផ្សេងៗដែលបង្កឡើងដោយជនជាតិចិន។
យ៉ាងណាលោកអភិបាលខេត្តព្រះសីហនុគូសបញ្ជាក់ថា ជនជាតិចិនដែលកំពុងស្នាក់នៅ និងរកស៊ីក្នុងប្រទេសកម្ពុជាគឺត្រូវអនុវត្តតាមច្បាប់របស់កម្ពុជា ហើយករណីបានប្រព្រឹត្តិបទល្មើសគឺអាជ្ញាធរត្រូវអនុវត្តតាមច្បាប់របស់កម្ពុជា។
កាលពីពេលកន្លងទៅ ស្ថានទូតចិនប្រចាំកម្ពុជាបានបញ្ជាក់ពីជំហររបស់ខ្លួន ចំពោះជនជាតិចិនមួយចំនួនតូចនៅកម្ពុជា ដែលបានប្រពឹត្តអំពើល្មើសច្បាប់ បានធ្វើឱ្យប៉ះពាល់មុខមាត់ប្រជាជនចិនទាំងមូល។ ស្ថានទូតចិនប្រចាំនៅកម្ពុជា ស្នើឲ្យស្ថាប័នអនុវត្តន៍ច្បាប់នៅកម្ពុជា ចាត់វិធានការតឹងរឹងចំពោះប្រជាជនចិន ដែលប្រព្រឹត្តបទល្មើសទាំងនោះ និងអំពាវនាវឲ្យប្រជាជនចិនទាំងឡាយ ដែលមកកម្ពុជា រក្សាភាពត្រឹមត្រូវ ស្អាតបាត និងជៀសវាងពីល្បែងស៊ីសង៕
