ភ្នំពេញ ៖ អគ្គនាយក មជ្ឈមណ្ឌលសកម្មភាពកំចាត់មីនកម្ពុជា ហៅកាត់ថា ស៊ីម៉ាក់ បានបញ្ជូនមន្ដ្រីរបស់ខ្លួនទៅស្វែងរក និងយកគ្រាប់បែកដែលមិនទាន់ផ្ទុះ បន្សល់ពីក្នុងអំឡុងជម្លោះកម្ពុជា និងថៃ ករណីប្រាសាទព្រះវិហារ កាលពីឆ្នាំ២០០៨។ នេះបើយោងតាមទំព័រហ្វេសប៊ុកលោក ហេង រតនា អគ្គនាយកស៊ីម៉ាក់ ផ្សព្វផ្សាយកាលពីថ្ងៃទី០៦ ខែសីហា ម្សិលមិញ។
លោក លៀ ស៊ីណា រាយការណ៍៖
ការបញ្ជូនមន្ដ្រីជំនាញខាងដោះមីន របស់មជ្ឈមណ្ឌលសកម្មភាពកំចាត់មីនកម្ពុជា ទៅស្វែងរកគ្រាប់បែកនាពេលនេះ គឺបន្ទាប់ពី មានការប្រទះឃើញគ្រាប់កាំភ្លើងធំ ១៥៥មីលីម៉ែត្រ ដែលមានពីរប្រភេទ គឺប្រភេទគ្រាប់បែកចង្កោម និងគ្រាប់ជះអំបែង។ លោក ហេង រតនា បញ្ជាក់ថា គ្រាប់ទាំងពីរប្រភេទនេះ គឺបន្សល់ទុកកាលពីការប្រយុទ្ធគ្នានៅតំបន់ព្រះវិហារ ហើយទាហានថៃ បានបាញ់ផ្លោងមកលើកងទ័ពកម្ពុជា។ តំបន់ដែលមានគ្រាប់ ទាំងអស់នេះ គឺស្ថិតនៅចំងាយប្រមាណ ៣គីឡូម៉ែត្រ ពីប្រាសាទព្រះវិហារ។
បន្ថែមពីនេះ អគ្គនាយក ស៊ីម៉ាក់ សង្កត់ធ្ងន់ថា គ្រាប់ទាំងនោះបើទោះជាកន្លងផុតទៅ ១០ឆ្នាំហើយក៏ដោយ ក៏វានៅតែមានសណ្ឋានល្អដដែល។ លោក ហេង រតនា ជារឿយៗអំពាវនាវដល់ប្រជាពលរដ្ឋគ្រប់រូប ត្រូវតែរាយការណ៍ជាបន្ទាន់ទៅកាន់អាជ្ញាធរ ក្នុងករណីដែលបានឃើញគ្រាប់យុទ្ធភណ្ឌមិនទាន់ផ្ទុះគ្រប់ប្រភេទ ពីព្រោះតែគ្រាប់យុទ្ធភណ្ឌទាំងនោះ មិនថា កន្លងទៅរយៈពេលយូរប៉ុណ្ណានោះទេ វានៅតែមានឥទ្ធិពលបង្កគ្រោះថ្នាក់។
លោក ហេង រតនា បញ្ជាក់ថា អង្គភាពស៊ីម៉ាក់ កំពុងតែព្យាយាមដោះមីន និងគ្រាប់ ដើម្បីធានាសុខសុវត្ថិភាពនៅតំបន់ព្រះវិហារ ក្រោមគម្រោងការផ្ដល់ជំនួយរបស់រដ្ឋាភិបាលចិន។
លោក ហុក ហេង អ្នកនាំពាក្យប៉ូលិសខេត្ដព្រះវិហារ បានប្រាប់ កាសែតខ្មែរថាមស៍ កាលពីថ្ងៃម្សិលមិញថា មន្ដ្រីនគរបាលកំពុងធ្វើការយ៉ាងជិតស្និទ្ធជាមួយ មន្ដ្រីអង្គភាព ស៊ីម៉ាក់ ដើម្បីកំណត់កន្លែងដែលមានគ្រាប់មិនទាន់ផ្ទុះទាំងអស់នោះ។
គួររឮកថា គិតពីឆ្នាំ១៩៩២ រហូតដល់ឆ្នាំ២០១៨នេះ មជ្ឈមណ្ឌលសកម្មភាពកំចាត់មីនកម្ពុជា ហៅកាត់ថា ស៊ីម៉ាក់ បានធ្វើការងារក្នុងការបោសសំអាតមីន និងគ្រាប់យុទ្ធភណ្ឌមិនទាន់ផ្ទុះអស់រយៈពេល ២៦ឆ្នាំហើយ។ ក្នុងអំឡុង នៃការប្រតិបត្ដិកន្លងមកនេះ អង្គភាព ស៊ីម៉ាក់ ដែលជាស្ថាប័នជាតិក្នុងការដោះមីន បានបោសសម្អាតគ្រាប់មីន និងសំណល់ជាតិផ្ទុះគ្រប់ប្រភេទបានចំនួន ២លាន ៧សែនគ្រាប់។ ស៊ីម៉ាក់ ប៉ាន់ប្រមាណថា ផ្ទៃដីដែលមានគ្រាប់មីន និងគ្រាប់យុទ្ធភណ្ឌមិនទាន់ផ្ទុះគ្រប់ប្រភេទ មានប្រមាណជិត ២០០០គីឡូម៉ែត្រក្រឡា។
ក្រោយពីបំពេញការងារប្រកបដោយមនុស្សធម៌អស់រយៈពេលជាង ២៥ឆ្នាំ ប្រមុខដឹកនាំរាជរដ្ឋាភិបាលកម្ពុជា សម្ដេច ហ៊ុន សែន កាលពីខែមីនា ឆ្នាំ២០១៨ កន្លងទៅ បានសម្រេចផ្ដល់ក្របខ័ណ្ឌមន្ដ្រីរាជការ ជូនដល់មន្ដ្រីរបស់មជ្ឈមណ្ឌលសកម្មភាពកំចាត់មីនកម្ពុជា ទាំងអស់ ឲ្យស្ថិតក្នុងក្របខ័ណ្ឌកងយោធពលខេមរភូមិន្ទ នៃក្រសួងការពារជាតិ ក្នុងគោលបំណង ដើម្បីឲ្យពួកគាត់ទទួលបាននូវរបបសោធននិវត្ដន៍ ពីរាជរដ្ឋាភិបាល ក្រោយពេលដែលពួកគាត់ដល់អាយុចូលនិវត្ដន៍ ឬក៏ពិការខណៈដែលបំពេញការងារជាដើម។ បុគ្គលិករបស់មជ្ឈមណ្ឌលកម្មភាពកំចាត់មីនកម្ពុជាសរុបមានចំនួន ១៨០០នាក់ ។ បច្ចុប្បន្នបុគ្គលិកដែលកំពុងបម្រើការងារ មានចំនួនជាង ១៥០០នាក់ ហើយជាង ១០០នាក់ ជាស្ដ្រី។ បុគ្គលិកដែលចូលនិវត្ដន៍មានចំនួនជាង ២០០នាក់។
មជ្ឈមណ្ឌលកម្មភាពកំចាត់មីនកម្ពុជា ហៅកាត់ថា ស៊ីម៉ាក់ គឺជាស្ថាប័នបោសសម្អាតមីន នៅក្នុងប្រទេសកម្ពុជា។ អង្គភាពកំចាត់មីនមួយនេះបានដាក់ចេញនូវកម្មវិធីការងារគន្លឹះចម្បងចំនួនបួន ដើម្បី “សង្គ្រោះជីវិត និងគាំទ្រការអភិវឌ្ឍសំរាប់ប្រទេសកម្ពុជា” ។ កម្មវិធីទាំងនោះរួមមាន កម្មវិធីស្រាវជ្រាវ និងកាត់បន្ថយបង្រួញផ្ទៃដីដែលមានមីន កម្មវិធីបោសសម្អាតមីន និងយុទ្ធភណ្ឌមិនទាន់ផ្ទុះ កម្មវិធីអប់រំផ្សព្វផ្សាយកាត់បន្ថយពីគ្រោះថ្នាក់មីន និងយុទ្ធភ័ណ្ឌមិនទាន់ផ្ទុះ និងកម្មវិធីហ្វឹកហ្វឺន និងស្រាវជ្រាវការអភិវឌ្ឍន៍បច្ចេកវិជ្ជាលើវិស័យបោសសម្អាតមីន៕
