បន្ទាប់ពីចាប់ខ្លួន អតីតនាយករដ្ឋមន្ត្រីណាជីពយកទៅ ឃុំខ្លួន ដើម្បីកាត់ទោសក្នុងសំណុំរឿងពុករលួយ ដែលមេដឹកនាំរូបនេះ ត្រូវបានចោទ ថាមានលុយ រាប់លានដុល្លារ បានមកពីការកឹបកេង ទ្រព្យសម្បត្តិជាតិ លោក មហាធា នាយករដ្ឋមន្ត្រីវ័យ៩៣ ដែលទំនងមានម្នាក់គត់ នៅលើពិភពលោក បាន ប្រកាសអោយ គណៈរដ្ឋមន្ត្រីរបស់លោកជាមន្ត្រីសា្អតស្អំ កុំទទួលប្រាក់សំណូក និងកុំប្រព្រឹត្តអំពើពុករលួយ។
តើអាចទៅរួចទេ? លោក រឿន ឬទី្ធ ជូនសេចក្ដីប្រែសម្រួល !
នៅអំឡុងពេលឃោសនាបោះឆ្នោតសភា កាលពីថ្ងៃទី ៩ឧសភា បណ្ឌិតមហាធាមហាម៉ាត អ្នកនយោបាយជើងចាស់នៃរាជាណាចក្រម៉ាឡេស៊ីដែលធ្លាប់កាន់តំណែងនាយករដ្ឋមន្ត្រី ២២ឆ្នាំ បានសន្យានៅចំពោះមុខអ្នកគាំទ្រលោកថា បើលោកឈ្នះនាយករដ្ឋមន្ត្រីណាជីពរ៉ាហ្សាក់ គឺលោកនឹងសុំដីកាពីរដ្ឋអាជ្ញាធរដើម្បីចាប់ខ្លួនណាជីព មកធ្វើការជំនុំជម្រះក្ដី ក្នុងសំណុំរឿងពុករលួយនូវមូលនិធិ ៦៨១លានដុល្លារពាក់ព័ន្ធការលួចលុយជាតិ។
ភ្លាមៗបន្ទាប់ពីចូលកាន់តំណែងបានមិនដល់មួយសប្ដាហ៍ ស្រាប់តែបណ្ដឹងប្ដឹងអតីតនាយករដ្ឋមន្ត្រីណាជីពបានធ្លាក់ដល់ការិយាល័យរដ្ឋអាជ្ញា ហើយក៏បានឈានដល់ការកោះហៅ និងចាប់ខ្លួនលោកណាជីពឡើងតុលាការ ហើយឃុំខ្លួនលោកមកដល់ពេលនេះ។
លោកមហាធាបាននិយាយថា លោកណាជីព គឺជាមេដឹកនាំអាក្រក់ជាងគេ បើធៀបនឹងមេដឹកនាំជាច្រើនជំនាន់មកនេះ។
លោកថា រដ្ឋអាជ្ញាបានបានកសាងសំណុំរឿងប្រឆាំងលោកណាជីពបានយ៉ាងរឹងមាំដោយសារតែមានភ័ស្តុតាងគ្រប់គ្រាន់។
បើតាមច្បាប់របស់ប្រទេសម៉ាឡេស៊ីលោកណាជីពនឹងមានទោសយ៉ាងតិច ២០ឆ្នាំ។
ក្នុងសំណុំរឿងនេះរដ្ឋមន្ត្រីរបស់លោកណាជីពយ៉ាងតិច ៣រូប រួមទាំងភរិយានិង កូនប្រសារបស់លោកក៏ស្ថិតក្នុងការស៊ើបអង្កេតដែរ។
គណៈរដ្ឋមន្ត្រីរបស់មហាធាគឺជាមន្ត្រីស្អាតស្អំ
ក្នុងកិច្ចប្រជុំគណៈរដ្ឋមន្ត្រីការពីកាលពីថ្ងៃ អង្គារ ទី ១០កក្កដា ដែលផ្ដោតលើគំរោងអភិវឌ្ឍន៍មួយចំនួនពាក់ព័ន្ធនឹងក្រុមហ៊ុនចិនលោកមហាធាក្នុងនាមជានាយករដ្ឋមន្ត្រីបានដាក់ចុះគោលនយោបាយមួយអោយសមាជិកគណៈរដ្ឋមន្ត្រីរបស់លោកគោរព និងអនុវត្តអោយបានម៉ឺងម៉ាត់ គឺ ត្រូវជាមន្ត្រីស្អាតស្អំដោយមិនទទួលប្រាក់សំណូកឬ មិនសូកប៉ាន់គេឡើយ។ លោកថា ទោះជាអំណោយជាស្បៀង ឬបាច់ផ្កាក៏ដោយ គឺសុទ្ធតែជាការ ទាញអារម្មណ៍ទៅរកការប្រព្រឹត្តអ្វីមួយ មិនសមរម្យ ។ លោកសុំអោយមន្ត្រីរបស់លោកទទួលយកគោលការណ៍ទៅអនុវត្តអោយមានប្រសិទ្ធភាព។
តាមសារព័ត៌មាន The Straits Times លោកមហាធាបានបញ្ជាក់បន្ថែមដូចនេះថា៖«យើងមានលទ្ធភាពធ្វើអ្វីៗបានគ្រប់យ៉ាង ។ តែយើងកុំភ្លេច គឺយើងនៅក្រោមច្បាប់។ច្បាប់ជាអ្នកត្រួសត្រាយផ្លូវអោយយើងដើរ ។យើងត្រូវមើលរំលងអំពើពុករលួយ ទើ់បយើ់ងបោសសអំអាត វាបានពីប្រទេសយើង»។
លោកថា ខ្លួនលោកនិងគ្រួសារលោកត្រូវធ្វើគំរូវមុនគេ ហើយសមាជិកសភាក៏ត្រូវប្រកាសទ្រព្យសម្បត្តិដែរ។
លោកបន្តថា អំពើពុករលួយជាដើមហេតុនៃអំពើអយុត្តិធម៌សង្គមដែលមិនត្រូវរស់ដោយសាររឿងនេះទេ។ លោកទទូចថា រដ្ឋាភិបាល Pakatan Harapan ជារដ្ឋាភិបាលស្អាតស្អំ។ លោកបញ្ជាក់ថា បើមន្ត្រីស្អាតស្អំ ពលរដ្ឋក៏ស្អាតស្អំដែរ។
កាលពីសប្ដាហ៍មុន លោក ណាជីព អតីតនាយករដ្ឋមន្ត្រីដែលចាញ់ឆ្នោតត្រូវបានចោទប្រកាន់បីបទចោទក្នុងនោះករណីរំលោភសេចក្ដីទុកចិត្ត ករណីបំពានអំណាចរដ្ឋ និងករណីពុករលួយ។
ខណៈ លោកណាជីពកំពុងនាំខ្លួនឡើងតុលាការ រដ្ឋអាជ្ញា បានបង្ហាញភស្តុងតាងប្រាប់អ្នកសារព័ត៌មានដែលសម្ភារៈទាំងនោះមាន ទាំងខ្សែក ខ្សែដៃ កាបូបយួរ និងគ្រឿងអលង្ការជាច្រើនទៀត ដោយដាំត្បូងពេជ្រ មានតម្លៃសរុប ២៧៣លានដុល្លារ។
តែបែបនេះក្ដី ទាំងលោកណាជីព និងភរិយារបស់លោកបានបដិសេធដោយចាត់ទុកថា ជាការង្កើតរឿងទុច្ចរិតដើម្បីសងសឹកលោក។
ដោយសន្យាធ្វើអោយគណៈរដ្ឋមន្ត្រី កាន់តែស្អាតស្អំ សម្រាប់លោក មហាធា បានបញ្ជាអោយអ្នកច្បាប់ធ្វើការសិក្សាហើយធ្វើពង្រាងច្បាប់ប្រឆាំងបក្សនយោបាយណាដែលទទួលជំនួយពីក្រុមហ៊ុន និងអ្នកមាន។ លោកថា ករណីនេះ ក៏ចូលរួមកាត់បន្ថយអំពើពុករលួយដែរ។
លោក មហាធា មហាម៉ាត គឺជាមេដឹកនាំមានវ័យចាស់ជាងគេបំផុត នៅលើពិភពលោកដែលកាលពីថ្ងៃ អង្គារ ទី១០ កក្កដា ម្សិលមិញនេះ គឺជាខួបកំណើតរបស់លោកចូលវ័យ ៩៣ឆ្នាំ។ ក្នុងពិធីខួបកំណើតដែលមិនមានអ្នកផ្ដល់ជំនួយ ឬ ជូនជំនួន លោកបានថ្លែងទៅកាន់អ្នកសារព័ត៌មានថាអ្នកសារព័ត៌មាន គឺជាស្ថាប័នមានអំណាចមួយដែរ ក្នុងការជួយកាត់បន្ថយអំពើពុករលួយ៕
