ភ្នំពេញ៖ មន្ត្រីជាន់ខ្ពស់ទទួលបន្ទុកកិច្ចសហការអភិវឌ្ឍអន្តរជាតិនៃក្រសួងការបរទេសនៃប្រទេសស៊ុយអែតបង្ហាញក្តីកង្វល់ពីស្ថានភាពនយោបាយនៅកម្ពុជា។ មន្ត្រីបក្សកាន់អំណាចស្វាគមន៍ស៊ុយអែតបង្ហាញជំហរសម្របសម្រួលស្ថានការណ៍នយោបាយ តែលោកថារដ្ឋាភិបាលមិនអាចជ្រៀតជ្រែកកិច្ចការរបស់តុលាការបានទេ។
លោក ចូហាណេស អូលីលុន ( Johannes Oljelund) អគ្គនាយកទទួលបន្ទុកកិច្ចសហការអភិវឌ្ឍអន្តរជាតិនៃក្រសួងការបរទេសស៊ុយអែតដែលកំពុងបំពេញទស្សនកិច្ចនៅកម្ពុជា បានបង្ហាញក្តីកង្វល់អំពីស្ថានការណ៍នយោបាយកម្ពុជា ស្របពេលដែលអវត្តមានអតីតគណបក្សសង្គ្រោះជាតិចូលរួមការបោះឆ្នោតជាតិក្នុងអាណត្តិថ្មីនេះ។
ក្នុងគេហទំព័រហ្វេសប៊ុករបស់ស្ថានទូតស៊ុយអែតប្រចាំនៅកម្ពុជា បានបង្ហោះវីដេអូឃ្លីបមួយកាលពីថ្ងៃទី២៤ ខែ ឧសភា បញ្ជាក់ពីដំណើរទស្សនៈកិច្ចរបស់លោកលោក ចូហាណេស អូលីលុន នៅកម្ពុជា ក្នុងការស្វែងយល់អំពីស្ថានការណ៍នយោបាយកម្ពុជា និងពិនិត្យមើលគោលនយោបាយអភិវឌ្ឍរបស់រដ្ឋាភិបាលស៊ុយអែតឡើងវិញ។ ទោះបីយ៉ាងណា លោកប្រកាន់ជំហរថា របស់រដ្ឋាភិបាលស៊ុយអែតចង់ជួយរដ្ឋាភិបាល និងអង្គការក្រៅរដ្ឋាភិបាលនៅកម្ពុជា។
លោក ចូហាណេស អូលីលុន៖ «ខ្ញុំមកកាន់ប្រទេសកម្ពុជាថ្ងៃនេះ ខ្ញុំពិតជាសប្បាយចិត្តណាស់ ដើម្បីសិក្សាស្រាវជ្រាវពីការវិវត្តន៍នយោបាយ និង ការអភិវឌ្ឍន៍នៅកម្ពុជា។ ពួកយើងមានការទំនាក់ទំនង និង កំពុងឃ្លាំមើល គោលនយោបាយ នៅប្រចាំឆ្នាំផងដែរ។ វាគឺជាការសង្កេត ដើម្បីធ្វើការសិក្សាស្រាវជ្រាវ អំពីការទំនាក់ទំនងយ៉ាងស៊ីជម្រៅជាមួយកម្ពុជា ដែលវាគឺជាកង្វល់ ជុំវិញការវិវត្តន៍នយោបាយ ឬអ្វីដែលយើងត្រូវតែពិចារណាឲ្យបានម៉ត់ចត់ហើយនៅក្នុងពេលជាមួយគ្នានេះ យើងចង់ឃើញទំនាក់ទំនងយ៉ាងស្អិតរមួត ជាមួយសង្គមកម្ពុជា រាប់បញ្ចូលទាំងសង្គមស៊ីវិលនៅបន្តទៅមុខទៀត»។
ដំណើរទស្សនៈកិច្ចរបស់អគ្គនាយកទទួលបន្ទុកកិច្ចសហការអភិវឌ្ឍអន្តរជាតិនៃក្រសួងការបរទេសស៊ុយអែត ស្របពេលគណៈកម្មាធិការជាតិរៀបចំការបោះឆ្នោតបិទបញ្ចប់ការចុះបញ្ជីគណបក្ស និងសម្រេចទទួលស្គាល់គណបក្សនយោបាយចំនួន ២០ ចូលរួមការបោះឆ្នោត ដោយគ្មានគណបក្សសង្គ្រោះជាតិដែលត្រូវបានរំលាយដោយសារមេបក្សនេះរងការចោទប្រកានអំពើក្បត់ជាតិ។
ឆ្លើយតបចំពោះដំណើរទស្សនកិច្ចរបស់មន្ត្រីជាន់ខ្ពស់ក្រសួងការបរទេសស៊ុយអែត លោក សុខ ឥសាន ប្រាប់វិទ្យុស្ត្រីថា ជំហរគណបក្សប្រជាជនកម្ពុជាទទួលស្វាគមន៍ចំពោះរដ្ឋាភិបាលស៊ុយអែតមកសម្របសម្រួលស្ថានភាពនយោបាយកម្ពុជា ប៉ុន្តែគណបក្សកាន់អំណាចមិនជ្រៀតជ្រែកកិច្ចការរបស់តុលាការ ដើម្បីអន្តរាគមដោះលែងអតីតប្រធានគណបក្សសង្គ្រោះជាតិបានទេ។
ប្រាំថ្ងៃបន្ទាប់ពីតុលការកំពូលសម្រេចរំលាយគណបក្សសង្គ្រោះជាតិកាលពីថ្ងៃទី ១៦ វិច្ឆិកា ឆ្នាំមុន រដ្ឋាភិបាលស៊ុយអែតសម្រេចផ្តាច់ជំនួយដល់រដ្ឋាភិបាលកម្ពុជា លើកឡែងតែជំនួយក្នុងវិស័យអប់រំ និងកិច្ចការស្រាវជ្រាវ។
លោក ហង្ស ពិទូ អ្នកវិភាគបញ្ហាសង្គមនិងនយោបាយបង្ហាញទស្សនៈថា សហគមអន្តរជាតិនូនៅតែព្រួយបារម្ភអំពីស្ថានការណ៍នយោបាយ និងការអវត្តមានគណបក្សប្រឆាំងក្នុងដំណើរការបោះឆ្នោត។អ្នកវិភាគវ័យក្មេងរូបនេះ យល់ថា ដើម្បីកុំឲ្យរងសម្ពាធពីអន្តរជាតិរដ្ឋាភិបាលគួរលើកលែងនិងបន្ធូរបន្ថយទោសដល់អ្នកទោសនយោបាយ និងអនុញ្ញាតឲ្យគណបក្សប្រឆាំងរស់ឡើងវិញចូលរួមការបោះឆ្នោត។
លោក ហង្ស ពិទូ៖ «ត្រូវតែមានធ្វើការកំណែទម្រងប្រព័ន្ធនៃការបោះឆ្នោតដែលប្រជាពលរដ្ឋឥឡូវគាត់មិនសូវមានទំនុងចិត្ត ជារួមមានន័យថា អន្តរជាតិគេដំដៅលើតែមួយការបោះឆ្នោតមានន័យថា ប្រសិនបើការបោះឆ្នោតគ្មានការចូលរួមពីបក្សប្រឆាំង ការបោះឆ្នោតការលេងសើចឬក៏គ្មានន័យអ្វីអញ្ចឹង បញ្ហានឹងជាអ្វីដែលជាក្តីរង្វល់របស់អន្តរជាតិគេចង់បានកន្លែងហ្នឹងបាទ។»
ការរំលាយ CNRP នាំឲ្យសហភាពអឺរ៉ុប និងសហរដ្ឋអាមេរិកប្រកាសតាមពីក្រោយរដ្ឋាភិបាលស៊ុយអែតដោយផ្អាកជំនួយគាំទ្រដល់គណៈកម្មាធិការជាតិរៀបចំការបោះឆ្នោត។ តែបែបនេះជប៉ុនជាសម្ព័ន្ធមិត្តអាមេរិកនៅរក្សាជំហរបន្តផ្តល់ដល់ គ.ជ.ប ខណៈប្រទេសចិនក៏ប្រកាន់ជំហរ គាំទ្រការបោះឆ្នោតខាងមុខនេះដែរ។
អ្នកនាំពាក្យ គ.ជ.ប អះអាងថា គ.ជ.ប មានស្ថេរភាពថវិកាក្នុងរៀបចំដំណើរការបោះឆ្នោតជ្រើសតាំងតំណាងរាស្ត្រឆ្នាំនេះ ព្រោះរដ្ឋាភិបាលបានត្រៀមថវិកាប្រមាណ ៥០ លានដុល្លារ៕
