ភ្នំពេញ ៖ អគ្គស្នងការដ្ឋាននគរបាលជាតិ បានឃាត់រថយន្ដ ដែលពាក់ស្លាកលេខ “នគរបាល” និងម្ចាស់ យកមកធ្វើការដាក់ពិន័យ និងបកស្លាកគណបក្ស ប្រជាជនកម្ពុជា ចេញពីរថយន្ដនោះ ហើយបញ្ជូនមន្ដ្រីដែលយករថយន្ដ រដ្ឋទៅឃោសនាបម្រើឲ្យបក្សនយោយបាយនោះ ទៅគណៈកម្មាធិការជាតិរៀបចំការបោះឆ្នោតចាត់ការទៅតាមនីតិវធី និងច្បាប់បោះឆ្នោត។ នេះបើយោងតាមគេហទំព័រអគ្គស្នងការដ្ឋាននគរបាលជាតិ ដែលផ្សព្វផ្សាយកាលពីថ្ងៃទី១៣ ខែកក្កដា។
ការឃាត់រថយន្ដ និងម្ចាស់ ធ្វើឡើងបន្ទាប់ពីមានការដាក់បញ្ជាដោយផ្ទាល់ពីសម្ដេច ស ខេង ឧបនាយករដ្ឋមន្ដ្រី និងជារដ្ឋមន្ដ្រី ក្រសួងមហាផ្ទៃ ឲ្យមន្ដ្រីក្រោមឱវាទតាមស្រាវជ្រាវ និងចាត់វិធានការលើមន្ដ្រីដែលយករថយន្ដ របស់រដ្ឋទៅឃោសនាបម្រើឲ្យគណបក្សនយោបាយ។ ក្រោយពីមានការស្រាវជ្រាវ អគ្គស្នងការដ្ឋាននគរបាលជាតិ បានរកឃើញថា រថយន្ដ Lexus ដែលពាក់ស្លាកលេខ នគរបាល 2-0996 គឺជារបស់មន្ដ្រី នៃអគ្គលេខាធិការដ្ឋានក្រសួងមហាផ្ទៃ។ ក្រោយរកឃើញ អគ្គស្នងការដ្ឋាននគរបាលជាតិ បានដាក់ពិន័យមន្ដ្រី ដែលជាម្ចាស់រថយន្ដនោះ និងបកស្លាកគណបក្សប្រជាជនកម្ពុជា ហើយបញ្ជូនសំណុំរឿងនេះ ទៅគណៈកម្មាធិការជាតិរៀបចំការបោះឆ្នោត (គ.ជ.ប) ដើម្បីចាត់ការទៅតាមនីតិវិធី និងច្បាប់បោះឆ្នោត។
គួរជម្រាបថា យោងតាមច្បាប់របស់ គ.ជ.ប មន្ដ្រីរាជការស៊ីវិល អាជ្ញាធរដែនដីគ្រប់លំដាប់ថ្នាក់ កងយោធពលខេមរភូមិន្ទ នគរបាលជាតិ និងមន្ដ្រីតុលាការ គឺនឹងមានទោសប្រសិនបើពួកគេ យកម៉ោងកំពុងបំពេញការងារ និងសម្ភារផ្សេងៗ របស់រដ្ឋទៅបម្រើឲ្យការឃោសនារកសំឡេងឆ្នោតសម្រាប់ គ្រប់គណបក្សនយោបាយ ក្នុងអំឡុងយុទ្ធនាការឃោសនាបោះឆ្នោតនេះ ។ ក៏ប៉ុន្ដែរថយន្ដពាក់ស្លាកលេខ រដ្ឋសភា ព្រឹទ្ធសភា គឺត្រូវបានអនុញ្ញាតសម្រាប់ការឃោសនាគ្រប់គណបក្សនយោបាយ។
មន្ដ្រីនាំពាក្យ គ.ជ.ប បញ្ជាក់ថា មន្ដ្រីរាជការដែលប្រព្រឹត្ដល្មើសនិងបទបញ្ជានេះ នឹងត្រូវផាកពិន័យ ជាប្រាក់ពី ៥លានរៀល ទៅដល់ ២០លានរៀល ដោយពុំទាន់គិតពីទោសព្រហ្មទណ្ឌផ្សេងៗទៀតឡើយ។
សូមរំរឮកថា យុទ្ធនាការឃោសនាបោះឆ្នោត ជ្រើសតាំងតំណាងរាស្ដ្រនីតិកាលទី ០៦ ឆ្នាំ២០១៨នេះ មានរយៈពេល ២១ថ្ងៃ ដោយចាប់ផ្ដើមពីថ្ងៃទី០៧ ដល់ថ្ងៃទី២៧ ខែកក្កដា ឆ្នាំ២០១៨។ គណបក្សនយោបាយដែលចូលរួមឈរឈ្មោះ ដណ្ដើមអាសនៈសភា អាណត្ដិទី០៦ នេះ មាន ២០គណបក្ស៕
