ភ្នំពេញ៖ អាជ្ញាធរខណ្ឌដង្កោនៅថ្ងៃទី០៦ សីហានេះបានបដិសេធករណីចាប់ជំរិតក្មេងស្រីប្រមាណ១០ ឃុំនៅក្នុងផ្ទះមួយកន្លែងសង្កាត់បឹងកេងកង ២ ខណ្ខចំការមន រាជធានីភ្នំពេញ ដែលករណីត្រូវបានបំប៉ោងថា បានប្រព្រឹត្តិដោយជនជាតិចិន។ ការស្រាយបំភ្លឺរបស់អាជ្ញាធរនេះ ធ្វើឡើងបន្ទាប់ពីបុរសម្នាក់ដែលអៈអាងថា ជាឪពុកក្មេងស្រីរងគ្រោះម្នាក់ក្នុងចំណោម ១០នាក់ផ្សេងទៀតនោះ បានប្រាប់អ្នកសារព័ត៌មានថា កូនស្រីរបស់លោករត់រួចពីការចាប់ជំរិតដោយជនជាតិចិន។
លោក ជឹម ស៊ីថា អធិការខណ្ឌដង្កោគូសបញ្ជាក់ប្រាប់វិទ្យុស្ត្រីថា ពុំមានករណីចាប់ជំរិតក្មេងស្រីចំនួន១០នាក់ ដូចបរុសម្នាក់ដែលអៈអាងជាឪពុកក្មេងស្រីជនរងគ្រោះ ប្រាប់ក្រុមអ្នកសារព័ត៌មានតាមបណ្តាញសង្គមហ្វេសប៊ុកនោះទេ។
លោកអធិការបញ្ជាក់ថា ករណីនេះគឺក្មេងស្រីរូបនោះបានរត់ចេញពីផ្ទះ តែកុហកឳពុកខ្លួនថា មានជន ជាតិចិនដាក់ថ្នាំសណ្ដំ និងឃុំខ្លួនក្នុងផ្ទះមួយកន្លែងជាមួយក្មេងស្រីផ្សេងទៀតនៅសង្កាត់បឹងកេងកង ២ ខណ្ខចំការមន។ លោកបន្តថា ករណីនេះត្រូវបានសារព័ត៌មានមួយចំនួនផ្សព្វផ្សាយបំប៉ោងការពិតដោយគ្មានមូលដ្ឋានច្បាស់លាស់។
លោក ជឹម ស៊ីថា៖«រហូតយើងសួរថា បងឯងទៅរំដោះកន្លែងៗណា បឹងកេង២ ចំការមននៅកន្លែងណា ដើម្បីសហការណ៍ជាមួយសមត្ថកិច្ច ឥឡូវយើងកំពុងតទៀតសួររឿងហ្នឹង។ទាល់ម៉ិញគាត់និយាយទៅផ្សេងទៀតមែនអាកញ្ចប់ខោអាវគឺខ្ញុំអាខោអាវ ឥឡូវកូនខ្ញុំនិយាយថាសំរាមវិញ ម៉ែអាណាស្ពាយសំរាមទៅរៀន។មានតែប៉ុណ្ណឹងទេបង ដល់ពេលព័ត៌មានយើងផ្សាយទៅជារឿងវ៉ល់បាចាប់ជំរិតនៅណាបើគាត់ជិះទៅរៀន»។
នៅព្រឹកថ្ងៃចន្ទនេះ នៅលើបណ្តាញសង្គមបានបង្ហោះផ្សព្វផ្សាយថា មានការចាប់ជំរិតក្មេងប្រមាណ ១០ នាក់ ក្រោយពីមានក្មេងស្រីម្នាក់រត់គេចខ្លួនពីក្នុងឡានជនល្មើស។ សារព័ត៌មាននៅលើបណ្តាញសង្គមហ្វេសប៊ុកផ្សាយទៀតថា ជនល្មើសជាជនជាតិចិនបានដាក់ថ្នាំសណ្ដំយកទៅឃុំក្នុងផ្ទះនៅសង្កាត់បឹងកេងកង២ ខណ្ឌចំការមន រាជធានីភ្នំពេញ។ យ៉ាងណាក្រុមអ្នកសារព័ត៌មានដែលបានចុះសម្ភាសន៍ឳពុក និងក្មេងស្រីរងគ្រោះ និងបានបង្ហោះផ្សព្វផ្សាយករណីនេះ ពុំបានទាក់ទងសុំការបំភ្លឺពីសមត្ថកិច្ចពាក់ព័ន្ធឡើយ ដែលនាំឱ្យអាជ្ញាធរខណ្ឌចេញមុខបដិសេធករណី។
លោក ជឹម ស៊ីថា អធិការខណ្ឌដង្កោ ពន្យល់បន្ថែមថា កាលពីថ្ងៃទី ៣ សីហា ក្មេងស្រីរូបបានចេញផ្ទះ នៅរសៀលម៉ោង ៣ ដោយប្រាប់ឪពុកម្តាយថាទៅសាលារៀន តែនាងពុំបានត្រឡប់មកផ្ទះវិញទេ។ រហូតដល់ថ្ងៃទី៤ សីហា ឳពុកក្មេងស្រីបានប្តឹងមកសមត្ថកិច្ចឱ្យជួយអន្តរាគមន៍ស្វែងរក ដោយប្រាប់សមត្ថកិច្ចថាកូនស្រីខ្លួនចេញពីផ្ទះជាមួយបង្វិចខោអាវមួយកញ្ចក់ទៅជាមួយ។
លោក ជឹម ស៊ីថា៖«បាត់រហូតពីថ្ងៃ៣ដ៏ថ្ងៃ ៤ រាយការណ៍ប៉ុស្តិ៍យើងវេលាម៉ោង៣កន្លះ មានសៀវភៅ ខោអាវមួយកញ្ចប់ចេញពីផ្ទះឥឡូវថ្ងៃនេះគេអត់ឃើញទេ ឱ្យយើងជួយរក យើងជួយរកគាត់អញ្ចឹង ស្រាប់តែព្រឹកមិញនេះគាត់ថា កូនគាត់រត់ពីផ្ទះមានគេចាប់មានអីអញ្ចឹងទៅឥឡូវយើងកំពុងសួរគាត់ថា រឿងហ្នឹងវាម្ត៉េចអីម្ត៉េច បងឯកមកដាក់ពាក្យបណ្តឹងខ្ញុំផ្សេង ហើយអ្នកឯកទៅបំភ្លឺជាមួយសារព័ត៌មានផ្សឹង។ឥឡូវយើងសំណូមពរឱ្យយកកូនស្រីគាត់ ដើម្បីយើងសាកសួរបំភ្លឺ គាត់ថាអត់បានទេចាំបីបួនថ្ងៃទៀត។»
លោកអធិការខណ្ឌដង្កោបានសម្តែងការខកចិត្តចំពោះប្រព័ន្ធផ្សព្វផ្សាយមួយចំនួនពិសេស ក្រុមអ្នកសារព័ត៌មានដែលផ្សាយតាមទំព័រហ្វេសប៊ុក ដែលបានផ្សាយខ្វះមូលដ្ឋានច្បាស់លាស់ ធ្វើឱ្យមានការភ័ន្តច្រលំ និងនាំឱ្យបំពុលបរិយាកាសសង្គម៕
