ភ្នំពេញ៖ សាលាដំបូងរាជធានីភ្នំពេញសម្រេចពន្យាពេលសវនាកាផលិតករភាពយន្តជនជាតិអូស្ត្រាលី James Ricketson តាមសំណើររបស់មេធាវី។ បើតាមការកំណត់តុលាការត្រូវបើកសវនានៅថ្ងៃទី ១៦ ខែកក្កដានេះ ប៉ុន្តែបានសម្រេចលើកពេលទៅខែក្រោយ ។
ផលិតករជនជាតិអូស្ត្រាលីលោក James Ricketson ដែលជាប់ចោទពីបទចារកម្មអាចនឹងប្រឈមមុខជាប់ពន្ធនាគារ ១០ ឆ្នាំ ប្រសិនបើត្រូវបានផ្តន្ទាទោស។ នៅថ្ងៃ ច័ន្ឌ ទី ១៦ ខែ កក្កដានេះ សំណុំរឿងរបស់ជនបរទេសនេះ ត្រូវបានតុលាការសម្រេចពន្យាពេលសនាវកាទៅខែក្រោយវិញ តាមការស្នើសុំរបស់មេធាវី។ គិតមកពេលនេះ លោក James ត្រូវបានជាប់ឃុំអស់រយៈពេលជាងមួយឆ្នាំមកហើយ។
លោក គង់ សំអុន មេធាវីការពារក្តី លោក James ដែលទើបនឹងទទួលការពារសំណុំរឿងនេះ ប្រាប់វិទ្យុស្ត្រីថា ការស្នើសុំពន្យាពេលសវនាកាមានរយៈពេលមួយខែគត់ដើម្បីសិក្សាអំពីសំណុំរឿងកូនក្តីរបស់លោក។លោកថា តុលាការនឹងបើកសវនាកនៅថ្ងៃទី ១៦ ខែ សីហា ក្រោយពីដំណើរការបោះឆ្នោតជ្រើសតាំងតំណាងរាស្ត្រ។
លោក គង់ សំអុន៖«ដោយសាររឿងក្តីហ្នឹង ខ្ញុំទើបគេមកពឹង អញ្ចឹងខ្ញុំអត់ទាន់អាចការពារក្នុងរឿងនីតិវិធីទាំំងមូលបានទេ។ខ្ញុំសុំពន្យាពេលហ្នឹង ដើម្បីសិក្សាសំណុំរឿងនេះ ព្រោះខ្ញុំទើបពឹងបានប៉ុន្មានថ្ងៃមុននេះ។ ថ្ងៃទី ១៦ ខែក្រោយ តុលាការអនុញ្ញាតមួយខែ យើងមានពេលមួយខែដើម្បីសិក្សាសំណុំរឿង ហើយការពិភាក្សាជាមួយកូនក្តី»។
កាលពីសប្តាហ៍មុន James Ricketson ផលិតករភាពយន្ត បានសរសេរលិខិតសុំទោសសម្តេចនាយករដ្ឋមន្ត្រី ហ៊ុន សែន ដោយសារភាពកំហុសអំពីការអត្ថាធិប្បាយរបស់ខ្លួន។
លោក Ricketson ត្រូវគេស្គាល់ជាទូទៅថា ជាអ្នកសារព័ត៌មាន និងជាអ្នកជំនាញខាងថតរូបផលិតខ្សែភាពយន្ត។ បុរសជន ជាតិអូស្ត្រាលី រូបនេះ ត្រូវបាននគរបាលកម្ពុជា ចាប់ខ្លួន នៅថ្ងៃទី៣ មិថុនា បន្ទាប់ពីលោក បង្ហោះDrone ថតយករូបភាព នៃ ការហែក្បួនឃោសនានយោបាយរបស់អតីគណបក្សសង្គ្រោះជាតិដែលត្រូវបានតុលាការកំពូលរំលាយ។
រូបភាពដែល Drone របស់លោក Ricketson ថតមើលឃើញលើបណ្ដាញសង្គមដោយ ឃើញហ្វូងមនុស្សជាច្រើនម៉ឺននាក់។ លោក Ricketson មានអាយុ៦៩ ឆ្នាំ មានមុខរបរ ជាអ្នកសារព័ត៌មានតាំងពីទសវត្ស១៩៧០។ លោកចាប់ផ្ដើម បញ្ចេញរូបភាព រឿងទុរគតនៃប្រទេសកម្ពុជា ទៅក្រៅប្រទេស គឺនៅពេលលោកផ្ដោតអំពីសកម្មភាពរបស់អតីតប្រធានគណបក្សប្រឆាំង លោក សម រង្ស៊ី។
នៅពេលលោក សម រង្ស៊ី វិលប្រទេសកម្ពុជានៅថ្ងៃទី១៩ ខែកក្កដា ឆ្នាំ២០១៣ លោក Ricketson បានតាមប្រមាញ់ផ្ដិតរូបភាពអតីតមេបក្សប្រឆាំងរូបនេះនៅស្ទើរគ្រប់វេទិកា៕
