ភ្នំពេញ៖ ប៉ូលិសស្រុកចិត្របុរី ខេត្តក្រចេះសាកសួរជនសង្ស័យចំនួន ៤នាក់ដែលសង្ស័យមានជាប់ពាក់ព័ន្ធនឹងអំពើឃាតកម្មបាញ់សម្លាប់មួយគ្រួសារហើយដុតផ្ទះ។ក្នុងនោះជនរងគ្រោះពីរនាក់ជាកូនក្មេង។
លោក ធូ វិរៈ ជូនសេចក្តីរាយការណ៍!
តាមរបាយការណ៍ប៉ូលិសស្រុកចិត្របុរី ខេត្តក្រចេះ ឱ្យដឹងថា អំពើឃាតកម្មបាញ់សម្លាប់មនុស្សមួយគ្រួសាររួចដុតផ្ទះជាក្រោយនៅយប់រំលងអាធ្រាត កាលពីថ្ងៃទី ៩ ខែ សីហា នៅកោះប្រឹម ភូមិប្អៀ ឃុំថ្មី ស្រុកចិត្របុរី ខេត្តក្រចេះ។
លោក ហង្ស ចាន់ឌី អភិបាលស្រុកចិត្របុរី ប្រាប់វិទ្យុស្ត្រីថា ជនរងគ្រោះស្លាប់មួយគ្រួសារចំនួនបួននាក់។ ក្នុងនោះមានក្មេងប្រុសអាយុ ១១ ឆ្នាំ ម្នាក់ និង ក្មេងស្រីម្នាក់អាយុ ៩ឆ្នាំ រួមទាំងឪពុកម្តាយរបស់ពួកគេត្រូវភ្លើងឆេះខ្លោចស្ទើគ្មានសល់។ ប៉ូលិសសង្ស័យថា អំពើឃាតកម្មឃោឃៅនេះជារឿងគំនុំសងសឹង។
លោក ហង្ស ចាន់ឌី៖«ដោយសារតែយើងលឺគ្រាប់កាំភ្លើងផ្ទុះពីរគ្រាប់មុន មួយសន្ទុះក្រោយបានឃើញដុត ឃើញឆេះទ្រុល អាហ្នឹងសាក្សីគាត់បំភ្លឺអញ្ចឹង។យើងសន្និដ្ឋានថា មានករណីបាញ់សម្លាប់មុនហើយ រួចហើយបានអូសខ្មោចយកដុតរួមគ្នា ដុតផ្ទះប៉ាដោយ ហើយយើងដាក់ការសង្ស័យសំខាន់បំផុតគឺឃាតកម្ម ករណីគំនុំ»។
លោក ហង្ស ចាន់ឌី ពន្យល់ថា ក្រោយកើតហេតុពីរថ្ងៃមានការរាយការណ៍ប្រាប់ប៉ូសិលថា មានករណីភ្លើងឆេះផ្ទះចាំចំការបណ្តាលឱ្យមនុស្សមួយគ្រួសារស្លាប់ទាំងអស់នៅក្នុងភ្លក់ភ្លើង។ លោកបន្ថែមថា មុនភ្លើងឆេះផ្ទះមួយសន្ទុះ គេបានលឺស្នូរបាញ់កាំភ្លើងចំនួនពីរគ្រាប់។នេះបើតាមចម្លើយសាក្សី។
ភ្លាមៗប៉ូលិសបានចុះទៅស៊ើបអង្កេតដោយរកឃើញភស្តុតាងសំបកកន្ទុះគ្រាប់កាំភ្លើងចំនួនពីរគ្រាប់នៅកន្លែងកើតហេតុក្នុងចំការនៅលើកោះដាច់ស្រយ៉ាលពីភូមិ។
ក្រោយស៊ើបអង្កេតចប់ប៉ូលិលធ្វើការឃាត់ខ្លួនជនសង្ស័យ៤នាក់ដែលមានទីលំនៅគឺចម្ងាយពីកន្លែងកើតហេតុពីរវាងជាងពីរយទីបីរយម៉ែត្រដែលនៅកោះនោះមានតែពីរគ្រួសាររស់នៅដោយប្រកបរបរធ្វើចំការ គឺគ្រួសារជនរងគ្រោះ និងគ្រួសារជនសង្ស័យ។ លោក ហង្ស ចាន់ឌី បន្ថែមថា ប៉ូលិសកំពុងសួរចម្លើយជនសង្ស័យទាំងបួននាក់នោះ អំពីអំពើឃាតកម្មនេះបន្តទៀត។
លោក ហង្ស ចាន់ឌី៖«ទាក់ទងនឹងជនសង្ស័យនេះដោយសារគាត់នៅចម្ងាយប្រហែលបីរយម៉ែត្រពីទីតាំងឃាតកម្ម ហើយនៅលើកោះនោះមានតែពីរគ្រួសារនេះទេ ដល់ពេលគេអញ្ជើញគាត់មកបំភ្លឺគាត់ថាគាត់អត់ដឹង។គ្រាប់កាំភ្លើងផ្ទុះពីរគ្រាប់ក៏គាត់មិនដឹង ភ្លើងឆេះស្លាប់មនុស្សក៏គាត់អត់ដឹងរួចនៅចម្ងាយប៉ុណ្ណឹង អ្នកដទៃដែលនៅឆ្ងាយគេលឺ កាំភ្លើងផ្ទុះក៏គេដឹង ឆេះទ្រុលគេដឹង។គេមិនមែនចោទប្រកាន់គេគ្រាន់តែឃាត់ខ្លួនដើម្បីបំភ្លឺ »។
ជនរងគ្រោះស្លាប់មួយគ្រួសារមានឪពុកម្តាយ និងកូនចំនួនពីរនាក់។ ឪពុកឈ្មោះ ឆុំ ឈាន មានវ័យ ៣០ ឆ្នាំ និងប្រពន្ធឈ្មោះ ជួន សុខនាង អាយុ ៣៦ ឆ្នាំ រួមទាំងកូនប្រុសច្បងឈ្មោះ ឈាន ភឹម ឈី អាយុ ១១ ឆ្នាំ និងកូនស្រីពៅឈ្មោះ ឈាន វណ្ណី អាយុ ៩ ឆ្នាំ៕
