ភ្នំពេញ ៖ អគ្គស្នងការដ្ឋាននគរបាលជាតិ នៃក្រសួងមហាផ្ទៃ នៅថ្ងៃទី២៤ ខែកក្កដា ឆ្នាំ២០១៨នេះបានចេញសេចក្ដីណែនាំ ប្រាប់ដល់មន្ដ្រីគ្រប់លំដាប់ថ្នាក់ ឲ្យបង្កើនសកម្មភាព គ្រប់គ្រងអាវុធ គ្រឿងផ្ទុះ ធ្វើយ៉ាងណាកុំឲ្យធ្លាក់ទៅក្នុងដៃជនទុច្ចរិត ដែលអាចយកទៅប្រព្រឹត្ដបទល្មើស ឬបង្កជាភេរវកម្ម និងចលាចលផ្សេងៗ នៅមុនពេល ក្នុងពេល និងក្រោយពេលបោះឆ្នោតថ្នាក់ជាតិថ្ងៃទី២៩ ខែកក្កដា ឆ្នាំ២០១៨។
សេចក្ដីណែនាំនេះបានបញ្ជក់ថា ក្នុងគោលបំណងធានានូវការគ្រប់គ្រង រំសេវ គ្រឿងផ្ទុះ នៅតាមក្រុមហ៊ុន ការដ្ឋាន មូលដ្ឋានអាជីវកម្ម សំដៅបង្ការរារាំង ទប់ស្កាត់រំសេវគ្រឿងផ្ទុះទាំងនោះ ធ្លាក់ដល់ដៃជនទុកច្ចរិត ដែលអាចយកទៅប្រព្រឹត្ដបទល្មើស ឬបង្កជាភេរវកម្ម ដែលនាំឲ្យមានហានិភ័យគ្រោះថ្នាក់ បង្កជាសំឡេងផ្ទុះ បង្កើតឲ្យមានភាពចលាចល នៅមុនពេល ក្នុងពេល និងក្រោយពេលបោះឆ្នោតសកលជ្រើសរើសតំណាងរាស្ដ្រអាណត្ដិទី០៦ ដែលនឹងប្រព្រឹត្ដទៅនាថ្ងៃអាទិត្យ ទី ២៩ ខែកក្កដា ឆ្នាំ២០៨។ អគ្គស្នងការដ្ឋាននគរបាលជាតិ បានធ្វើសេចក្ដីណែនាំដល់នាយកដ្ឋានជំនាញ និងស្នងការដ្ឋាននគរបាលរាជធានី ខេត្ដ ឲ្យបង្កើនការផ្សព្វផ្សាយឲ្យបានទូលាយ ដល់ក្រុមហ៊ុន ការដ្ឋាន មូលដ្ឋានអាជីវកម្ម អំពីច្បាប់ និងណែនាំបទដ្ឋានពាក់ព័ន្ធដល់ការគ្រប់គ្របរំសេវ គ្រឿងផ្ទុះឲ្យបានហ្មតចត់ និងមានសុវត្ថិភាព។
លើសពីនេះ ត្រូវបង្កើនការត្រួតពិនិត្យអាវុធ គ្រឿងផ្ទុះ និងគ្រាប់រំសេវ នៅតាមដងផ្លូវ តាមទីសាធារណៈ តាមគោលដៅសំខាន់ៗ និងពង្រឹងវិធានការត្រួតពិនិត្យ ទប់ស្កាត់ បង្ក្រាបរាល់ការលួចលាក់ នាំចូល ឬ លួចដឹកជញ្ជូនឆ្លងកាត់នៅតាមតំបន់ព្រំដែននានា។ ជាងនេះត្រូវចាត់បញ្ជូនមន្ដ្រីនគរបាលជំនាញ ឬ នគរបាលមូលដ្ឋាន ដើម្បីការពារទីតាំង និងចុះបញ្ជីគ្រប់គ្រង ត្រួតពិនិត្យការបញ្ចូល ការបញ្ចេញ ការរក្សាទុក ការបំផ្ទុះ ពិសេសការគ្រប់គ្រងឃ្លាំងរក្សាទុក និងប្រមូលរំសេវ គ្រៀងផ្ទុះដែលនៅសេសសល់ពីការប្រើប្រាស់ ត្រូវបង្វែរយកទៅរក្សាទុកក្នុងឃ្លាំងសុវត្ថិភាពវិញជាដាច់ខាត។
ក្រៅពីនេះអគ្គស្នងដ្ឋាននគរបាលជាតិ បញ្ជាក់ថា ទាំងនាយកដ្ឋានជំនាញ និងស្នងការដ្ឋាននគរបាលរាជធានី ខេត្ដ ត្រូវធ្វើការណែនាំដល់ម្ចាស់ក្រុមហ៊ុន ការដ្ឋាន មូលដ្ឋានអាជីវកម្មនានា ឲ្យផ្អាកជាបណ្ដោះអាសន្ន នូវការដឹកជញ្ជូនការប្រើប្រាស់រំសេវ គ្រឿងផ្ទុះ ដោយហាមដាច់ខាតមិនឲ្យដំណើរការរយៈ ០១សប្ដាហ៍ នៅ មុន និងក្រោយថ្ងៃបោះឆ្នោតជ្រើសតាំងតំណាងរាស្ដ្រ នីតិកាលទី ០៦។
បន្ថែមលើសនេះ នាយកដ្ឋានគ្រប់គ្រងអាវុធជាតិផ្ទុះ ត្រូវតាមដានត្រួតពិនិត្យ ការចាត់តាំងអនុវត្ដខាងលើនេះ ព្រមទាំងចាត់បញ្ជូននាយនគរបាល និងមន្ដ្រីជំនាញចុះសហការជាមួយស្នងការដ្ឋាននគរបាលរាជធានី ខេត្ដ ដើម្បីពិនិត្យលើគោលដៅដែលបានកំណត់ ថា មានភាពស្មុគ្រស្មាញ និងចាត់វិធានការជំនាញដោយផ្អែកលើស្ថានភាពជាក់ស្ដែង៕
