ភ្នំពេញ ៖ មន្ដ្រីរបស់ក្រសួងការងារ បានបញ្ជាក់ថា ករណី កម្មករ កម្មការិនីដួលសន្លប់ កាលពីថ្ងៃទី០៩-១១ ខែកក្កដា ឆ្នាំ២០១៨ មិនមែនជាកំហុសរបស់រោងចក្រ ទាក់ទិន បញ្ហាបច្ចេកទេសនោះទេ។ ការដែលអះអាងដូច្នេះ បន្ទាប់ពីមន្ដ្រីជំនាញរបស់ក្រសួងការងារបានចុះទៅដល់រោងចក្រនោះ ដោយបានត្រួតពិនិត្យ ទាំងបញ្ហាបច្ចេកទេ បរិយាកាសការងារ អនាម័យ និងក្លិនកាវ ។
លោក លៀ ស៊ីណា រាយការណ៍ ព័ត៌មាននេះ៖
ប្រធានក្រុមការងារទប់ស្កាត់ករណីដួលសន្លប់ នៃក្រសួងការងារ បានបញ្ជាក់ប្រាប់វិទ្យុស្ដ្រីថា ករណីកម្មករ កម្មការិនី ដួលសន្លប់នៅខេត្ដតាកែវ ប្រមាណជាង ៣០០នាក់ ចន្លោះពីថ្ងៃទី០៩ ដល់ថ្ងៃទី១១ ខែកក្កដា មិនមែនបណ្ដាលមកពីបញ្ហាបច្ចេកទេសរបស់រោងចក្រនោះទេ។
លោក ប៉ុក វណ្ណថាត ប្រធានក្រុមការងារទប់ស្កាត់ករណីដួលសន្លប់ របស់ក្រសួងការងារ បញ្ជាក់ដូចនេះ បន្ទាប់ពីអង្គការ សង់ត្រាល់ (CENTRAL ) ចេញសេចក្ដីថ្លែងការណ៍កាលពីថ្ងៃទី១១ ខែកក្កដា ថា មានកម្មករ កម្មការិនី រហូតដល់ ៦០០នាក់បានដួលសន្លប់ ហើយកម្មការិនីទាំងនោះបាននិយាយថា ពួកគាត់មិនដឹងហេតុអីនោះទេ។ ប៉ុន្ដែ ពួកគាត់បាននិយាយថា នៅពេលនោះពួកគេ គឺម្នាក់ៗ ធំក្លិនយ៉ាងខ្លាំង និងសីតុណ្ហភាពក្ដៅខ្លាំងក្នុងរោងចក្រ បណ្ដាលឲ្យពួកគាត់អស់កម្លាំង វិលមុខ ស្លេកស្លាំង ហើយដួលសន្លប់តែម្ដង។
ជាងនេះអង្គការ សង់ត្រាល់ បាននិយាយក្នុងសេចក្ដីថ្លែងការណ៍នេះថា ខ្លួនមានការសោកស្ដាយដែលទាំងរោងចក្រ និងអាជ្ញាធរ មិនបានចាត់វិធានការឲ្យបានគ្រប់គ្រាន់ដើម្បីការពារកម្មករ។ អង្គការដែលធ្វើការងារការពារសិទ្ធិមនុស្ស និងកម្មករ មួយនេះបន្ដទៀតថា អង្គការ សង់ត្រាល់ សូមអំពាវនាវយ៉ាងខ្លាំងដល់ក្រសួងការងារ និងបណ្ដុះបណ្ដាលវិជ្ជាជីវៈបញ្ជូនក្រុមអធិការកិច្ចឲ្យពិនិត្យមើលរោងចក្រផលិតស្បែកជើង ប៉ុនតឺស ហ្វ៊ូតវែរ (PONTUS FOOTWEAR) និងលក្ខខណ្ឌសុវត្ថិភាពការងារ របស់រោងចក្រនេះ។
ឆ្លើយតបនឹងអ្វីដែលជាការលើកឡើងរបស់អង្គការ សង់ត្រាល់ លោក ប៉ុក វណ្ណថាត មានប្រសាសន៍ថា បរិស្ថាន និងប្រព័ន្ធបច្ចេកទេសរបស់រោងចក្រ ប៉ុនតឺស ហ្វ៊ូតវែរ គឺគ្មានបញ្ហាអ្វីនោះទេ ពោលគឺស្ថានភាពខាងក្នុងនោះល្អទាំងអស់។ លោកបញ្ជាក់ថា មូលហេតុដែលនាំឲ្យកម្មករ សន្លប់ គឺដើមហេតុដំបូងបណ្ដាលមកពីកម្មការិនីម្នាក់មុតដៃ ហើយស្រែកយំ ហើយក៏បណ្ដាលឲ្យកម្មការិនី នៅក្បែរនោះភិតភ័យ ដួលសន្លប់ ២នាក់ភ្លាមៗ និងបណ្ដាលឲ្យអ្នកផ្សេងទៀតដួលសន្លប់ជាបន្ដបន្ទាប់តែម្ដង ៖«ប៉ុន្មានថ្ងៃនេះ ព័ត៌មានដែលផ្សព្វផ្សាយចេញ គឺខ្ញុំពិបាក ពិបាកដោយសារអ្នកទាំងអស់គ្នាដែលបានមានប្រសាសន៍ហ្នឹង គឺអត់បានទៅឃើញផ្ទាល់ ចំពោះពួកខ្ញុំ បានទៅអង្កេតផ្ទាល់បានដឹងរឿង ហើយចាត់វិធានការ»។
ប្រធានក្រុមការងារទប់ស្កាត់ករណីដួលសន្លប់ របស់ក្រសួងការងារ បន្ដទៀតថា ទាំងកម្រិតខ្យល់ កម្រិតសីតុណ្ហភាព និងក្លិនកាវ គឺសមស្របទៅតាមលក្ខខណ្ឌបច្ចេកទេស។ លោកបន្ថែមទៀតថា មូលហេតុដែលនាំឲ្យមានកម្មករ កម្មការិនី ដួលសន្លប់ជាបន្ដបន្ទាប់ទៀត ពីព្រោះតែកម្មករ កម្មការិនី ដែលដែលសន្លប់នៅថ្ងៃដំបូងនោះ បានទៅរោងចក្រជាថ្មីទាំងកំពុងព្យួរសេរ៉ូម ដើម្បីបើកប្រាក់ខែទើបណ្ដាលឲ្យអ្នកផ្សេងៗ ភិតភ័យរហូតដល់សន្លប់ជាបន្ដបន្ទាប់ទៀត។
ជុំវិញបញ្ហានៃការដួលសន្លប់នេះ លោក ឡេង តុង ប្រធាននាយកដ្ឋានពេទ្យ នៃក្រសួងការងារ និងបណ្ដុះបណ្ដាលវិជ្ជាជីវៈ មានប្រសាសន៍រំឮកថា កម្មករ កម្មការិនី គួររក្សាសុខភាព ដោយការហាត់ប្រាណខ្លះៗ និងសម្រាកឲ្យបានគ្រប់គ្រាន់។ លោកបន្ដថា ប្រសិនបើមានអាការ មិនស្រួលខ្លួន ត្រូវតែប្រញាប់ទៅពិនិត្យសុខភាព កុំបណ្ដោយឲ្យជំងឺរាលដាលរហូតដល់សន្លប់ ៖«រឿងសុវត្ថិភាពហ្នឹងឯង និងរឿងសុខភាព គាត់ត្រូវយកចិត្ដទុកដាក់ជាចម្បងតែម្ដង អញ្ចឹងគឺកើតពីខ្លួនឯង គឺត្រូវគិតពីសុវត្ថិភាពទាំងអស់ហ្នឹង»។
លើសពីនេះ លោកក៏ស្នើឲ្យក្រុមថៅកែ និយោជក ត្រូវពិនិត្យមើលឡើងវិញពីស្ថានភាព បរិយាកាស ក្នុងអាគាររោងចក្ររបស់ខ្លួន ឲ្យស្របទៅនឹងសេចក្ដីណែនាំ និងសេចក្ដីប្រកាសរបស់របស់ក្រសួងការងារ ស្ដីពីការទប់ស្កាត់ករណីដួលសន្លប់។
រោងចក្រផលិតស្បែកជើង ប៉ុនតឺស ហ្វ៊ូតវែរ (PONTUS FOOTWEAR) មានកម្មករ កម្មការិនី សរុបជាង ៤ពាន់នាក់ រោងចក្រនេះស្ថិតក្នុងឃុំតាភេម ស្រុកត្រាំកក់ ខេត្ដតាកែវ៕
