យោងតាមការផ្សាយរបស់ CNN News បានផ្សាយនៅថ្ងៃទី28 កញ្ញា ឆ្នាំ២០១៥ឲ្យដឹងថា កិច្ចប្រជុំរវាងលោកប្រធានាធិបតីបារ៉ាក់ អូបាម៉ា និងប្រធានាធិបតីប្រទេសរុស្ស៊ីលោកវ្ល៉ាឌីមៀរពូទីនកាលពីថ្ងៃចន្ទ បានចាប់ផ្តើមជំរុញការទូតថ្មីមួយស្តីពីវិបត្តិក្នុងប្រទេសស៊ីរី ដោយអាមេរិកកំពុងពិសោធមើលគំនិត បង្កើតឲ្យមានស្ពាននយោបាយមួយនៅទីនោះ ដែលអាចនាំទៅរកការបង្កើតរដ្ឋាភិបាលថ្មីមួយ។
ក្រុមមន្ត្រី និងអ្នកការទូតអាមេរិកបានឱ្យដឹងថា រដ្ឋមន្ត្រីក្រសួងការបរទេស លោក John Kerry សង្ឃឹមថា នឹងប្រើការជួបជុំប្រចាំឆ្នាំរបស់មេដឹកនាំពិភពលោកក្នុងសប្តាហ៍នេះ នៅឯមហាសន្និបាតអង្គការសហប្រជាជាតិ ដើម្បីជំរុញកិច្ចចរចាស្តីពីកិច្ចខិតខំប្រឹងប្រែងថ្មី។
យុទ្ធសាស្ត្រនេះមានគោលបំណងបញ្ចូលកងយោធាធំបំផុតប្រទេសស៊ីរី រុស្ស៊ី និងអ៊ីរ៉ង់ទៅក្នុងបញ្ជីគាំទ្រផ្នែកហិរញ្ញវត្ថុ និងនយោបាយ រួមជាមួយប្រទេសនានា ដូចជាប្រទេសអារ៉ាប៊ីសាអូឌីត តួកគី និងប្រទេសកាតា ដែលគាំទ្រដល់ក្រុមប្រឆាំងស៊ីរី ប្រឆាំងនឹងរបបលោកប្រធានាធិបតីបាសារអាល់អាសាដ។
កិច្ចខិតខំប្រឹងប្រែងដោះស្រាយសង្គ្រាមស៊ីវិលនៅស៊ីរីរយៈពេលប្រាំឆ្នាំ ដែលបានសម្លាប់មនុស្ស 200.000នាក់ និងជាច្រើនលាននាក់ទៀតផ្លាស់ទីលំនៅ បានបង្កើតឲ្យមានការកសាងសម្ព័ន្ធភាពយោធាជាបន្ទាន់មួយជាមួយរុស្ស៊ី នៅក្នុងទឹកដីដែលបែកបាក់ដោយសារសង្គ្រាមមួយនេះ។
លោក Kerry បានជួបជាមួយរដ្ឋមន្ត្រីការបរទេសរុស្ស៊ីលោក Sergey Lavrov កាលពីថ្ងៃអាទិត្យមុន មុនកិច្ចប្រជុំរវាងលោកអូបាម៉ាហើយនិងលោកពូទីន ។ វ៉ាស៊ីនតោនកំពុងស្វែងរកភាពច្បាស់លាស់បន្ថែមទៀតលើការជំរុញរបស់ក្រុងម៉ូស្គូ សម្រាប់ការបង្កើនខាងវិស័យយោធារបស់ខ្លួននៅក្នុងប្រទេសស៊ីរី និងការសម្របសម្រួលផ្នែកយោធាច្បាស់លាស់របស់ខ្លួនជាមួយប្រទេសអ៊ីរ៉ង់។
មន្ត្រីអាមេរិកទទួលស្គាល់ថា ពួកគេមានការភ្ញាក់ផ្អើល ដោយបានដឹងថា មានកិច្ចព្រមព្រៀងចែករំលែកការស៊ើបការណ៍សម្ងាត់ រវាងរុស្ស៊ី អ៊ីរ៉ង់ និងអ៊ីរ៉ាក់នៅលើការប្រយុទ្ធប្រឆាំងនឹងក្រុម ISIS ប៉ុន្តែពួកគេមិនបានចាត់ទុករឿងនេះជាការសំខាន់ទេ៕
ប្រែសម្រួលដោយ៖ មឿន ឌីណា
