ភ្នំពេញ ៖ មានគ្រោះថ្នាក់ចរាចរណ៍មួយបានកើតឡើងបណ្ដាលឲ្យកម្មករ កម្មការិនី ចំនួន ០៨នាក់ រងរបួសធ្ងន់ស្រាល ករណីគ្រោះថ្នាក់ចរាចរណ៍ នៅចំណុចភូមិ ត្រពាំងរំដេញ ឃុំក្បាលត្រាច ស្រុក ក្រគរ ខេត្ដពោធិ៍សាត់ កាលពីថ្ងៃទី២៦ ខែកក្កដា ឆ្នាំ២០១៨។ នេះបើយោងតាមសេចក្ដីប្រកាសព័ត៌មានរបស់ បេឡាជាតិរបបសន្ដិសុខសង្គម។
បេឡាជាតិរបបសន្ដិសុខសង្គម (ប.ស.ស) បានឲ្យដឹងថា គ្រោះថ្នាក់ចរាចរណ៍នេះ គឺកើតឡើងរវាងគោយន្ដ និងឡានដឹកកម្មករ។ មូលហេតុគឺបណ្ដាលមកពីគោយន្ដបានរ៉េចងគួតទៅបុកឡានដឹកកម្មករ ដែលបើកបរក្នុងទិសដៅបញ្ច្រាស់គ្នា នៅលើផ្លូវជាតិលេខ ៥ ។ រថយន្ដដឹកកម្មករ មាន កម្មករ កម្មការិនី ចំនួន ៦០នាក់។ ជនទាំងរងគ្រោះទាំង ៨នាក់ ៧នាក់រងរបួសស្រាល និងម្នាក់រងរបួសធ្ងន់ ក្នុងចំណោមពួកគេ មានកម្មការិនី ០២នាក់ មានផ្ទៃពោះ។ ក្រោយកើតហេតុ កម្មករ ដែលរងរបួស ត្រូវបញ្ជូនទៅព្យាបាលនៅមន្ទីរពេទ្យបង្អែកស្រុក ក្រគរ ខេត្ដពោធិ៍សាត់។
តាមរយៈសេចក្ដីប្រកាសព័ត៌មាននេះ ប.ស.ស បញ្ជាក់ថា បេឡាជាតិរបបសន្ដិសុខសង្គម នឹងបន្ដជួយដោះស្រាយទុក្ខលំបាករបស់ជនរងគ្រោះ និងក្រុមគ្រួសារ ស្របទៅតាមគោលរបបសន្ដិសុខសង្គមរបស់បេឡាជាតិរបស់សន្ដិសុខសង្គម៕
