កោះកុង៖ រដ្ឋបាលខេត្តកោះកុងនឹងចុះស្រង់ទិន្នន័យកំណត់អត្តសញ្ញាណដីជាកម្មសិទ្ធិរបស់ពលរដ្ឋដែលមានវិវាទជាមួយក្រុមហ៊ុន Union Development Group Co, Ltd។ នេះបើតាមលិខិតរបស់រដ្ឋបាលខេត្តកោះកុង ចុះថ្ងៃទី ២៤ កក្កដា ម្សិលមិញ។
ក្នុងលិខិតនេះបង្ហាញថា រដ្ឋបាលខេត្តកោះកុង ក្រសួងដែនដីនគររូបនីយកម្ម និងសំណង់ និងក្រសួងបរិស្ថាន នឹងចាប់ផ្ដើមចុះស្រង់ទិន្នន័យលើបញ្ហាដីធ្លីដែលប្រជាជនកាន់កាប់ ប្រើប្រាស់ និងអាស្រ័យផលលើដីជាក់ស្ដែង នៅឃុំព្រែកខ្សាច់ ស្រុកគិរីសាគរ ចាប់ពីថ្ងៃទី ៧ សីហា ២០១៨ រហូតរួចរាល់។
យ៉ាងណាមិញ រដ្ឋបាលខេត្តកោះកុងបានអញ្ជើញប្រធានអង្គការសម្ព័ន្ធមិត្តសត្វព្រៃ ប្រធានអង្គការលីកាដូប្រចាំខេត្តកោះកុង និងប្រធានអង្គការសមាគមអាដហុកប្រចាំខេត្តកោះកុង ដើម្បីចូលរួមក្នុងការសង្កេតការដំណើរការនៃការចុះស្រង់ទិន្នន័យកំណត់អត្តសញ្ញាណនេះឱ្យមានប្រសិទ្ធ ភាព។
គួររំលឹកថា ក្រុមហ៊ុន Union Development Group នេះបានទទួលដីសម្បទានសេដ្ឋកិច្ចសរុបចំនួន ៤៥ ១០០ ហិកតាពីរដ្ឋាភិបាលកម្ពុជាដើម្បីសាងសង់ទីក្រុងទេសចរណ៍ដ៏ធំមួយ ដែលត្រូវចំណាយទឹកប្រាក់៣,៨ពាន់លានដុល្លារ កាលពីឆ្នាំ២០០៨។ គម្រោងរបស់ក្រុមហ៊ុនអាចនឹងប្រើពេលប្រមាណជា ២៥ឆ្នាំ ដើម្បីដំណើរការអភិវឌ្ឍទីក្រុងទេសចរណ៍នេះ។
ប្រជាពលរដ្ឋខ្មែរជាង ១០០០គ្រួសារ បានចាកចេញពីលំនៅដ្ឋានរបស់ពួកគាត់។ ស្របគ្នានេះ ក៏នៅមានប្រជាពលរដ្ឋជាច្រើនគ្រួសារទៀតដែរ ដែលមិនទាន់ទទួលបានដំណោះស្រាយសមស្របសម្រាប់ដីដែលពួកគាត់ដែលកាន់កាប់ បន្ទាប់ពីពួកគាត់បានយល់ព្រមថា នឹងចាកចេញពីភូមិដ្ឋានចាស់ ទៅតាំងលំនៅដ្ឋាននៅភូមិដ្ឋានថ្មី។
យ៉ាងណាក្ដី ក្រុមមន្ត្រីដឹកនាំខេត្តកោះកុងបានសន្យាជាមួយពលរដ្ឋដែលមានវិវាទដីធ្លីជាមួយក្រុមហ៊ុន Union Development Group ថា នឹងដោះស្រាយទំនាស់ទាំងនោះឲ្យបានមុនការបោះឆ្នោតជាតិខែកក្កដា ឆ្នាំ ២០១៨នេះ៕
