ភ្នំពេញ ៖ ករណីកម្មករ កម្មការិនី ប្រមាណជិត ១២០នាក់ បានដួលសន្លប់ជាបន្ដបន្ទាប់កាលពីព្រឹកថ្ងៃទី២៨ ខែឧសភា ត្រូវបានប្រធានក្រុមការងារទប់ស្កាត់ករណីដួលសន្លប់ របស់ក្រសួងការងារ អះអាងថា គឺបណ្ដាលមកពីក្លិនថ្នាំ របស់សិប្បកម្មផ្សាដែកដែលនៅក្បែរ។ មន្ដ្រីក្រសួងការងារបញ្ជាក់ថា ក្រសួងបានចុះទៅណែនាំសិប្បកម្មនោះរួចហើយ ក៏ប៉ុន្ដែបើនៅតែគ្មានការប្រុងប្រយ័ត្នក្រសួងនឹងធ្វើការផាកពិន័យ។
លោក លៀ ស៊ីណា រាយការណ៍ ៖
កាលពីថ្ងៃទី២៨ ខែឧសភា មានកម្មករសរុប ១១៧នាក់ ដែលធ្វើការងារនៅរោងចក្រ ស្ដារិច (Starite Cambodia Co,ltd) ស្ថិតក្នុងភូមិ ត្រយឹង ឃុំ ពើក ស្រុក អង្គស្នួល ខេត្ដកណ្ដាល បានដួលសន្លប់ បន្ទាប់ពីពួកគេធុំក្លិនថ្នាំ ជះតាមខ្យល់ពីរោងសិប្បកម្មផ្សាដែកមួយកន្លែងដែលនៅក្បែរនោះ។ កម្មករទាំង ១១៧នាក់នេះ មានបុរសចំនួន ០៥នាក់។
លោក ប៉ុក វណ្ណថាត ប្រធានក្រុមការងារ ទប់ស្កាត់ករណីដួលសន្លប់ របស់ក្រសួងការងារ និងបណ្ដុះបណ្ដាលវិជ្ជាជីវៈ បានប្រាប់វិទ្យុស្ដ្រី នៅថ្ងៃទី២៩ ខែឧសភានេះ ថា គិតមកដល់ថ្ងៃនេះកម្មករ កម្មការិនីទាំងអស់ បានចូលធ្វើការវិញធម្មតាហើយ បន្ទាប់ពីពួកគេពុលក្លិនថ្នាំ បាញ់ច្រែះ របស់រោងសិប្បកម្មផ្សាដែកមួយកន្លែង ដែលនៅក្បែររោងចក្ររបស់ពួកគេ។
បន្ទាប់ពីក្រុមការងារ ទប់ស្កាត់ករណីដួលសន្លប់ រកឃើញពីមូលហេតុ ក្រសួងការងារបានចុះទៅដល់រោងសិប្បកម្មនោះ ដោយណែនាំ ឲ្យបង្កើនការប្រុងប្រយ័ត្ន បញ្ឈប់ការបាញ់ថ្នាំ នៅទីវាលដូច្នេះបន្ដទៀត។ មន្ដ្រីរបស់ក្រសួងការងារបញ្ជាក់ថា ប្រសិនបើក្រោយពីទទួលការណែនាំពីក្រសួងការងារហើយ សិប្បកម្មនោះ នៅតែមានការធ្វេសប្រហែសបន្ដទៀត នោះក្រសួងការងារ នឹងធ្វើការផាកពិន័យទៅតាមច្បាប់ការងារដែលមានចែង។
លោក ប៉ុក វណ្ណថាត ៖«វិធានការយើងប្រាប់គាត់ហើយ ហ្នឹងដោយសារការធ្វេសប្រហែសរបស់គាត់។ វិធានការយើងប្រាប់គាត់ ឲ្យគាត់ឈប់បាញ់កន្លែងហ្នឹង ហើយរកតំបន់កន្លែងណា ដែលអាចធ្វើយ៉ាងម៉េចមានការបឺតខ្យល់ឡើងទៅលើទៅ។ កុំឲ្យក្លិនហ្នឹងវាជះទៅលើរោងចក្រគេជិតខាងទៀត ហ្នឹងយើងព្រមានគាត់លើកទី១ លើកទី២ បើគាត់មិនព្រមទេ ក្រុមអធិការកិច្ចយើងនឹងចុះទៅធ្វើការផាកពិន័យគាត់តាមគោលការណ៍ច្បាប់ស្ដីពីការងារ»។
លោក ប៉ុក វណ្ណថាត មានប្រសាសន៍បន្ដទៀតថា ក្រសួងការងារបានខិតខំរៀបចំច្បាប់ ចេញជាសេចក្ដីប្រកាស ក៏ដូជាសារាចរណែនាំ ដើម្បីជូនដំណឹងទៅដល់ក្រុមនិយោជក អង្គការសហជីព និងគ្រូពេទ្យ បំណងធ្វើយ៉ាងណាទប់ស្កាត់ករណីដួលសន្លប់នេះឲ្យបាន។ ក្រៅពីតែពីការចេញសេចក្ដីណែនាំហើយ ក្រសួងការងារក៏បានចុះទៅដោយផ្ទាល់ដល់រោងចក្រផងដែរ ដើម្បីអប់រំអំពីបញ្ហាដួលសន្លប់ និងអត្ថប្រយោជន៍នានា ដែលរាជរដ្ឋាភិបាលផ្ដល់ជូនកម្មករ។
ប្រធានក្រុមការងារ ទប់ស្កាត់ករណីដួលសន្លប់ របស់ក្រសួងការងារ បន្ដទៀតថា ក្រសួងការងារ រំពឹងថា ការខិតខំរបស់ក្រសួងការងារនាពេលនេះ នឹងអាចលុបបំបាត់ករណីដួលសន្លប់នេះបាន ទៅថ្ងៃអនាគត។ យ៉ាងណាមន្ដ្រីរូបនេះ ក៏សង្កត់ធ្ងន់ផងដែរ ថា ប្រសិនបើមាន សហគ្រាស គ្រឹះស្ថាន ណា មិនគោរពតាមសេចក្ដីណែនាំរបស់ក្រសួងការងារ ក្រុមថៅកែ និយោជក ជាម្ចាស់រោងចក្រទាំងនោះ នឹងត្រូវទទួលខុសត្រូវចំពោះមុខច្បាប់៕
