ភ្នំពេញ ៖ យ៉ាងតិចមានកម្មករ កម្មការិនី ចំនួន ២៥នាក់បានសន្លប់ជាបន្ដបន្ទាប់ បណ្ដាលមកពីការភិតភ័យ ខណៈរោងចក្របានដាច់ភ្លើង និងមានសំឡងប្រកាសអាសន្ន។ នេះបើយោងតាមការឲ្យពីបេឡាជាតិរបបសន្ដិសុខសង្គមដែលផ្សព្វផ្សាយលើបណ្ដាញសង្គមនៅថ្ងៃទី២៣ ខែមិថុនានេះ។
ហេតុការណ៍នេះបានកើតឡើងនៅរោងចក្រ News Focus Apparel (Cambodia) Co.,Ltd ស្ថិតក្នុងស្រុកអង្គស្នួល ខេត្ដកណ្ដាល នៅម៉ោងជិត ៩ ព្រឹក។ រោងចក្រនេះមានកម្មករ សរុបចំនួន ៦០០នាក់។ តាមការបញ្ជាក់របស់បេឡាជាតិរបបសន្ដិសុខសង្គមបញ្ជាក់ថា មូលហេតុដែលនាំឲ្យកម្មករ កម្មការិនី ដួលសន្លប់នេះ ដោយសារតែរោងចក្រដាច់ចរន្ដអគ្គិសនី ហើយរោងចក្រនោះបានបញ្ឆេះម៉ាស៊ីន ក៏ប៉ុន្ដែម៉ាស៊ីនភ្លើង មិនអាចផ្ដល់ថាមពលគ្រប់គ្រាន់ក៏បណ្ដាលអំពូលដាច់ និងមានសំឡេងសារ៉ែនប្រកាសអាសន្នរោទ៍ ទើបបណ្ដាលឲ្យកម្មករ ភ័យស្លន់ស្លោដួលសន្លប់បន្ដបន្ទាប់គ្នាដូច្នេះ។
ក្រោយមានហេតុការណ៍នេះ មន្ដ្រី ប.ស.ស និងមន្ដ្រីរបស់ក្រសួងការងារ រួមជាមួយអាជ្ញាធរបានបញ្ជូនពួកគេទៅកាន់
មន្ទីរពេទ្យ។ ជាមួយគ្នានេះ ខាងភាគីរោងចក្របានសម្រេចអនុញ្ញាតឲ្យកម្មករឈប់សម្រាកចំនួន ០១ថ្ងៃ៕
