នៅពាក់កណ្ដាលខែកញ្ញាកន្លងមកនេះ លោកកឹម សុខា បានប្រាប់អ្នកគាំទ្រថា បើចង់ឲ្យគណបក្សសង្គ្រោះជាតិដោះស្រាយបញ្ហាជាតិធំៗបាន លុះត្រាតែគណបក្សនេះឈ្នះឆ្នោត។ ប៉ុន្តែលោកនាយករដ្ឋមន្ត្រីបានព្រមានជារឿយៗថា បើគណបក្សសង្គ្រោះជាតិឈ្នះឆ្នោតអាចនឹងមានសង្គ្រាម ហើយលោកនាយករដ្ឋមន្ត្រីបានបញ្ជាក់ជាថ្មីថា សង្គ្រាមនោះ អាចជាសង្គ្រាមវណ្ណៈ និងសង្គ្រាមជាមួយប្រទេសជិតខាង។ យ៉ាងនេះក្ដី លោកសម រង្ស៊ីបានបញ្ជាក់ជំហររបស់គណបក្សសង្គ្រោះជាតិឡើងវិញថា គណបក្សនេះមិនយកពលរដ្ឋខ្មែរណាជាសត្រូវ ហើយក៏មិនដោះស្រាយបញ្ហាព្រំដែនជាមួយប្រទេសជិតខាង ដោយការធ្វើសង្គ្រាមដែរ។ លោកសម រង្ស៊ីចាត់ទុកប្រសាសន៍របស់លោកនាយករដ្ឋមន្ត្រីថាជាការបំផិតបំភ័យរាស្ត្រ។
ប្រធានគណបក្សសង្គ្រោះជាតិ បានលើកឡើងថា អ្នកដែលនិយាយថា បើគណបក្សសង្គ្រោះជាតិឈ្នះឆ្នោតនឹងមានសង្គ្រាម គឺជាការកុហកបោកប្រាស់ បំភ្លៃ និងបំភិតបំភ័យប្រជារាស្ត្រ។
លោកសម រង្ស៊ី បានថ្លែងក្នុងវេទិកាជួបជាមួយអ្នកគាំទ្រគណបក្សសង្គ្រោះជាតិនៅស្រុកបាធាយ ខេត្តកំពង់ចាម កាលពីថ្ងៃទី២៦ ខែកញ្ញាថា ជាគោលការណ៍របស់គណបក្សសង្គ្រោះជាតិ គឺមិនចាត់ទុកពលរដ្ឋខ្មែរណាជាសត្រូវទេ ហើយក៏មិនធ្វើសង្គ្រាមជាមួយប្រទេសជិតខាងក្នុងការដោះស្រាយបញ្ហាព្រំដែនដែរ ប៉ុន្តែនឹងដោះស្រាយបញ្ហាព្រំដែនដោយប្រើយន្តការអន្តរជាតិ «បើយើងអត់មានចាត់ទុកនរណាជាសត្រូវ យើងអត់មានសត្រូវ បើអត់មានសត្រូវ ក៏មិនអាចមានសង្គ្រាមដែរបងប្អូន ។ មិនអញ្ចឹង! ទៅធ្វើសង្គ្រាមជាមួយអ្នកបើអត់មានសត្រូវ។ ទី២ គេថា សង្គ្រាមជាមួយប្រទេសជិតខាង ពីព្រោះថា យើងទៅទាមទារទឹកដី ចង់ឲ្យមើលបន្ទាត់ព្រំដែនឲ្យបានត្រឹមត្រូវឡើងវិញ។ យើងត្រូវតែទាមទារ ទឹកដីដែលបាត់បង់យូរឆ្នាំណាស់មកហើយ តែដប់ឆ្នាំ ម្ភៃឆ្នាំចុងក្រោយនេះ កន្លែងណាដែលបាត់បង់ យើងត្រូវតែទាមទារមកវិញ ។ ប៉ុន្តែទាមទារដោយសន្តិវិធី អត់មានច្បាំងទេ អត់មានសង្គ្រាមទេ អ្នកណានិយាយអញ្ចឹង និយាយបំភ្លើស ភូត កុហក មួលបង្កាច់ បំភ័យប្រជារាស្ត្រ»។
សូមជម្រាបថា កាលពីថ្ងៃទី២២ ខែកញ្ញា ឆ្នាំ២០១៥ កន្លងមកនេះ ក្នុងសន្និបាតបូកសរុបចលនាប្រឡងប្រណាំងរមណីយដ្ឋានស្អាត សេវាល្អ ឆ្នាំ២០១៤ ដែលធ្វើឡើងសណ្ឋាគារសុខាក្នុងរាជធានីភ្នំពេញ លោកនាយករដ្ឋមន្ត្រីហ៊ុន សែន បានថ្លែងសំដៅទៅគណបក្សប្រឆាំងថា បើគណបក្សនោះឈ្នះឆ្នោតនឹងនាំឲ្យមានសង្គ្រាម។ លោកនាយករដ្ឋមន្ត្រីបញ្ជាក់ថា សង្គ្រាមដែលលោកនិយាយនោះ គឺអាចជាសង្គ្រាមវណ្ណៈរវាងអ្នកមាន និងអ្នកក្រ និងអាចជាសង្គ្រាមជាមួយប្រទេសជិតខាង ករណីដែលគណបក្សប្រឆាំងទាមទារសើរើរឿងព្រំដែន «ម្ង៉ៃៗឃើញតែដើរទៅ ទាល់តែបោះឆ្នោតឲ្យគេបានវាដោះស្រាយនេះ ដោះស្រាយនោះ ក៏ប៉ុន្តែខ្ញុំសូមហ៊ាននិយាយ អស់លោកនៅទីនេះសុទ្ធតែជាសត្រូវរបស់ពួកគេ។ អញ្ចឹងតើអាហ្នឹងសុខទេ អាហ្នឹង? នែ៎ក! អស់លោកអ្នកឧកញ៉ាទាំងឡាយសុទ្ធតែជាសត្រូវវណ្ណៈណា៎! គេនឹងរឹបអូសអាអូតែលហ្នឹងឲ្យទៅអ្នកក្រ អញ្ចឹងតើវាសុខទេ? ដែលខ្ញុំនិយាយថាវានឹងកើតសង្គ្រាមមិនមែនគ្មានហេតុផលទេ ព្រោះដោយសារចំណុចពីរដែលត្រូវលើកយកមកនិយាយ។ ចំណុចទី១ គឺចាត់ទុកអ្នកមានជាសត្រូវរបស់គេទៅហើយ ចំណុចទី២ យកប្រទេសជិតខាងជាសត្រូវទៅហើយ អញ្ចឹងរឿងអីមិនកើតសង្គ្រាម? អញ្ចឹងទេ ចំណុចនេះ ជាចំណុចដែលត្រូវគិត!»។
សូមរំឭកថា ភ្លាមៗក្រោយការថ្លែងរបស់លោកនាយករដ្ឋមន្ត្រីនៅពេលនោះ មន្ត្រីសង្គមស៊ីវិល និងអ្នកវិភាគបានចាត់ទុកថា ជាការបំភិតបំភ័យប្រជាពលរដ្ឋ។ អ្នកវិទ្យាសាស្ត្រនយោបាយថា ក្នុងសង្គមទំនើបនេះ សង្គ្រាមវណ្ណៈមិនអាចកើតឡើងទេ ព្រោះប្រទេសនីមួយៗមានច្បាប់រដ្ឋធម្មនុញ្ញជាគោល គណបក្សនយោបាយដែលឈ្នះឆ្នោតថ្មី មិនអាចធ្វើអ្វីរំលោភលើរដ្ឋធម្មនុញ្ញបានឡើយ។ ចំណែកឯបញ្ហាសង្គ្រាមជាមួយប្រទេសជិតខាងវិញ ក៏ពិបាកនឹងកើតឡើងដែរ ព្រោះគេត្រូវប្រើយន្តការអន្តរជាតិ ដូចករណីកម្ពុជា និងថៃកន្លងមក គេបានប្រើយន្តការតុលាការក្រុងឡាអេ ហើយករណីព្រំដែនកម្ពុជា វៀតណាម ដែលកំពុងកើតឡើងនេះ ក៏គេអាចប្រើយន្តការអាស៊ាន និងអង្គការសហប្រជាជាតិដើម្បីដោះស្រាយបានដែរ។
សូមរំឭកផងដែរថា ក្នុងពេលកន្លងមក មេដឹកនាំគណបក្សសង្គ្រោះជាតិបានថ្លែងប្រាប់ដល់អ្នកគាំទ្រ ក៏ដូចជាប្រជាពលរដ្ឋទូទៅថា ដើម្បីឲ្យគណបក្សសង្គ្រោះជាតិអាចដោះស្រាយបញ្ហាជាតិធំៗ ដូចជាបញ្ហាបូរណភាពទឹកដីជាមួយប្រទេសជិតខាងជាដើម លុះណាតែគណបក្សនេះឈ្នះការបោះឆ្នោតជាតិ៕
