ភ្នំពេញ ៖ បេឡាជាតិរបបសន្ដិសុខសង្គម ហៅកាត់ថា ប.ស.ស នៅថ្ងៃទី២៣ ខែមិថុនា នេះបានសេចក្ដីប្រកាសព័ត៌មាន ស្ដីពីឧបទ្ទវហេតុគ្រោះថ្នាក់ចរាចរណ៍ របស់បុគ្គលិកអង្គការសង្គ្រោះកុមារ ដែលបង្កឲ្យមានអ្នករងរបួសធ្ងន់ និងរបួសស្រាល ហើយបានបណ្ដាលបុគ្គលិកចំនួន ០៣នាក់របស់អង្គការនេះបាត់បង់ជីវិត។ ក្នុងសេចក្ដីប្រកាសព័ត៌មាននេះ ប.ស.ស ក៏បង្ហាញក្ដីសោកស្ដាយជាខ្លាំងផងដែរ។
កាលពីរសៀលម៉ោង ១៥ និង ៣០នាទី ថ្ងៃទី២២ ខែមិថុនា ឆ្នាំ២០១៨ ម្សិលមិញ មានឧបទ្ទវហេតុគ្រោះថ្នាក់ចរាចរណ៍ រថយន្ដទេសចរណ៍ដឹកបុគ្គលិកអង្គការសង្គ្រោះកុមារ មួយបានកើតឡើង ស្ថិតនៅក្នុងភូមិ កំសី ឃុំ ញ៉ែងញ៉ង ស្រុក ត្រាំកក់ ខេត្ដតាកែវ។ គ្រោះថ្នាក់ចរាចរណ៍នេះបានកើតឡើង ដោយសារតែអ្នកបើករថយន្ដបានបើកក្នុងស្ថានភាពងងុយ ហើយក៏បណ្ដាលឲ្យរេចង្កួតធ្លាក់ពីផ្លូវទៅបុកដើមស្វាយពេញទំហឹង។ ក្នុងរថយន្ដមានមនុស្សទាំងអស់ចំនួន ១៥នាក់។ គ្រោះថ្នាក់ចរាចរណ៍នេះ បានបណ្ដាលឲ្យបុគ្គលិកអង្គការសង្គ្រោះកុមារ ០៣នាក់ស្លាប់បាត់បង់ជីវិត ។ អ្នកស្លាប់ទាំងបីនាក់នេះ មានស្ដ្រីពីរនាក់ ម្នាក់ជាជនជាតិខ្មែរ និងម្នាក់ទៀតជាជនជាតិអូស្ដ្រាលី។ ចំណែកបុគ្គលិករបស់អង្គការសង្គ្រោះកុមារចំនួន ១១នាក់ផ្សេងទៀត មាន ៤នាក់រងរបួសស្រាល និង ៧នាក់រងរបួសធ្ងន់។
គិតមកដល់ថ្ងៃទី២៣ មិថុនានេះ បុគ្គលិករបស់អង្គការសង្គ្រោះកុមារ ទាំង ១១នាក់ ត្រូវបានអង្គភាពរបស់ពួកគាត់បញ្ជូនទៅសម្រាកព្យាបាលនៅមន្ទីរពេទ្យរ៉ូយ៉ាល់ភ្នំពេញ។
បេឡាជាតិរបបសន្ដិសុខសង្គម តាមរយៈសេចក្ដីប្រាកាសព័ត៌មាននេះ ក៏បានបង្ហាញពីទុក្ខក្រៀមក្រំ និងសោកស្ដាយជាខ្លាំង សម្រាប់ការបាត់បង់ជីវិតអ្នកទាំងបីរូបនេះ។ ជាមួយគ្នានេះ ប.ស.ស ក៏បានបញ្ជាក់ដែរថា បេឡាជាតិរបបសន្ដិសុខសង្គម នឹងបន្ដជួយដោះស្រាយទុក្ខលំបាករបស់ជនរងគ្រោះ និងក្រុមគ្រួសារទៅតាមគោលការណ៍របបសន្ដិសុខសង្គម របស់បេឡាជាតិរបបសន្ដិសុខសង្គម។
សូមជម្រាបថា អង្គការ សង្គ្រោះកុមារ បានចុះបញ្ជីកម្មករ និយោជិត ដែលបម្រើការក្នុងអង្គភាពរបស់ខ្លួន ក្នុងបេឡាជាតិរបបសន្ដិសុខសង្គម មានចំនួន ១៨៦នាក់ ហើយមាន ៧៥នាក់ជាស្ដ្រី បុគ្គលទាំងអស់របស់អង្គការសង្គ្រោះកុមារគឺជាជនជាតិខ្មែរ៕
