ភ្នំពេញ ៖ លោក ពេជ្រ ស្រស់ ប្រធានគណបក្សយុវជនកម្ពុជាបានស្នើទៅគណៈកម្មាធិការជាតិរៀបចំការបោះឆ្នោតរាប់សន្លឹកឆ្នោតតាមមណ្ឌលរបស់គណបក្សរបស់លោកឡើងវិញ។ នេះបើតាមការបញ្ជាក់នៅលើទំព័រហ្វេសបុករបស់លោក ពេជ្រ ស្រស់ កាលពីថ្ងៃទី ១២ សីហា ម្សិលមិញ។
ការលើកឡើងរបស់របស់ លោក ពេជ្រ ស្រស់នេះ ធ្វើឡើងក្រោយពីគណៈកម្មាធិការជាតិរៀបចំការបោះឆ្នោតបានប្រកាសលទ្ធផលបណ្ដោះអាសន្នកាលពីថ្ងៃទី ១១ សីហា។
លោក ពេជ្រ ស្រស់ ប្រធានគណបក្ស យុវជនកម្ពុជាបានស្នើឱ្យ គ.ជ.ប ធ្វើការរាប់សន្លឹកឆ្នោតរបស់គណបក្សយុវជនកម្ពុជា តាមមណ្ឌលឡើងវិញ ដើម្បបញ្ជាក់ពីការបាត់បង់សន្លឹកឆ្នោតរបស់លោក។
យ៉ាងណាមិញ លោកពេជ្រ ស្រស់ ប្រធានគណបក្សយុវជនកម្ពុជា បានឲ្យដឹងថា គណបក្សរបស់លោកបាត់សំឡេងនៃចំនួនសំឡេងអ្នកគាំទ្រ។ លោក បញ្ជាក់ថែមទៀតថា សំឡេងដែលក្រុមការងារបក្សរបស់លោក ទទួលបាន គឺ ចំនួន ៣៩៤១៧សំឡេង ។ ប៉ុន្តែ គ.ជ.ប ចេញសេចក្ដីសម្រេចលេខ ៣៧០ ចុះថ្ងៃទី១១ សីហា បង្ហាញថា គណបក្សយុវជនកម្ពុជា ទទួលបាន ៣៩ ៣៣៣សំឡេង ដែលមានការបាត់សំឡេងអ្នកគាំទ្រគណបក្សនេះ ចំនួន ៨៤សំឡេង។
សូមរំលឹកថា ការបោះឆ្នោតជ្រើសតំាងតំណាងរាស្ដ្រនិតីកាលទី៦ បានធ្វើឡើងកាលពី ថ្ងៃទី ២៩ ខែកក្កដា ឆ្នាំ២០១៨ ដោយមានគណបក្សនយោបាយ ចូលរួមចំនួន ២០គណបក្ស។
ក្រោយពេលការប្រកាសលទ្ធផលបណ្ដោះអាសន្នកាលពីថ្ងៃទី ១១ សីហារបស់ គ.ជ.ប បង្ហាញថា មានប្រជាពលរដ្ឋខ្មែរចំនួន ៦,៩៥៦,៩០០នាក់ស្មើនឹង ៨៣,០២% បានចូលរួមបោះឆ្នោតជ្រើសតាំងតំណាងរាស្រ្តអាណត្តិទី ៦។
យ៉ាងណាក្ដី លទ្ធផលបណ្ដោះអាសន្ននេះបញ្ជាក់ថា គណបក្សប្រជាជនកម្ពុជា ទទួលបានសំឡេងឆ្នោតចំនួន ៤,៨៨៩,១១៣សំឡេង ដែលជាចំនួនឈ្នះដាច់យ៉ាងខ្លាំងពីគណបក្សផ្សេងៗ។ គេអាចសន្និដា្ននបានថា មានតែគណបក្សប្រជាជនកម្ពុជាទេ ដែលទទួលបានអាសន្នៈទាំង ១២៥ នៅក្នុងរដ្ឋសភា៕
