ភ្នំពេញ៖ គណៈកម្មាធិការប្រយុទ្ធប្រឆាំងផលិតផលក្លែងក្លាយនៃក្រសួងមហាផ្ទៃបានរឹបអូសផលិតផលក្លែងក្លាយជិត៩០តោននិងឃាត់ខ្លួនជនសង្ស័យប្រមាណ១០នាក់។ អ្នកជំនាញថាផលិតផលក្លែងក្លាយទាំងនោះធ្វើឱ្យប៉ះពាល់សុខភាពធ្ងន់ធ្ងរ។
ក្នុងសន្និសីទសារព័ត៌មាននៅក្រសួងមហាផ្ទៃនៅថ្ងៃទី ៦ សីហា ម្សិលមិញ គណៈកម្មាធិការប្រយុទ្ធប្រឆាំងផលិតផលក្លែងក្លាយ ប្រកាសថា ក្រសួងរឹមអូសទំនិញក្លែងក្លាយចំនួន ៨៨ តោន។ ក្នុងនោះរួមមានកាហ្វេក្លែងក្លាយ ទឹកសុទ្ធ ប្រេងឆា និងស្រាបៀ ជាដើម។
លោកឧត្តមសេនីយ៍ មៀច សុផាន់ណា អនុរដ្ឋលេខាធិការក្រសួងមហាផ្ទៃ និងជាប្រធាន គណៈកម្មាធិការប្រយុទ្ធប្រឆាំងផលិតផលក្លែងក្លាយ មានប្រសាសន៍ថា អាជ្ញាធរបានបង្ក្រាបនិងរឹបអូសផលិតផលក្លែងក្លាយបានចំនួន ៤ករណី។
លោក មៀច សុផាន់ណា ថ្លែងថា ចាប់តាំងពីដើមឆ្នាំមកអាជ្ញាធរបង្ក្រាបផលិតផលក្លែងក្លាយប្រមាណ ៣០ ទៅ ៤០ ករណីដែលរឹបអូសទំនិញក្លែងក្លាយរាប់រយតោន និងឃាត់ខ្លួនមនុស្សយ៉ាងតិច១០នាក់ដែលជាប់ពាក់ព័ន្ធនឹងឧក្រិដ្ឋកម្មនេះ។
កាលពីថ្ងៃទី ១៣ ខែ ឧសភា ឆ្នាំ ២០១៨ អាជ្ញាធរបង្ក្រាបទីតាំងអាជីវកម្មសិប្បកម្មផលិតកាហ្វេក្លែងក្លាយ និងខុសច្បាប់ចំនួន ១០ មុខ ស្មើនឹង ៧ តោន។ ក្នុងប្រតិបត្តិការណ៍នេះ ឃាត់ខ្លួនជនសង្ស័យម្នាក់ នៅសង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។ ការបង្ក្រាបផលិតផលកាហ្វេក្លែងក្លាយមួយករណីទៀត អាជ្ញាធររឹបអូស ១៨ តោន ដែលមាន ១៣មុខ ស្ថិតនៅខណ្ឌទួលគោក រាជធានីភ្នំពេញ នីថ្ងៃទី ៦ កក្កដា ឆ្នាំ ២០១៨។
គណៈកម្មាធិការប្រយុទ្ធប្រឆាំងផលិតផលក្លែងក្លាយ បង្ក្រាបទីតាំងផលិតសាច់ប៉ាតេខុសច្បាប់ ៥ តោនដែលមាន ១៥ មុខ ស្ថិតនៅសង្កាត់ទឹកថ្លា ខណ្ឌ សែនសុខ រាជធានីភ្នំពេញ។ នៅថ្ងៃទី ២០ - ២១ កក្កដា ឆ្នាំ ២០១៨ អាជ្ញាធរមានសមត្ថកិច្ចបង្ក្រាបការនាំចូលផលិត ផលមានការ វេចខ្ចប់ក្លែងក្លាយនិងខុសច្បាប់នៃផលិតផលទឹកសុទ្ធអេយ្យង់ (Evian) និងទឹកសុទ្ធ Saint Amand រួមទាំងស្រាបៀរ Corona ចំនួន ៥៨តោន។
កាលពីថ្ងៃទី ៣ ខែ មេសា ឆ្នាំ ២០១៨ គណៈកម្មាធិការប្រយុទ្ធប្រឆាំងផលិតផលក្លែងក្លាយសម្រេចកិនកម្ទេចផលិតផលកែសម្ផស្ស និងគ្រឿងផ្សំឧបភោគចំនួន ១១០តោន។ ការបង្ក្រាបកាលនោះមនុស្សយ៉ាងតិចបីនាក់ត្រូវបានកាត់ទោសឱ្យជាប់ពន្ធនាគារមួយឆ្នាំក្នុងម្នាក់ៗ និងរឹបអូសទ្រព្យសម្បត្តិមួយចំនួនជាសម្បត្តិរដ្ឋនិងម៉ាស៊ីតផលិត១៦គ្រឿង។
កាលពីថ្ងៃទី ៣ ខែ តុលា ឆ្នាំ ២០១៧ អាជ្ញាធរកម្ទេចផលិតផលក្លែងក្លាយជាង ៨០ តោន។កាលពីឆ្នាំមុន គណៈកម្មាធិការប្រយុទ្ធប្រឆាំងផលិតផលក្លែងក្លាយបង្ក្រាបបទល្មើសចំនួន ១៩ ករណី។ ការបង្ក្រាបនេះឃាត់ខ្លួមនុស្ស៦នាក់ និងរឹបអូសផលិតផលក្លែងក្លាយប្រមាណ ៦០០តោន៕
