ភ្នំពេញ ៖ ស្ដ្រីបម្រើតាមផ្ទះ បង្ហាញក្ដីសង្ឃឹមថា ពួកគេនឹងបានប្រាក់ឈ្នួលខ្ពស់ជាងសព្វថ្ងៃ ដូចអ្វីដែលនាយករដ្ឋមន្ដ្រីបានអំពាវនាវកាលពីថ្ងៃទី២៣ ខែឧសភា។ តែយ៉ាងណាពួកគេហាក់មិនហ៊ានដាក់ការរំពឹងទុក មួយរយភាគរយនោះទេ ដោយត្រូវរង់ចាំមើលជាបន្ដទៀត។
លោក លៀ ស៊ីណា រាយការណ៍ ៖
ថ្លែងនៅចំពោះមុខកម្មករ កម្មការិនី នៅខេត្តកំពង់ស្ពឺ កាលពីថ្ងៃម្សិលមិញ (២៣ ឧសភា) សម្ដេចនាយករដ្ឋន្ត្រី បានត្អូនត្អែ អាណិតអាសូរ ដល់ ស្ត្រី បម្រើការងារតាមផ្ទះ ដែលមិនមានថ្ងៃឈប់សមម្រាក់តាមច្បាប់ការងារ ហើយទទួលបានប្រាក់ឈ្នួល តិចនៅឡើយ។ សម្ដេចថា ម្ចាស់ផ្ទះគួរ ផ្ដល់ប្រាក់ឈ្នួលឲ្យសមរម្យដល់ស្ត្រីទាំងនោះ។
ប្រសាសន៍របស់នាយករដ្ឋមន្ត្រី ភាគច្រើន តែងតែទទួលបានការឆ្លើយតបជាវិជ្ជមានពីភាគីពាក់ព័ន្ធ។ ដោយសាររឿងនេះ វិទ្យុស្ត្រីបានសុំការយល់ឃើញ ពីក្រុមស្ត្រីមួយចំនួន ដែលបម្រើការងារនៅតាមផ្ទះ។ ពួកគាតហាក់បានទទួលការលើកទឹកចិត្តពីនាយករដ្ឋមន្ត្រីដោយសង្ឃឹមថា ការអំពាវនាវរបស់ សម្ដេច ហ៊ុន សែន នឹងនាំឲ្យម្ចាស់ផ្ទះ គិតគូរ ពីការដំឡើងប្រាក់ឈ្នួល និងសិទ្ធិការងារសម្រាប់ពួកគាត់ឡើងវិញ។
ស្ដ្រីមួយរូបដែលជាអ្នកបម្រើតាមផ្ទះ សុំមិនបញ្ចេញឈ្មោះបានប្រាប់វិទ្យុស្ដ្រី នៅថ្ងៃទី២៤ ខែឧសភា នេះថា ប្រាក់ឈ្នួលដែលអ្នកស្រីទទួលបានសព្វថ្ងៃ គឺមិនគ្រប់គ្រាន់សម្រាប់ការចំណាផ្ទាល់ខ្លួន និងមើលថែម្ដាយ ដែលមានជំងឺប្រចាំកាយនោះទេ ៖«ចំណូលគ្រួសារបង គាត់ឲ្យបងតម្លៃប៉ុណ្ណឹងបានត្រឹមមួយគ្រប់ៗហ្នឹងអូន។ ព្រោះមានម្ដាយជរា ឈឺប្រើថ្នាំរហូតហ្នឹង បើអត់មានម្ដាយជរា ឈឺទេ និយាយតាមត្រង់ទៅ វាអាច មួយខែសល់ ២០ ឬ៣០ដុល្លារ ដែរ។ តែដល់មានម្ដាយជរា ឈឺ អញ្ចឹងទៅ មួយខែៗបានត្រឹមមួយគ្រប់ៗ»។
ដូចគ្នាដែរអ្នកស្រី ម៉ិច សោភ័ណ្ឌ ស្ដ្រីបម្រើការងារតាមផ្ទះឲ្យជនជាតិបរទេស ទទួលស្គាល់ថា ប្រាក់ឈ្នួលសព្វថ្ងៃបានត្រឹមតែមួយគ្រប់ៗប៉ុណ្ណោះ។ ជាងនេះអ្នកស្រីបន្ថែមថា បើទោះជាស្ដ្រីបម្រើតាមផ្ទះ ហាក់ទទួលបានការផ្ដល់តម្លៃពីក្រុមម្ចាស់ផ្ទះល្អប្រសើរជាងមុនក្ដី ប៉ុន្ដែអ្នកស្រី មានបំណងចង់បានច្បាប់មួយក្នុងការ ការពារ និងផ្ដល់ថ្ងៃឈប់សម្រាក សម្រាប់ស្ដ្រី បម្រើការងារតាមផ្ទះឲ្យបានដូចនិងកម្មករ រោងចក្រដែរ ៖«ជាសំណូមពររបស់ខ្ញុំ ខ្ញុំចង់បានច្បាប់មួយការពារពួកយើង ធ្វើឲ្យពួកយើងតាមផ្ទះហ្នឹងមានតម្លៃដូចកម្មកររោងចក្រដែរ។ យើងមានពេលមានបុណ្យទានក្នុងប្រទេសយើង ពួកមីងដែលជាកម្មករ ហ្នឹងឲ្យមានភាពស្នើគ្នា ដូចជាកម្មករ អញ្ចឹង មានពេលសម្រាក ឈប់ដូចគ្នា ហើយថ្ងៃបុណ្យធ្វើទៅឲ្យវាបានលុយ OT ថែមម៉ោងដូចគេ ដូចអីអញ្ចឹង»។
ចំណែកអ្នកស្រី នង ថា អះអាងថា ប្រាក់ខែតិចការចំណាយច្រើន គឺពិតជាលំបាក សម្រាប់ស្ដ្រីដែលបម្រើការងារតាមផ្ទះ។ អ្នកស្ត្រីចង់បានប្រាក់ឈ្នួលឲ្យបានខ្ពស់មួយសមរម្យ ដែលអ្នកស្រីយល់ថា យ៉ាងហោចណាស់ក៏ត្រឹម ២៥០ដុល្លារដែរ ទើបសមសម្របសម្រាប់ការរស់នៅរបស់ស្ដ្រីបម្រើតាមផ្ទះ ៖«គ្នាធ្វើការតាមផ្ទះខ្មែរអីហ្នឹង បាន ២៥០ដល្លារឡើងទៅ វាល្អហើយ។ បើធ្វើតាមផ្ទះបរទេសវាបានរាងថ្លៃបន្ដិចហើយ តែបើតាមផ្ទះខ្មែរខ្លះ បានត្រឹម ១២០ ឬ១៥០ដុល្លារអីហ្នឹង។ អញ្ចឹងបើបានត្រឹមផ្ទះរាងថ្លៃបន្ដិចទៅ បានដល់ ២៥០ដុល្លារអីក៏ល្អដែរ»។
ជាមួយគ្នានេះ អ្នកស្រី ជិន ស្រីពៅជា ស្ដ្រីបម្រើតាមផ្ទះម្នាក់ទៀតបាននិយាយថា ការងារតាមផ្ទះគឺពិតជាហត់ ហើយមានកិច្ចការជាច្រើនដែលត្រូវបំពេញប្រចាំថ្ងៃ។ ក៏ប៉ុន្ដែប្រាក់ឈ្នួលគឺបានតិចនៅឡើយ ហើយមិនតែប៉ុណ្ណោះថ្ងៃបុណ្យជាតិមួយចំនួន អ្នកស្រីមិនបានឈប់សម្រាកនោះទេ។ អ្នកស្រីបន្ដទៀតថា នៅពេលដែលអ្នកស្រី បានឮប្រសាសន៍របស់សម្ដេច ហ៊ុន សែន ពីការអំពាវនាវដល់ក្រុមម្ចាស់ផ្ទះឲ្យផ្ដល់ប្រាក់ ឲ្យបានខ្ពស់សម្រាប់ស្ដ្រីបម្រើតាមផ្ទះ អ្នកស្រី រំភើពណាស់ ក៏ប៉ុន្ដែអ្នកស្រីមិនហ៊ានដាក់សង្ឃឹម ទាំងស្រុងនោះទេ ព្រោះថៅកែអ្នកស្រីហាក់ដូចជា មិនចាប់អារម្មណ៍និងការលើកឡើងរបស់សម្ដេចនាយករដ្ឋមន្ដ្រីនេះទេ ៖«បានមើលទូរទស្សន៍ដែរ គ្រាន់តែថា លុះត្រាតែថៅកែហ្នឹងគេយល់ស្របដែរ ទើបយើងបានឡើងនិងគេទៅ។ ថៅកែខ្ញុំគាត់បានមើលដែរហ្នឹង ពេលខ្ញុំចូលធ្វើការនៅកន្លែងគាត់ គាត់បើកមើលដែរហ្នឹង តែគាត់មិនគិតដំឡើងដូចសម្ដេចថា ផងហ្នឹង»។
យ៉ាងណាអ្នកស្រី ជិន ស្រីពៅ នឹងទទូច សុំឲ្យសម្ដេចនាយករដ្ឋមន្ត្រី រៀបចំឲ្យមានការកំណត់ណាមួយ សម្រាប់ប្រាក់ឈ្នួលរបស់ស្ដ្រីបម្រើការងារតាមផ្ទះ។ អ្នកស្ត្រីបញ្ជាក់ថា ប្រសិនបើប្រាក់ឈ្នួលអ្នកបម្រើតាមផ្ទះពិតជាបានឡើងខ្ពស់ មែន នោះជីវភាពរបស់អ្នកស្រី ក៏ដូចជាស្ដ្រីបម្រើតាមផ្ទះដទៃទៀត នឹងកាន់តែល្អប្រសើរ។
យោងតាមប្រសាសន៍របស់សម្ដេច ហ៊ុន សែន ស្ដ្រីមប្រើការងារតាមផ្ទះ គឺពិតជាហត់នឿយ ក្នុងកិច្ចការងារប្រចាំថ្ងៃរបស់ពួកគេ។សម្ដេចបញ្ជាក់ថា ស្ត្រីទាំងនោះគ្មានថ្ងៃបុណ្យ គ្មានថ្ងៃឈប់សម្រាកប្រចាំខែ ដូចកម្មករបម្រើតាមវិស័យផ្សេងៗនោះទេ។ ត្រង់ចំណុចនេះ សម្ដេច ហ៊ុន សែន បានអំពាវនាវ ឲ្យក្រុមម្ចាស់ផ្ទះដែលមានលទ្ធភាព ទទួលយកអ្នកបម្រើតាមផ្ទះ ទៅធ្វើការត្រូវគិតគូរ និងយកចិត្ដទុកឲ្យបានច្រើនចំពោះអ្នកបម្រើតាមផ្ទះ ពិសេសគួរតែផ្ដល់ការឈប់សម្រាកឲ្យពួកគេ នឹងផ្ដល់ប្រាក់ឈ្នួលឲ្យបានខ្ពស់ដើម្បីឲ្យពួកគេមានលទ្ធភាពយកប្រាក់នោះទៅផ្គត់ផ្គង់ជីវភាពគ្រួសារ៕
