ភ្នំពេញ៖ អ្នកនាំពាក្យបក្សកាន់អំណាចបានឆ្លើយតបដោយប្រតិកម្មជាមួយលោកប្រ៊ែដ អាដាម (Brad Adams) មន្ត្រីសិទ្ធិមនុស្សអន្តរជាតិ ដែលលើកឡើងថា ឧត្តមសេនីយជាន់ខ្ពស់កម្ពុជាជាច្រើនរូបផ្សេងទៀតកំពុងស្ថិតក្នុងបញ្ជីខ្មៅនៃការដាក់ទណ្ឌកម្មពីសំណាក់សហរដ្ឋអាមេរិក បន្ទាប់ពីលោកឧត្តមសេនីយ៍ ហ៊ីង ប៊ុនហៀង។ អ្នកនាំពាក្យបក្សកាន់អំណាចរូបនេះថា លោក ប្រ៊ែដ អាដាម តែងតែមានទម្លាប់អាក្រក់ចងគំនុំជាមួយពលរដ្ឋកម្ពុជា និងមានឧបាយកលស្មោកគ្រោកយាយីផលប្រយោជន៍ប្រជាជាតិកម្ពុជា។
លោក សុខ ឥសាន អ្នកនាំពាក្យគណបក្សប្រជាជនកម្ពុជា បានផ្តល់បទសម្ភាសន៍ខ្លីជាមួយវិទ្យុស្រ្តីនៅថ្ងៃទី១៥ មិថុនា នេះដោយប្រតិកម្មតបទៅលោកប្រ៊ែដ អាដាម (Brad Adams)នាយកប្រចាំតំបន់អាស៊ី នៃអង្គការឃ្លាំមើលសិទ្ធិមនុស្សអន្តរជាតិHuman Rights Watch ដែលបានអះអាងថា មានឧត្តមសេនីយជាន់ខ្ពស់ កម្ពុជា៧រូបទៀត ស្ថិតក្នុងបញ្ជីខ្មៅនៃការដាក់ទណ្ឌកម្ម ពីសំណាក់សហរដ្ឋអាមេរិក។
លោក សុខឥសាន្តបានហៅលោកប្រ៊ែដ អាដាម ថាជាជនអាក្រក់ ចូលចិត្តបំផ្លាញកិត្តិយសប្រទេសកម្ពុជា។
ការឆ្លើយតបរបស់លោក សុខ ឥសាន នេះគឺបន្ទាប់ពីលោកប្រ៊ែដ អាដាម បានប្រាប់វិទ្យុអាស៊ីសេរីថាឧត្តមសេនីយ កម្ពុជាជាច្រើនរូបទៀត កំពុងស្ថិតក្នុងបញ្ជីខ្មៅដែលអាចត្រូវរងទណ្ឌកម្មដូចលោកនាយឧត្តមសេនីយ៍ ហ៊ីង ប៊ុនហៀង។
លោកប្រ៊ែដ អាដាម នាយកប្រចាំតំបន់អាស៊ី នៃអង្គការ Human Rights Watch បានប្រាប់អាស៊ីសេរី ហើយត្រូវផ្សព្វផ្សាយកាលពីថ្ងៃទី១៤មិថុនានេះថា ឧត្តមសេនីយជាន់ខ្ពស់ទាំង៧រូបនេះ រួមមាន លោកប៉ុលសារឿន លោក គន់ គីម លោក សៅ សុខា លោក មាស សុភា លោក រ័ត្ន ស្រ៊ាង លោក នេត សាវឿន និងលោក ម៉ក់ ជីតូ គឺមានជាប់ពាក់ព័ន្ធការរំលោភសិទ្ធិមនុស្សធ្ងន់ធ្ងរ។
លោកប្រ៊ែដ អាដាម បន្តថាឧត្តមសេនីយជាន់ខ្ពស់ ទាំងនេះ បានយកតួនាទីជាមន្រ្តីសាធារណៈ ទៅបំរើផលប្រយោជនបក្សកាន់អំណាច ហើយធ្វើទុក្ខបុកម្នេញមនុស្សបក្សប្រឆាំង។ ជាងនេះទៀតលោកប្រ៊ែដ អាដាម បង្ហើបថាសម្តេច ហ៊ុន សែន ក៏គេចមិនផុតពីទណ្ឌកម្មនេះ នោះដែរ ព្រោះសម្តេចជាអ្នកមានអំណាចបញ្ជាផ្ទាល់លើមន្ត្រីទាំងនេះ។
កាលពីថ្ងៃអង្គារ៍ទី១២ មិថុនា ក្រសួងរតនាគារអាមេរិកបានចេញសេចក្តីប្រកាសព័ត៌មាន ដោយសម្រេចបង្កកទ្រព្យសម្បត្តិលោកនាយឧត្តមសេនីយ៍ ហ៊ីង ប៊ុនហៀង អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការដ្ឋានអង្គរក្សរបស់នាយករដ្ឋមន្ត្រី។
ជុំវិញការបង្កកទ្រព្យសម្បត្តិលោកឧត្តមសេនីយហ៊ីង ប៊ុនហៀង នេះ ស្ថាប័នធំៗមួយចំនួនរួមមាន ក្រសួងការពារជាតិកម្ពុជា មេបញ្ជាការ នាយទាហាន ពលទាហាន ក្រសួងការបរទេស និងខុទ្ទកាល័យរបស់លោកនាយករដ្ឋមន្ត្រី និងលោក ហ៊ីង ប៊ុនហៀង ផ្ទាល់បានចេញមុខថ្កោលទោសអាមេរិកព្រមៗគ្នា ដោយចាត់ទុកការសម្រេចរបស់ប្រទេសមហាអំណាចមួយនេះជាទង្វើរំលោភបំពានយ៉ាងគឃ្លើន និងល្ងង់ខ្លៅមកលើអធិបតេយ្យភាពកម្ពុជា។
ជុំវិញការបង្កកទ្រព្យសម្បត្តិលើមន្រ្តីខ្មែរធ្វើឡើងដោយក្រសួងរតនាគារសហរដ្ឋអាមេរិកនេះសម្រាប់លោក សុខ ឥសាន គឺជាទង្វើមួយធ្វើឱ្យខូចកិត្យានុភាពកម្ពុជា ប៉ុន្តែទណ្ឌកម្មនេះគ្មានប្រសិទ្ធភាពលើដែនអធិបតេយ្យភាពរបស់កម្ពុជាឡើយ។
កម្ពុជាកំពុងដើរលើផ្លូវមួយដែលក្រុមបក្សប្រឆាំង សហភាពអឺរ៉ុបនិងសហរដ្ឋអាមេរិកចាត់ទុក ដើរចេញពីគន្លប្រជាធិបតេយ្យ បន្ទាប់ពីរំលាយគណបក្សសង្រ្គោះជាតិ តែ មន្ត្រីបក្សកាន់អំណាច រួមសម្ដេចនាយករដ្ឋមន្ត្រី អះអាងថាប្រជាធិបតេយ្យនៅកម្ពុជានៅតែដើរលើផ្លូវត្រូវហើយមានប្រព័ន្ធពហុបក្សទៀតផង៕
