ភ្នំពេញ៖ យោងតាមរបាយការណ៍អគ្គនាយកដ្ឋានកៅស៊ូនៃក្រសួងកសិកម្ម រុក្ខាប្រមាញ់ និងនេសាទចេញផ្សាយនៅថ្ងៃទី ១៣ ខែកក្កដា ឆ្នាំ ២០១៨ បញ្ជាក់ថា បរិមាណផលិតផលសម្រេចក្នុងឆមាសទី១កើនឡើងជាង១ម៉ឺនតោនស្មើនឹង១៥ភាគរយ បើធៀបនឹងរយៈពេលដូចគ្នាឆ្នាំមុន។
របាយការណ៍នេះ ឲ្យដឹងទៀតថា បរិមាណបញ្ជេញលក់ក្នុងឆមាសទី១ មានចំនួន ៨៤៤១៩ តោន កើនឡើងជាង ១ ម៉ឺន ៤ ពាន់តោន ស្មើនឹង ២១ ភាគរយ បើធៀបនឹងរយៈពេលដូចគ្នាកាលពីឆ្នាំមុន។ ការលក់ជ័រកៅស៊ូកក្នុងឆមាសទី១ ទទួលបានចំណូលប្រហែល ១២០ លានដុល្លារអាមេរិក។
ក្នុងរបាយការណ៍នេះ បន្ថែមថា តម្លៃលក់ជ័រកៅស៊ូមធ្យមក្នុងឆមាសទី១មានចំនួន ១៤៣៤ ដុល្លារអាមេរិកក្នុងមួយតោន។ តម្លៃជ័រកៅស៊ូធ្លាក់ចុះ ៣៣៦ ដុល្លារអាមេរិក ឬថយចុះ ១៨,៩៨ ភាគរយ បើធៀបនឹងរយៈពេលដូចគ្នាកាលពីឆ្នាំមុន។
បើតាមរបាយការណ៍អគ្គនាយកដ្ឋានកៅស៊ូនៃក្រសួងកសិកម្ម រុក្ខាប្រមាញ់ និងនេសាទ នៅឆ្នាំ ២០១៧ កម្ពុជានាំចេញជ័រកៅស៊ូជិត២០ម៉ឺនតោនទទួលបានចំណូលប្រមាណ ៣០០ លានដុល្លារ។ជ័រកៅស៊ូកម្ពុជានាំចេញទៅប្រទេសចិន វៀតណាម សិង្ហបុរី និងម៉ាឡេស៊ី៕
