ភ្នំពេញ៖ ទឹកទន្លេមេគង្គផ្នែកខាងលើស្ថិតក្នុងខេត្តស្ទឹងត្រែងចាប់ផ្តើមស្រកចុះផុតពីការព្រួយបារម្ភ អ្នកភូមិរងការជន់លិចជាង ៣០០ គ្រួសារត្រូវបានជម្លៀសទៅទីទួសសុវត្ថិភាព គឺបានវិលត្រឡប់ទៅរស់នៅក្នុងផ្ទះសម្បែងវិញអស់ហើយ។ ប៉ុន្តែដំណាំស្រូវរបស់ប្រជាពលរដ្ឋរាប់រយហិកតារងការខូចខាតស្ទើទាំងស្រុង។
ទឹកទន្លេមេង្គផ្នែកខាងលើស្ថិតនៅស្រុកសៀមប៉ាងខេត្តស្ទឹងត្រែងបានចាប់ផ្តើមស្រកចុះមកសភាពធម្មតាវិញដោយអ្នកភូមិជម្លៀសទៅទីទួលមានសុវត្ថិភាពជាង ៣០០ គ្រួសារបានត្រឡប់ទៅរស់នៅក្នុងលំនៅឋានវិញហើយចាប់តាំងពីចុងខែកក្កដាមក។
ទោះបីយ៉ាងដំណាំស្រូវរាប់រយហិកតារងការខូចខាតដោយសារទឹកជន់លិចក្នុងរយៈពេលមួយសប្តាហ៍ ក្រោយពីទឹកទំនប់វារីអគ្គីសនីឡាវបាក់ហូរនាំទឹក ៥ ពាន់លានម៉ែត្រគុបមកទន្លេមេអង្គកម្ពុជា។
លោក យ៉ង់ សុខា អភិបាលរងស្រុកសៀមប៉ាង ប្រាប់វិទ្យុស្ត្រីថា អ្នកភូមិរងការជន់លិចដោយទឹកជំនន់ដែលត្រូវជម្លៀសប្រមាណ ៣៥០ គ្រួសារ ស្ថិតក្នុងចំណោមឃុំចំនួន៤ បានវិលទៅរស់នៅក្នុងផ្ទះអស់ហើយ ក្រោយពីទឹកជំនន់បានស្រកចុះពីភូមិអស់។
ទោះបីយ៉ាងណា លោក សុខា អភិបាលរងស្រុកសៀមប៉ាង បញ្ជាក់ថា ស្រូវសន្ទូង ប្រជាពលរដ្ឋទាំងនោះរលួយងាប់អស់គ្មានសល់ដោយសារលិចទឹក។
លោក យ៉ង់ សុខា៖«ស្រកតាំងពីថ្ងៃទី ២៩ ខែកក្កដា ចង់អស់ហើយ តាំងពីនោះ ដែលអ្នកត្រូវជម្លៀសទាំងប៉ុន្មានចូលទៅផ្ទះវិញហើយ។គាត់ទៅផ្ទះវិញជួបការលំបាកព្រោះ ដី ស្រែចំការ ស្រូវរលួយអស់ហើយ។ ហូស ប្រហែលជាច្រើនហើយ កំពុងឱ្យគេធ្វើរបាយការណ៍មកមិនទាន់បានទិន្នន័យច្បាស់លាស់ផងណា»។
បច្ចុប្បន្នទឹកជំនន់នៅស្រុកសៀមប៉ាង ខេត្តស្ទឹងត្រែង បានស្រកមកត្រឹម ១០,៤០ម៉ែត្រ ដែលផុតកម្រិតប្រកាសអសន្ន ១១,៥០ ម៉ែត្រ។តែយ៉ាងណាកាលពីសប្តាហ៍មុនទឹកជំនន់បានជន់លិចស្រុកនេះមានកម្ពស់ទឹករហូតដល់ ១២,៩០ ម៉ែត្រ។
លោក កែវ វី អ្នកនាំពាក្យគណៈកម្មការជាតិគ្រប់គ្រងគ្រោះមហន្តរាយ បញ្ជាក់ថា ស្ថានភាពទឹកជំនន់នៅខេត្តស្ទឹងត្រែងស្រកចុះសន្សឹមៗ តែទឹកជំនន់នៅខេត្តក្រចេះ កំពង់ចាម និងត្បូងឃ្មុំ ទឹកនឹងបន្តស្រកចុះនៅប៉ុន្មានថ្ងៃខាងមុខនេះ។
លោក កែវ វី អះអាងថា ទឹកជំនន់លិចខេត្តស្ទឹងត្រែង ក្រចេះ ត្បូងឃ្មុំ កំពង់ចាម បានធ្វើឲ្យប៉ះពាល់ដល់ ប្រជាពលរដ្ឋចំនួន ២៩១៤៥ គ្រួសាររងការលិចរងផ្ទះសម្បែង។ ក្នុងនោះអាជ្ញាធរជម្លៀសប្រជាពលរដ្ឋចំនួន ២១២៧ គ្រួសារ ទៅទីទួលមានសុវត្ថិភាព ២៣ កន្លែង។
លោក កែវ វី បន្ថែមថា ទឹកជំនន់បណ្តាលឱ្យមនុស្សស្លាប់បីនាក់។ ក្នុងនោះមនុស្សស្លាប់នៅខេត្តស្ទឹងត្រែង២នាក់ និងកំពង់ចាមម្នាក់។ ដោយឡែកទឹកលិចសន្ទូងស្រូវ និងស្រូវពង្រោះ របស់កសិករចំនួន ២៤៥៧ ហិកតា ហើយដំណាំចំការ និងដំណាំរួមផ្សំចំនួន ២៩៣៧ ហិកតា រងផលប៉ះពាល់ធ្ងន់ធ្ងរ។ លោកថា សាលារៀនចំនួន ៥៤ វត្តអារ៉ាម ចំនួន ១៩ និង មណ្ឌលសុខភាពចំនូន ៦ រងការជន់លិចផងដែរ។
លោក កែវ វី៖«ឆ្នាំនេះវាដំណើរវាសិងប្រហាក់ប្រហែលគ្នាទឹកវាឡើងមក ប៉ុន្តែធំជាងឆ្នាំទៅ ឆ្នាំទៅឡើងអត់ដល់ធំដូចឆ្នាំនេះទេ ស្ទឹងត្រែងឡើងដល់កម្រិតលើសកម្រិតប្រុងប្រយ័ត្នទៀត។តាមបណ្តាខេត្តក៏វាមិនដល់កម្រិតដែរ តែឆ្នាំនេះ វាឡើងលើសពីកម្រិតលើសពីឆ្នាំទៅ ខ្ទង់ពី បី បួន តឹងអញ្ចឹងណាស់។ពេលនេះការឡើងចុះវាអាចនឹងមានអញ្ចឹងទៀតប្រហាក់ប្រហែលគ្នាព្រោះជំនន់ទន្លេមេអង្គ»។
យោងតាមសេចក្តីជូនដំណឹងរបស់ក្រសួងធនធានទឹក និងឧតុនិយម នៅថ្ងៃទី ២ ខែ សីហានេះថា ទឹកជំនន់ទន្លេមេគង្គផ្នែកលើបានស្រកចុះហើយបន្តស្រកចុះជាបន្តបន្ទាប់បន្ថែមទៀត នៅថ្ងៃស្អែក។
សេចក្តីជូនដំណឹង បញ្ជាក់ថា ទន្លេមេគង្គស្ទឹងត្រែង អាចស្រកមកនៅកម្ពស់ ១០, ៥៣ ម៉ែត្រ។ កម្ពស់ទឹកទន្លេមេអង្គខេត្តក្រចេះ ទឹកអាចស្រកចុះមកនៅកម្ពស់ ២១,៦៥ ម៉ែត្រ ហើយទឹកទន្លេមេគង្គខេត្តកំពង់ចាម ទឹកអាចបន្តហក់ឡើងបន្តិចទៀត មុននឹងស្រកចុះនៅថ្ងៃទី ៤ សីហា។ ប៉ុន្តែទន្លេមេគង្គក្រោម ទន្លេបាសាក់ និងទន្លេសាប ទឹកនឹងបន្តហក់ឡើងសន្សឹមៗនៅក្នុងរយៈពេលពីរថ្ងៃទៀត។
បើតាម លោក យ៉ង់ សុខា អភិបាលរងស្រុកសៀមប៉ាង កំពុងស្រង់ទិន្នន័យជាក់លាក់នៃផលប៉ះពាល់ដល់ដំណាំស្រូវសរុបបញ្ជូនទៅថ្នាក់ខេត្ត ដើម្បីស្នើសុំពូជស្រូវ ចែកជូនប្រជាកសិករនៅក្នុងស្រុកសៀមប៉ាងបង្ករបង្កើនផលឡើងវិញ៕
