ភ្នំពេញ៖ នៅថ្ងៃទី១ ខែសីហានេះ ស្ថានទូតស៊ុយអែត បានចុះហត្ថលេខាលើកិច្ចព្រមព្រៀងផ្ដល់ជំនួយជាថវិកា គាំទ្រដល់វិទ្យាស្ថានម្ហូបអាហារកម្ពុជា សម្រាប់ការបណ្ដុះបណ្ដាលយុវជន លើមុខវិជ្ជាចម្អិនម្ហូប និងលើកកម្ពស់លើវិស័យបដិសណ្ឋារកិច្ចនៅកម្ពុជា។
លោក លៀ ស៊ីណា រាយការណ៍ ៖
ពិធីចុះហត្ថលេខានេះ ធ្វើឡើងនៅវិទ្យាស្ថានម្ហូបអាហារកម្ពុជា ក្នុងរាជធានីភ្នំពេញ។ ពិធីនេះមានវត្ដមានលោក Pierre Tami នាយកប្រតិបត្ដិវិទ្យាស្ថានម្ហូបអាហារកម្ពុជា និងលោក Samuel Hurtig ប្រធានសហប្រតិបត្ដិការអភិវឌ្ឍន៍អន្ដរជាតិរបស់ស៊ុយអែតប្រចាំនៅកម្ពុជា។
ប្រទេសស៊ុយអែត បានផ្ដល់នូវទឹកប្រាក់ចំនួន ២លានដុល្លារ សម្រាបគម្រោងរយៈពេល ៣ឆ្នាំ ដើម្បីឲ្យវិទ្យាស្ថានម្ហូបអាហារកម្ពុជា អាចបណ្ដុះបណ្ដាលធនធានមនុស្សប្រកបដោយជំនាញ ដែលមានស្ដងដាជាអន្ដរជាតិ រូមផ្សំនិងការច្នៃប្រឌិត លើវិស័យបដិសណ្ឋារកិច្ចនេះ។
លោក Pierre Tami នាយកប្រតិបត្ដិវិទ្យាស្ថានម្ហូបអាហារកម្ពុជា បានផ្ដល់បទសម្ភាសន៍ដល់សារព័ត៌មានថា លោកបានមករស់នៅក្នុងប្រទេសកម្ពុជាតាំងពីឆ្នាំ ១៩៩០ ។ លោកសង្កេតឃើញថា ប្រទេសកម្ពុជាបានអភិវឌ្ឍន៍ និងរីកចម្រើនស្ទើរគ្រប់វិស័យ ជាពិសេសលើវិស័យទេសចរណ៍។ ព្រោះការមើលឃើញដូចនេះ ទើបលោកសម្រេចចិត្ដបង្កើតបង្កើតវិទ្យាស្ថានម្ហូបអាហារកម្ពុជា ដើម្បីផ្ដល់ជាចំណេះ ជំនាញដល់ពលរដ្ឋកម្ពុជាដែលស្រឡាញ់ផ្នែកបដិសណ្ឋារកិច្ចនេះ ។ លោកបន្ដទៀតថា មានការកើនឡើងគួរឲ្យកត់សម្គាល់ នៃចំនួនយុវជនកម្ពុជា ក៏ប៉ុន្ដែពួកគេភាគច្រើនបានជូបប្រទះនៅបញ្ហាទីផ្សារការងារ ពីព្រោះតែពួកគេ មានកង្វះខាតនូវជំនាញសមស្រប។
នាយកប្រតិបត្ដិវិទ្យាស្ថានម្ហូបអាហារកម្ពុជា បង្ហាញក្ដីសង្ឃឹមថា វត្ដមានរបស់វិទ្យាស្ថានម្ហូបអាហារកម្ពុជា នឹងអាចរួមចំណែកក្នុងការកសាងជំនាញ និងបង្កើតឱកាសការងារសម្រាប់យុវជនកម្ពុជា តាមរយៈការរៀបចំបង្កើតជាវិទ្យាស្ថានដែលមានកម្មវិធីសិក្សាផ្នែកបដិសណ្ឋារកិច្ច ស្របតាមបទដ្ឋានស្ដង់ដារប្រទេស ក្នុងតំបន់អាស៊ាន និងការអប់រំតាមស្ដងដារប្រទេស ស្វីស ៖«ទាក់ទងជាមួយនិងធនធានមនុស្ស អញ្ចឹងហើយវិស័យបដិសណ្ឋារកិច្ចបច្ចុប្បន្ន គឺយើងទាមទារឲ្យមានអ្នកដែលថា មាន Skill ពិតប្រាកដ ចាស អញ្ចឹងហើយបានលោក ប្រឹងទាក់ទាញមូលនិធិពីក្រៅប្រទេសដើម្បីបង្កបង្កើតវិទ្យាស្ថាននេះឡើង»។
វិទ្យាស្ថានម្ហូបអាហារកម្ពុជា គឺជាវិទ្យាស្ថានបណ្ដុះបណ្ដាលជំនាញថ្មីមួយ ដែលបានបង្កើតឡើងដោយកិច្ចសហការរួមគ្នារវាងស្ថាប័នរដ្ឋ និងឯកជនដើម្បីឆ្លើយតបនឹងកំណើនខ្ពស់ នៃវិស័យទេសចរណ៍នៅកម្ពុជា។ នេះគឺជាវិទ្យាស្ថានដំបូងគេបង្អស់ នៅកម្ពុជា ដែលមានកម្មវិធីបដិសណ្ឋារកិច្ចលំដាប់អន្ដរជាតិ ដែលអនុលោមទៅតាមបទដ្ឋានស្ដង់ដារប្រទេសក្នុងតំបន់អាស៊ាន និងប្រទេសស្វីស។
លោក Samuel Hurtig ប្រធានសហប្រតិបត្ដិការអភិវឌ្ឍន៍អន្ដរជាតិរបស់ប្រទេសស៊ុយអែតប្រចាំនៅកម្ពុជា មានប្រសាសន៍ថា ការទទួលបានការអប់រំ គឺជាការយកចិត្ដទុកដាក់ចម្បងមួយសម្រាប់ជំនួយរបស់ស៊ុយអែត នៅក្នុងប្រទេសកម្ពុជា។ លោកបន្ដថា ការអភិវឌ្ឍជំនាញនៅក្នុងវិស័យបដិសណ្ឋារកិច្ចនេះ គឺពិតជាមានសារៈសំខាន់យ៉ាងខ្លាំងសម្រាបការរីកចម្រើននាពេលអនាគត និងសុខមាលភាពរបស់ប្រទេស ក៏ដូចជាប្រជាជនកម្ពុជា។
បន្ថែមលើនេះ ប្រធានសហប្រតិបត្ដិការអភិវឌ្ឍន៍អន្ដរជាតិរបស់ស៊ុយអែតប្រចាំនៅកម្ពុជា បញ្ជាក់ថា ស៊ុយអែតពិតជាមានការរីករាយក្នុងការគាំទ្រ ដល់វិទ្យាស្ថានម្ហូបអាហារកម្ពុជា ដើម្បីបណ្ដុះបណ្ដាលយុវជននៅកម្ពុជា អំពីជំនាញ និងចំណេះដឹងផ្សេងៗនៅក្នុងវិស័យបដិសណ្ឋារកិច្ចនេះ។
សូមជម្រាបថា វិទ្យាស្ថានម្ហូបអហារកម្ពុជា បានបើកដំណើរការនៅក្នុងខែមីនា ឆ្នាំ ២០១៧ ។ វិទ្យាស្ថាននេះ បើកទូលាយសម្រាប់ពលរដ្ឋគ្រប់រូប ដែលមានបំណងចូលទៅសិក្សា ជំនាញបដិសណ្ឋារកិច្ចនៅវិទ្យាស្ថាននេះ។ ទន្ទឹមគ្នានេះ វិទ្យាស្ថានម្ហូបអាហារកម្ពុជា ក៏បានផ្ដល់ជាះអាហារូបករណ៍ដល់សិស្សក្រីក្រ មកពីគ្រប់ទីកន្លែង ពិសេសស្ដ្រី ដើម្បីបានចូលរៀនផ្នែកបដិសណ្ឋារកិច្ចនេះផងដែរ។ អាហារូបករណ៍នេះ មានឈ្មោះថា Naomi Tami Memorial Scholarship៕
