ភ្នំពេញ ៖ ក្រសួងធនធានទឹក ប្រាប់ឲ្យប្រជាពលរដ្ឋរស់នៅតំបន់សមុទ្រ ត្រូវមានការប្រុងប្រយ័ត្ន ហើយសកម្មភាពផ្សេងៗនៅលើផ្ទៃសមុទ្រ គួរផ្អាកជាបណ្ដោះអាសន្នចាប់ពីថ្ងៃទី១៨ ដល់ថ្ងៃទី២៤ ខែមិថុនា ព្រោះកម្ពុជាកំពុងរងឥទ្ធិពលខ្យល់មូសុងនិរតីខ្លាំង។ នេះបើយោងតាមសេចក្ដីជូនដំណឹង ស្ដីពីការព្យាករណ៍អាកាសធាតុរបស់ក្រសួងធនធានទឹក ផ្សព្វផ្សាយកាលពីថ្ងៃទី១៧ ខែមិថុនា។
សេចក្ដីជូនដំណឹងនេះបានបញ្ជាក់ថា កម្លាំងខ្យល់មូសុងនេះ នឹងមានឥទ្ធិពលខ្លាំងមកលើព្រះរាជាណាចក្រកម្ពុជា នៅតំបន់សមុទ្រ ដែលវានឹងបង្កឲ្យខេត្ដនៅជាប់និងសមុទ្រទាំងអស់ មានភ្លៀងធ្លាក់ជាបន្ដបន្ទាប់ ក្នុងបរិមាណច្រើន និងជាពិសេសឥទិ្ធពលរបស់ខ្យល់មូលសុងនេះ ក៏នឹងបង្កឲ្យមានខ្យល់បក់បោកខ្លាំងនៅលើផ្ទៃសមុទ្រ បង្កើតបានជារលកខ្ពស់ៗផងដែរ។ ក្នុងរយៈពេល ៧ថ្ងៃនេះ ក្រសួងធនធានទឹក ស្នើឲ្យពលរដ្ឋដែលត្រូវចេញទៅប្រកបរបរនេសាទ និងអ្នកដំណើរតាមសមុទ្រទាំងអស់ គួរផ្អាកសកម្មភាពជាបណ្ដោះអាសន្ន។
បន្ថែមពីលើនេះ ក្រសួងធនធានទឹកក៏បានបញ្ជាក់ទៀតថា ក្រៅពីខេត្ដនៅជាប់សមុទ្រ បណ្ដារាជធានី ខេត្ដ ទាំងអស់នៅទូទាំងប្រទេស ក៏ទទួលរងឥទ្ធិពលខ្យល់មូលសុងនេះផងដែរ ដែលនឹងនាំឲ្យមានភ្លៀងធ្លាក់រាយប៉ាយជាបន្ដបន្ទាប់ក្នុងបរិមាណ ពីមធ្យមទៅបង្គួរ៕
