ភ្នំពេញ៖ រយៈពេលពេញ ១ខែក្នុងខែឧសភា ឆ្នាំ ២០១៨ នេះក្រុមប្រឹក្សាអភិវឌ្ឍន៍កម្ពុជា(CDC)បានចេញវិញ្ញាបនបត្រចុះបញ្ជីជាស្ថាពរដល់ក្រុមហ៊ុនវិនិយោគបរទេសចំនួន ៧ ក្រុមហ៊ុន ដែលមានទុនវិនិយោគសរុប ២១,១៣ លានដុល្លារ។ នេះបើយោងតាមការចេញផ្សាយព័ត៌មានរបស់ក្រុមប្រឹក្សាអភិវឌ្ឍន៍កម្ពុជានៅលើទំព័រហ្វេសប៊ុកនៅកំឡុងខែឧសភានេះ។
យោងតាមការចេញផ្សាយដោយក្រុមប្រឹក្សាអភិវឌ្ឍន៍កម្ពុជាហៅកាត់ថា CDC ការវិនិយោគក្នុងរយៈពេញមួយខែនៅក្នុងខែឧសភា ឆ្នាំ ២០១៨ នេះ ទុនវិនិយោគក្នុងការបង្កើតរោងចក្រសហគ្រាសមានទឹកប្រាក់ ២១,១៣លានដុល្លារ និងបានផ្តល់ការងារសរុបដល់កម្មករចំនួន ៥៥៤០នាក់។
យោងតាមសេចក្តីប្រកាសព័ត៌មាននៅលើទំព័រហ្វេសប៊ុករបស់ CDC គម្រោងដែលត្រូវបានអនុម័តយល់ព្រមនោះមានចំនួន ៧ក្រុមហ៊ុន រួមមាន គម្រោងបង្កើតរោងចក្រកាត់ដេរសម្លៀកបំពាក់ និងស្បែកជើងចំនួន ៣ មានទីតាំងនៅភ្នំពេញ និងខេត្តកណ្តាល និងរោងចក្រចំនួន៤ ផ្សេងទៀត គឺរោងចក្រផលិតជីវម៉ាសឥន្ធនៈ រោងចក្រផលិតប្រអប់ផ្លាស្ទិក រោងចក្រផលិតទឹកបរិសុទ្ធ និងរោងចក្រផលិតប្រដាប់ដាក់បំពុងទឹក។ រោងចក្រទាំង ៤ នេះមានទីតាំងនៅខេត្តព្រះសីហនុ ៣កន្លែង និងខេត្តបន្ទាយមានជ័យមួយកន្លែង។
សេដ្ឋកិច្ចកម្ពុជាពឹងផ្អែកភាគច្រើនបំផុតលើវិស័យកាត់ដេរ ដែលបានផ្តល់ការងារដល់ប្រជាជនជាង ៨០ម៉ឺននាក់ និងរកបានចំណូលរាប់ពាន់លានដុល្លារក្នុង ១ ឆ្នាំៗ។ វិស័យវាយនភណ្ឌ ត្រូវបានចាត់ទុកជាវិស័យស្នូរមួយដែលនាំឱ្យសេដ្ឋកិច្ចកម្ពុជាមានកំណើនក្នុងរង្វង់ ៧ %ក្នុងមួយ ចាប់ពីពាក់កណ្តាលទសវត្សរ៍ឆ្នាំ១៩៩០ ហើយអតិភរណាបន្តមានកម្រិតទាបអាចគ្រប់គ្រងបាន គួបផ្សំនឹងស្ថានភាពទូទាត់អន្តរជាតិមាននិរន្តភាព។
បច្ចុប្បន្ន កម្ពុជាបានក្លាយជាប្រទេសដែលមានចំណូលមធ្យមកម្រិតទាប ដោយចំណូលក្នុងមនុស្សម្នាក់បានកើនប្រមាណ ៥ដង ពោលគឺពី ២៥០ដុល្លារកាលពីពាក់កណ្តាលទសវត្សរ៍ឆ្នាំ១៩៩០ មកដល់១៤២៣ដុល្លារអាមេរិកក្នុងឆ្នាំ២០១៧។ នេះបើតាមរបាយការណ៍របស់ធនាគារជាតិកម្ពុជា។
របាយការណ៍បង្ហាញទៀតថា កំណើនសេដ្ឋកិច្ចបន្តរឹងមាំនេះ គួបផ្សំនឹងស្ថេរភាពម៉ាក្រូសេដ្ឋកិច្ច បានរួមចំណែកកាត់បន្ថយភាពក្រីក្រនៅកម្ពុជាជាលំដាប់។ ចំនួនប្រជាជនដែលរស់នៅក្រោមបន្ទាត់នៃភាពក្រីក្រខ្លាំងបានថយចុះត្រឹម២,២%នៅឆ្នាំ២០១២ ដែលជាអត្រាទាបជាងប្រទេសនៅអាស៊ានមួយចំនួនដែលមានចំណូលខ្ពស់ជាងកម្ពុជា ដូចជាឥណ្ឌូនេស៊ី ឡាវ ហ្វីលីពីន និងវៀតណាម។
របាយការណ៍ប្រចាំឆ្នាំ ២០១៧ ពីក្រសួងការងារចេញផ្សាយកាលពីខែមីនាឆ្នាំ ២០១៨ បានបង្ហាញថា «សហគ្រាស និងគ្រឹះស្ថាន» កាត់ដេរនៅកម្ពុជាសរុបមាន ១ ១៤៧ ដែលប្រតិបត្តិការកាលពីឆ្នាំ ២០១៧។
ចំណែកក្រុមប្រឹក្សាអភិវឌ្ឍន៍កម្ពុជា (CDC) កាលពីឆ្នាំ ២០១៧ កន្លងទៅ បានផ្តល់សិទិ្ធដល់គម្រោងស្នើសុំវិនិយោគសរុបទាំងក្នុងស្រុក និងបរទេស មានតម្លៃជាទឹកប្រាក់ ៦,៣ ពាន់លានដុល្លារកើនឡើងយ៉ាងខ្លាំងពី ៣,៦ ពាន់លានដុល្លារកាលពីឆ្នាំ ២០១៦។ នេះបើតាមរបាយការណ៍របស់សារព័ត៌មានសេដ្ឋកិច្ចជប៉ុន Nikkei Asian Review។
របាយការណ៍សារព័ត៌មានជប៉ុននេះ បានបង្ហាញពីនិន្នាការនៃការអនុម័តលើគម្រោងស្នើសុំវិនិយោគនៅកម្ពុជាតាំងពីឆ្នាំ ២០១៣ មកតាមរយៈក្រាហ្វិកនៃរបាយការណ៍នេះ។ របាយការណ៍ដដែលបានបង្ហាញថា ក្នុងចំណោមទឹកប្រាក់សរុបនៅឆ្នាំ ២០១៧ វិនិយោគដែលស្នើឡើងដោយពាណិជ្ជករក្នុងស្រុកមានពាក់កណ្តាល ខណៈពាក់កណ្តាលផ្សេងទៀតជាគម្រោងស្នើសុំវិនិយោគដោយផ្ទាល់ពីបរទេស (FDI) ដែលភាគច្រើនជាគម្រោងវិនិយោគិនជនជាតិចិន។
យោងតាមការឲ្យដឹងពីលោក សុខ ចិន្តាសោភា ក្នុងសេចក្តីរាយការណ៍របស់ Nikkei Asian Reviewនេះ កម្ពុជាចាប់ផ្តើមមានឯករាជភាពផ្នែកថាមពលអគ្គិសនីចាប់ពីឆ្នាំ ២០១៨ នេះតទៅ ហើយតម្លៃអគ្គិសនីនឹងបន្តធ្លាក់ចុះសម្រាប់ការធ្វើពាណិជ្ជកម្ម ដើម្បីប៉ះប៉ូវទៅដល់កំណើនថ្លៃឈ្នួលអប្បបរមាដែលបន្តកើនឡើងពីមួយឆ្នាំទៅមួយឆ្នាំ
ស្របជាមួយកំណើនថ្មីៗនៃរោងចក្រសហគ្រាសនេះ សម្តេច ហ៊ុន សែន នាយករដ្ឋមន្រ្តីដែលត្រូវបានគេមើលឃើញថា បានយកចិត្តទុកដាក់លើជីវភាពកម្មករ-កម្មាការិនីខ្លាំងតាមរយៈការផ្តល់សេវាគាំពារសង្គមដោយឥតគិតថ្លៃនោះ សម្តេចបានបង្ហើបពីចក្ខុវិស័យបង្កើនចំនួនរោងចក្រតាមផ្លូវជាតិលេខ៤ ដែលជាយុត្ថិសាស្រ្តផ្សារភ្ជាប់ប៉ូលសេដ្ឋកិច្ចទី ១ របស់ក្រុងភ្នំពេញជាមួយប៉ូលសេដ្ឋកិច្ចទី ២ គឺខេត្តព្រះសីហនុ។
សម្តេចនាយករដ្ឋមន្រ្តីប្រកាសបន្ថែមថា សម្តេចនឹងខិតខំគៀកគរអ្នកវិនិយោគឱ្យបោះទុនបង្កើតរោងចក្រសហគ្រាសតាមបណ្តាយផ្លូវជាលេខ៤ ដែលជាផ្លួវមួយមានសក្តានុពលដឹកទំនិញងាយស្រួលព្រោះមានកំពង់ផែខេត្តព្រះសីហនុ។
យោងតាមរបាយការណ៍អានដោយសម្តេច ហ៊ុន សែន កាលពីចុងខែឧសភាពនេះបានឱ្យដឹងថា ចំនួនរោងចក្រចាប់ផ្តើម មានវត្តមានតាំងពីឆ្នាំ១៩៩៧មក ដែលកាលណ្ណោះមានចំនួនរោងចក្រចំនួន ៦៤រោងចក្រ ហើយប្រាក់ខែកម្មករពេលនោះត្រឹមតែ ៤០ដុល្លារប៉ុណ្ណោះ។ រហូតមកដល់ឆ្នាំ២០០៣ រោងចក្របានកើនចំនួន១៩២ រោងចក្រ ហើយប្រាក់ខែបានឡើងចំនួន ៥០ដុល្លារក្នុងមួយខែ។ មកដល់ឆ្នាំ២០០៨ កម្មករកាត់ដេរបានកើនប្រាក់ខែចំនួន ៦១ដុល្លារក្នុងមួយខែ ចំណែកចំនួនរោងចក្រវិញកើនឡើង ៤៣២រោងចក្រ។ នៅឆ្នាំ២០១៣ រោងចក្របានកើនឡើងចំនួន ៧៣៣ ហើយប្រាក់ឈ្នួលកម្មករកាលនោះមានចំនួន៨០ដុល្លារក្នុងមួយខែ។ ចំណែកឆ្នាំ២០១៧ ចំនួនរោងចក្របានកើនឡើង១១០៧ ហើយប្រាប់ខែកម្មករបានឡើងដល់១៥៣ដុល្លារក្នុងមួយខែ។ រហូតមកដល់ឆ្នាំ២០១៨នេះ ប្រាក់ឈ្នួលរបស់កម្មករបានកើនឡើងរហូតដល់ ១៧០ដុល្លារ ហើយចំនួនរោងចក្រវិញបានកើនឡើងដល់ទៅ១១៥០រោងចក្រ៕
