ភ្នំពេញ ៖ អ្នកម្នាង អ៊ុក ផល្លា កើតនៅថ្ងៃទី២៧ ខែកក្កដា ឆ្នាំ១៩៧៩ ។ គិតមកដល់ឆ្នាំនេះ អ្នកម្នាងមានអាយុ ៣៩ឆ្នាំ។ អ្នកម្នាងទទួលមរណភាព ដោយគ្រោះថ្នាក់ចរាចរណ៍កាលពីព្រឹកថ្ងៃ អាទិត្យទី១៧ ខែមិថុនា នៅលើកំណាត់ផ្លូវមួយ ក្នុងស្រុកព្រៃនប់ ខេត្តព្រះសីហនុ ដែលនៅខណៈនោះ ទាំងអ្នកម្នាង និងសម្ដេចក្រុមព្រះត្រូវទៅកាន់ទីក្រុងព្រះសីហនុ ដើម្បីជួបសំណេះសំណាលជាមួយអ្នកគាំទ្រ គណបក្សហ្វ៊ុនស៊ីនប៉ិច។
តាមសេចក្ដីរាយការណ៍ អ្នកម្នាងបានទទួលមរណភាពដោយឧបទ្ទវហេតុនេះនៅម៉ោង ១២ថ្ងៃត្រង់ ហើយសាកសពរបស់អ្នកម្នាង នឹងតម្កល់ធ្វើបុណ្យនៅក្នុងបរិវេណវត្តបទុមវតី។ នេះបើតាមការឱ្យដឹងរបស់មន្ដ្រីគណបក្សហ្វ៊ុន ស៊ីនប៉ិចដែលស្រង់សម្ដីដោយសារពត៌មានក្នុងស្រុកមួយ។
ជីវប្រវត្តិ អ្នកម្នាង គឺជាអតីតតំណាងអប្សរារបស់ប្រទេសកម្ពុជា។ អ្នកម្នាង អ៊ុក ផល្លា បានចូលហាត់រៀនរបាំបុរាណនៅសាលាភូមិន្ទវិចិត្រសិល្បៈ នៅវ័យ ៩ឆ្នាំ ហើយបានចេញសម្តែងលើកដំបូងជាសាធារណៈ ពេលចម្រើនវ័យបាន ១៣ឆ្នាំ។ អ្នកម្នាងបានបែកបាក់ពីអតីតស្វាមីមុននឹងរួមរស់ជាមួយ នឹងសម្តេចក្រុមព្រះ នរោត្តម រណឫទ្ធិ។ បច្ចុប្បន្នអ្នកម្នាងមានបុត្រ ២ ព្រះអង្គ ជាមួយសម្តេចក្រុមព្រះ គឺនរោត្តម រណវង្ស និង នរោត្តម សុធាឫទ្ធិ។ អ្នកម្នាងក៏បានឈរឈ្មោះ ជាបេក្ខជនតំណាងរាស្ត្រពេញសិទ្ធ លំដាប់លេខរៀងទី១ នៃគណបក្សហ្វ៊ុនស៊ិនប៉ិច សម្រាប់មណ្ឌលព្រៃវែង ក្នុងការបោះឆ្នោតសភាអាណត្តិទី ៦សម្រាប់ចុងខែកក្កដា ឆ្នាំ២០១៨នេះ។
តែសូមជម្រាបថាឧបទ្ទវហេតុគ្រោះថ្នាក់ចរាចរណ៍តាំងពីព្រឹកមិញនេះ គឺសម្ដេចក្រុមព្រះ ដែលយាងក្នុងរថយន្ដតែមួយជាមួយអ្នកម្នាង ក៏របួសធ្ងន់ធ្ងរដែរ។ ឥលូវនេះ ព្រះអង្គត្រូវដឹកមកព្យាបាលនៅរាជធានីភ្នំពេញ។ តែបើតាមពត៌មានខ្លះថា ព្រះអង្គនឹងត្រូវយាងទៅព្យាបាលជាបន្ទាន់ នៅទីក្រុងបាងកក ប្រទេសថៃ។ ចំពោះអ្នកម្នាង អ៊ុក ផល្លា អ្នកម្នាងធ្លាប់ជួបឧបទ្ទវហេតុម្ដងហើយ កាលពីប៉ុន្មានឆ្នាំមុននេះនៅឯខេត្តកំពង់ចាម៕
