ភ្នំពេញ ៖ ស្ថាបនិករបស់អង្គការតំលៃស្ដ្រី បានលើកឡើងថា អង្គការរបស់ខ្លួននឹងនៅតែបន្ដបេសកម្ម ផ្ដល់សំឡេងដែលមានសង្ឃឹមទៅដល់ស្ដ្រី ធ្វើការពេលយប់បន្ដទៀត ដោយរំពឹងថា នឹងអាចរួមចំណែកផ្ដល់ចំណេះដឹង ដល់ស្ដ្រីដែលធ្វើការពេលយប់ ឲ្យគេចផុតពីការបៀនបៀនផ្សេងៗ។
លោក លៀ ស៊ីណា រាយការណ៍ព័ត៌មាននេះ ៖
ការលើកឡើងរបស់ស្ថាបនិកអង្គការតំលៃស្ដ្រីដូចនេះ ធ្វើឡើងនៅក្នុងពិធីប្រគល់វិញ្ញាបនបត្រដល់សិស្ស “សំអាងការនិងកែសម្ផស្ស” ជំនាន់ទី ០៥ ចំនួន ០៦រូប ធ្វើឡើងនៅរាជធានីភ្នំពេញ កាលពីថ្ងៃទី២០ ខែមិថុនា។ អង្គការតំលៃស្ដ្រី បានចាប់ផ្ដើមបើកដំណើរការការិយាល័យរបស់ខ្លួនកាលពីឆ្នាំ២០១០ នៅប្រទសកម្ពុជា ក្រោមបេសកកម្ម ចង់ឃើញស្ដ្រីងាយរងគ្រោះ និងរងគ្រោះ ធ្វើការនាពេលយប់ នៅតាមក្លឹបកម្សាន្ដ និងហាងខារ៉ាអូខេ នៅក្នុងប្រទេសកម្ពុជា រស់នៅ និងធ្វើការ ដោយគេចផុតពីការកេញប្រវ័ញ្ចទាំងផ្នែកសេដ្ឋកិច្ច និងផ្លូវភេទ។
លោកស្រី សេង សុលីដា ស្ថាបនិកអង្គការតំលៃស្ដ្រី បានបញ្ជាក់ថា អង្គការរបស់លោកស្រីបានធ្វើការងារជាមួយស្ដ្រី ដែលបម្រើការងារពេលយប់យ៉ាងសកម្ម ដើម្បីអប់រំ និងណែនាំក្រុមស្ដ្រីទាំងអស់នោះ ឲ្យពួកគាត់ដឹងពីការការពារខ្លួន ពីការបៀតបៀនផ្លូវភេទ និងការរំលោភបំពានលើសិទ្ធិរបស់ពួកគាត់ផ្សេងៗ។ ក្រៅពីការបណ្ដុះបណ្ដាលផ្នែកសំអាង និងកែសម្ផស្ស អង្គការមួយនេះ ក៏បានជួយដល់ស្ដ្រីដែលធ្វើការពេលយប់ ឲ្យបានទទួលអាហាររូបករណ៍ និងផ្ដល់សម្ភារផ្សេងៗ ទៅដល់ស្ដ្រី ចាប់ពីអាយុពី ១៦ ទៅ ៣០ឆ្នាំ ដែលគាត់មានប្រវត្ដិធ្វើការពេលយប់ ។
ស្ថាបនិកអង្គការតំលៃស្ដ្រី បន្ដទៀតថា ស្ដ្រីភាគច្រើនត្រូវទៅធ្វើការងារពេលយប់ ព្រោះតែគ្មានជម្រើសដែលប្រសើរជាងនេះ ហើយពួកគាត់ក៏តែងតែត្រូវក្រុមបុរសមួយចំនួនធំ បៀតបៀនផ្លូវភេទជាញឹកញាប់ផងដែរ។ ព្រោះតែការមើលឃើញ ពីទុក្ខលំបាករបស់ស្ដ្រី ទីទាល់ក្រ ដែលជ្រើសយកជម្រើសការងារពេលយប់ដូច្នេះ ទើបអង្គការ គ្រិស្ដបរិស័ទមួយនេះ រៀបចំកម្មវិធីជួយស្ដ្រីទាំងនោះ ៖«យើងឈោងចាប់ និងជួយទៅដល់ស្ដ្រីបងប្អូនស្ដ្រី ដែលគាត់មិនមានជម្រើសប្រសើរ ហើយគាត់ជ្រើសរើស ធ្វើការនៅពេលយប់ នៅតាមខារ៉ាអូខេ និងតាមបៀរការឌិន»។
អង្គការតំលៃស្ដ្រី បានបញ្ជូនក្រុមការងាររបស់ខ្លួនទៅជួបក្រុមស្ដ្រី ដែលបម្រើការងារនៅពេលយប់ទាំងនោះ ទាំងនៅកន្លែងពួកគេធ្វើការ និងនៅផ្ទះរបស់ពួកគេផ្ទាល់។ មានស្ដ្រីយ៉ាងតិចណាស់ជាង ២០នាក់ ក្នុងមួយឆ្នាំៗ ដែលអង្គការនេះ បានទទួលយក ទៅបណ្ដុះបណ្ដាលលើជំនាញនានា។ អង្គការតំលៃស្ដ្រី ក៏ជួយផងដែរទៅដល់កូនតូចៗរបស់ស្ដ្រី បម្រើការងារពេលយប់ដើម្បីឲ្យក្មេងៗទាំងអស់នោះមានឱកាសបានចូលរៀល ៖«យើងជួយទៅដល់ក្មេងៗទាំងអស់នោះ នៅក្នុងសហគមន៍ឲ្យគាត់បានបកទៅរៀននៅសាលារដ្ឋវិញ ឬក៏សាលាឯកជន អញ្ចឹងអង្គការតំលៃស្ដ្រីផ្ដល់នូវអាហាររូបករណ៍ដល់ពួកគាត់»។
ស្ថាបនិកអង្គការតំលៃស្ដ្រី បញ្ជាក់ទៀតថា រយៈពេលប៉ុន្មានឆ្នាំមកនេះអង្គការរបស់លោកស្រី បានជួយស្ដ្រីធ្វើការពេលយប់ឲ្យទទួលបានចំណេះជំនាញចំនួន ១៣៧នាក់។ បើទោះជាចំនួននេះនៅតិចតូចនៅឡើយក៏ពិតមែន ក៏ប៉ុន្ដែលោកស្រី សេង សុលីដា សង្កត់ធ្ងន់ថា ការចូលរួមជួយស្ដ្រីរងគ្រោះបានតិច ធ្វើយូរទៅនឹងបានកាន់តែច្រើន និងមួយវិញទៀតការបានធ្វើសកម្មភាព ប្រសើរជាងការមិនបានធ្វើអ្វីសោះ។ ស្ថាបនិករូបនេះ រំពឹងថា តទៅថ្ងៃមុខអង្គការរបស់លោកស្រី នឹងអាចជួយដល់ស្ដ្រី ដែលធ្វើការពេលយប់បានកាន់តែច្រើនបន្ថែមទៀត តាមរយៈការគាំទ្ររបស់អង្គការជាដៃគូនានា ដោយផ្ដល់ជាមុខរបរថ្មី ប្រសើរជាងការធ្វើការងារនៅក្នុង កន្លែងកម្សាន្ដ បៀកាឌិន ឬក៏ហាងខារ៉ាអូខេជាដើម៕
