ភ្នំពេញ ៖ ថ្ងៃទី១៦ ខែមិថុនា ឆ្នាំ២០១៨ គឺជាទិវាពលកម្មតាមផ្ទះអន្ដរជាតិ ខួបលើកទី០៧ ក្នុងឱកាសនៃទិវានេះ ប្រធានបណ្ដាញអ្នកធ្វើការងារតាមផ្ទះកម្ពុជា ទទូចឲ្យម្ចាស់ផ្ទះទាំងអស់ គោរពសិទ្ធិ និងលក្ខខណ្ឌការងារ សម្រាប់ស្ដ្រីបម្រើការងារតាមផ្ទះ។
លោក លៀ ស៊ីណា ជូនសេចក្ដីរាយការណ៍ ៖
រហូតមកដល់ដើមឆ្នាំ ២០១៨ បណ្ដាញអ្នកធ្វើការងារតាមផ្ទះកម្ពុជា នៅតែមើលឃើញថា កម្មករ បម្រើការងារតាមផ្ទះ ដែលលើសលប់ជាស្ដ្រី ពួកគេនៅតែទទួលរងការរំលោភសិទ្ធិការងារ ការមាក់ងាយ ការប្រើពាក្យសម្ដីអសុរ ពីក្រុមម្ចាស់ផ្ទះមួយចំនួននៅឡើយ។ បើទោះជាការប្រមាថ មើលងាយ លើក្រុមកម្មករ បម្រើតាមផ្ទះបានថយចុះខ្លះក្ដី តែបណ្ដាអ្នកធ្វើការងារតាមផ្ទះកម្ពុជា ចង់ឃើញទង្វើមិនល្អទាំងនោះ ត្រូវលុបបំបាត់ចោលទាំងស្រុង។
លោកស្រី វុន សម្ផស្ស ប្រធានបណ្ដាញអ្នកធ្វើការងារតាមផ្ទះកម្ពុជា បានប្រាប់វិទ្យុស្ដ្រី នៅថ្ងៃចន្ទ ទី១៨ ខែមិថុនា នេះថា ម្ចាស់ផ្ទះមួយចំនួននៅតែបំពានលើសិទ្ធិកម្មករ បម្រើការងារតាមផ្ទះ ទៅតាមរូបភាពផ្សេងៗ ដែលមានជាអាទិ៍ ការប្រើកម្មករ ឲ្យធ្វើការងារលើសម៉ោង គ្មានថ្ងៃឈប់សម្រាក ការផ្ដល់ប្រាក់ខែតិច និង ការប្រើពាក្យសម្ដី ជេរ ប្រមាថ ជាដើម ៖«សម្រាប់ខ្ញុំ ខ្ញុំមើលឃើញថា សិទ្ធិអ្នកធ្វើការងារតាមផ្ទះ និងកម្មករ ធ្វើការតាមផ្ទះមួយចំនួន នៅតែមានការរំលោភបំពាន អត់ទាន់មានអីប្រសើរឡើងនៅឡើយទេ»។
ក្រុមកម្មករ បម្រើការងារតាមផ្ទះពួកគេតែងតែទទួលរងអំពើហិង្សាពីម្ចាស់ផ្ទះផ្លូវចិត្ដ ទន្ទឹមនិងពួកគាត់ត្រូវបានក្រុមថៅមួយចំនួន រំលោភសិទ្ធិការងារជារៀងរាល់ថ្ងៃ។ លោកស្រី សម្ផស្ស សង្កត់ធ្ងន់ថា កម្មករ បម្រើតាមផ្ទះស្ទើរតែទាំងអស់ដែលធ្វើការឲ្យថៅកែជាជនជាតិខ្មែរ ពួកគាត់គ្មានថ្ងៃឈប់សម្រាក និងថ្ងៃបុណ្យនោះទេ។ ជាងនេះប្រាក់ខែរបស់ក្រុមកម្មករ ធ្វើការតាមផ្ទះបានចន្លោះត្រឹមតែពី ៨០ ដុល្លារ ទៅ ១២០ដុល្លារតែប៉ុណ្ណោះ។ យ៉ាងណាប្រធានបណ្ដាញអ្នកធ្វើការងារតាមផ្ទះកម្ពុជារូបនេះ ទទូលឲ្យក្រុមម្ចាស់ផ្ទះ ផ្ដល់តម្លៃដល់កម្មករ ធ្វើការក្នុងផ្ទះខ្លួន ដោយបញ្ឈប់ការជេរ ប្រមាថជាបន្ដទៀត ៖«យើងចង់មើលឃើញថា ម្ចាស់ផ្ទះនៅប្រទេសកម្ពុជាទាំងអស់ហ្នឹង យ៉ាងហោចណាស់បើមិនស្រឡាញ់យើងដូចបង ដូចប្អូន ប៉ុន្ដែគោរពយើងក្នុងភាពជាមនុស្ស។ ព្រោះអីពួកខ្ញុំទៅធ្វើការយកកម្លាំងទៅដូរយកប្រាក់ខែ»។
កាលពីថ្ងៃទី២៣ ខែឧសភា សម្ដេចនាយករដ្ឋមន្ដ្រី ហ៊ុន សែន ប្រមុខដឹកនាំរាជរដ្ឋាភិបាលកម្ពុជា មានប្រសាសន៍បង្ហាញអារម្មណ៍ អាណិតអាសូរ ដល់កម្មករមប្រើការងារតាមផ្ទះ ដោយសម្ដេចថា កម្មករ ធ្វើការងារតាមផ្ទះ ពិតជាហត់ខ្លាំង ក្នុងកិច្ចការងារប្រចាំថ្ងៃរបស់ពួកគេ។ ពួកគេទាំងអស់នោះគ្មានថ្ងៃបុណ្យ គ្មានថ្ងៃឈប់សម្រាកប្រចាំខែ ដូចកម្មករ បម្រើក្នុងវិស័យការងារផ្សេងៗនោះទេ។ ត្រង់ចំណុចនេះ សម្ដេច ហ៊ុន សែន បានអំពាវនាវ ឲ្យក្រុមម្ចាស់ផ្ទះដែលមានអ្នកបម្រើក្នុងផ្ទះ ត្រូវគិតគូរ និងយកចិត្ដទុកឲ្យបានច្រើនចំពោះពួកគេ ពិសេសគួរតែផ្ដល់ថ្ងៃឈប់សម្រាក នឹងផ្ដល់ប្រាក់ឈ្នួលឲ្យបានខ្ពស់។
រំលងជាងមួយសប្ដាហ៍ ក្រោយការអំពាវនាវនេះ រដ្ឋមន្ដ្រីក្រសួងការងារកម្ពុជា លោក អ៊ិត សំហេង បានរៀបចំសិក្ខាសាលាពិគ្រោះយោបល់លើសេចក្ដីព្រាងច្បាប់ស្ដីពីរបបសន្ដិសុខសង្គម។ សេចក្ដីព្រាងច្បាប់នេះ ក្រោយចេញជារូបរាង នឹងមានវិសាលភាពអនុវត្ដចំពោះបុគ្គលដែលស្ថិតក្នុងវិស័យសាធារណៈ ជនទាំងឡាយណាដែលស្ថិតនៅក្រោមបទប្បញ្ញត្ដិ នៃច្បាប់ស្ដីពីការងារ ដោយរួមបញ្ចូលបុគ្គលិកធ្វើការងារតាមផ្លូវអាកាស នាវាសមុទ្រ និងអ្នកបម្រើការងារតាមផ្ទះផងដែរ។
ទាក់ទិនសកម្មភាពទាំងអស់នេះ លោកស្រី សម្ផស្ស បង្ហាញអារម្មណ៍ត្រេកអរ តែលោកស្រីបញ្ជាក់ថា លោកស្រីមិនទាន់ដឹងថា ទំហំនិងវិសាលភាពនៃប្រកាសនេះ អាចអនុវត្ដបានកម្រិតណានោះទេ។ ប៉ុន្ដែយ៉ាងហោចណាស់ ក៏ជាការប្រសើរជាងកាលពីឆ្នាំមុនដែរ។
ប្រធានបណ្ដាញអ្នកធ្វើការងារតាមផ្ទះកម្ពុជារូបនេះ អំពាវនាវដល់ក្រុម្ចាស់ផ្ទះ បញ្ឈប់ការជេរប្រមាថ កម្មករ បម្រើតាមផ្ទះជាបន្ដទៀត ព្រោះទង្វើទាំងអស់នោះគឺជាអំពើខុសច្បាប់។ ជាងនេះលោកស្រី សង្កត់ធ្ងន់ថា ម្ចាស់ផ្ទះគ្រប់រូបគួរមើលឃើញពីគុណតម្លៃ នៃការខិតខំបំពេញការងារ របស់អ្នកធ្វើការងារតាមផ្ទះ ជាជាងការយកកំហឹងពីខាងក្រៅមកបញ្ចេញដាក់ពួកគាត់ ៕
