ភ្នំពេញ ៖ ចិន គ្រោងបង្កើតសាកលវិទ្យាល័យពហុបច្ចេកទេសកម្ពុជា-ចិន នៅកម្ពុជា ដើម្បីបណ្ដុះបណ្ដាលធនធានមនុស្សនៅកម្ពុជា។ ទាក់ទិនគម្រោងនេះ រដ្ឋមន្ដ្រីក្រសួងការងារ បញ្ជាក់ថា កម្ពុជា នឹងគាំទ្រ ហើយរំពឹងថា សាកលវិទ្យាល័យនេះ នឹងរួមចំណែកយ៉ាងសំខាន់ក្នុងការអភិវឌ្ឍធនធានមនុស្សនៅកម្ពុជា។
លោក លៀ ស៊ីណា រាយការណ៍ ៖
គណៈប្រតិភូ នៃសាកលវិទ្យាល័យពហុបច្ចេកទេសធានជីង របស់ប្រទេសចិន នៅព្រឹកថ្ងៃទី០៥ ខែមិថុនានេះ បានជួបជាមួយរដ្ឋមន្ដ្រីក្រសួងការងារ ដើម្បីស្វែងយល់ពីតម្រូវការលើការបណ្ដុះបណ្ដាលធនធានមនុស្ស និងកិច្ចសហប្រតិបត្ដិការជាមួយសមាគមសម្ព័ន្ធខ្មែរចិននៅកម្ពុជា ក្នុងការបង្កើតសាកលវិទ្យាល័យពហុបច្ចេកទេសកម្ពុជា-ចិន។
ក្រោយបញ្ចប់ជំនួប រដ្ឋមន្ដ្រីក្រសួងការងារ និងបណ្ដុះវិជ្ជាជីវៈ លោក អ៊ិត សំហេង បានប្រាប់អ្នកសារព័ត៌មានថា នេះគឺជាជំនួបរវាងលោកនិងនាយកសាកលវិទ្យាល័យធានជីង ដែលជាសាកលវិទ្យាល័យដ៏ធំមួយរបស់ប្រទេសចិន។
ជំនួបនេះ គឺក្នុងគោលបំណងពិភាក្សា ពីគម្រោងបង្កើតសាកលវិទ្យាល័យដ៏ធំមួយនៅក្នុងប្រទេសកម្ពុជា នាពេលខាងមុខ ៖«អញ្ចឹងបន្ទាប់ពីផ្លាស់ប្ដូរយោបល់ទៅ ភាគីចិន គឺពិតជាមានការចាប់អារម្មណ៍ ហើយប្រហែលជាចាប់ដៃគូជាមួយក្រុមហ៊ុន OCIC របស់ឧញ៉ា ពុង ខៀវសែ និងសមាគមចិនដើម្បីបង្កើតសាកលវិទ្យាល័យមួយនៅឯតំបន់ជ្រោយចង្វា ហើយជាសាកលវិទ្យាល័យដ៏ធំមួយ។ ខ្ញុំគិតថា សាកលវិទ្យាល័យនេះ និងរួមវិភាគទានយ៉ាងសំខាន់ក្នុងការអភិវឌ្ឍធនធានមនុស្សរបស់យើង»។
សាកលវិទ្យាល័យនេះ នឹងបណ្ដុះបណ្ដាលកម្រិតថ្នាក់បណ្ឌិត អនុបណ្ឌិត និងថ្នាក់បរិញ្ញាប័ត្រ ផ្សេងៗផងដែរ។ ចំពោះការបង្រៀននឹងត្រូវប្រើប្រាស់ភាសា ខ្មែរ ភាសាចិន និងភាសាដទៃទៀត។ លោករដ្ឋមន្ដ្រីក្រសួងការងារបញ្ជាក់ថា ភាគីចិន និងកម្ពុជា មានបំណងជំរុញគម្រោងនេះឲ្យចេញជារូបរាងនៅក្នុងខួបទី ៦៥ នៃទំនាក់ទំនងកម្ពុជា-ចិន។
លោក អ៊ិត សំហេង បន្ថែមទៀតថា ក្រសួងការងារមានការគាំទ្រ ហើយអនុញ្ញាតិឲ្យសាកលវិទ្យាល័យនេះ ស្វែងរកដៃគូ ដើម្បីរៀបចំពីការបណ្ដុះបណ្ដាលរបស់ខ្លួន។
ចិន គឺជាប្រទេសមួយដែលកម្ពុជា ចាត់ទុកថា ជាមិត្ដដ៏ល្អដែលមិនអាចខ្វះបាន ក្នុងការអភិវឌ្ឍ និងការវិនិយោគផ្សេងៗ។ ប្រទេសចិន តែងតែផ្ដល់ជំនួយឥតសំណង ឥតលក្ខខណ្ឌជាច្រើនដល់កម្ពុជា រួមផ្សំនិងអ្នកវិនិយោគ ក៏ដូចជាពលរដ្ឋចិន បាននាំគ្នាមករកស៊ីនៅកម្ពុជា ក៏កាន់តែមានចំនួនកើនឡើងពីមួយឆ្នាំទៅមួយឆ្នាំ។ វត្ដមានច្រើនឡើងនៃជនជាតិចិននេះ នាយករដ្ឋមន្ដ្រីកម្ពុជា អះអាងថា ជារឿងល្អ ព្រោះជាកំណើនសេដ្ឋកិច្ច។ ចិនជាប្រទេសផ្ដល់ជំនួយនិងប្រាក់កម្ចីដ៏ធំ ដល់កម្ពុជា។ តាមរយៈនេះ វិនិយោគចិនកាន់តែច្រើនឡើងមកកម្ពុជា ស្របពេលកំណើនទេសចរណ៍ចិន មកកាន់កម្ពុជាជាង ២លាននាក់ក្នុងមួយឆ្នាំ៕
