ភ្នំពេញ៖ រដ្ឋាបាលចិនបានផ្តល់ជំនួយឥតសំណងជាង ២ លានដុល្លារដល់មជ្ឈមណ្ឌលសកម្មភាពកំចាត់មីនកម្ពុជាហៅថា ស៊ីម៉ាក់ ដើម្បីបោសសម្អាតគ្រាប់មីន និងសំណល់ជាតិផ្ទុះពីសម័យសង្គ្រាមក្នុងរយៈពេលមួយឆ្នាំ។
បើតាមសេចក្តីប្រកាសព័ត៌មានរបស់ស៊ីម៉ាក់ចុះផ្សាយនៅថ្ងៃទី ២៤ ខែ ឧសភា ម្សិលមិញ បញ្ជាក់ថា ចិនផ្តល់ជំនួយឥតសំណង ២, ៥ លានដុល្លារអាមេរិក ដែលហៅថា គម្រោងជំនួយចិន ដើម្បីលុបបំបាត់គ្រាប់មីននៅកម្ពុជា រហូតដល់ឆ្នាំ ២០១៩។
គម្រោងនេះនឹងធ្វើសកម្មភាពចំនួនបីសំខាន់ៗគឺ កិច្ចប្រតិបត្តិការបោសសម្អាតគ្រាប់មីន និងសំណល់ជាតិផ្ទុះពីសម័យសង្គ្រាមក្នុងខេត្តព្រះវិហារ ស្ទឹងត្រែង កំពង់ធំ និងសៀមរាប ហើយកិច្ចប្រតិបត្តិការស្រាវជ្រាវព័ត៌មាននៅតំបន់គ្រាប់មីន និងយុទ្ធភណ្ឌមិនទាន់ផ្ទុះលើដីគោក ក្នុងទឹក និងជុំវិញខេត្តជាប់បឹងទន្លេសាប។ គម្រោងនេះក៏នឹងពង្រឹងសមត្ថភាពនៃវិទ្យាស្ថានបច្ចេកទេសសកម្មភាពចំចាត់មីន និងមណ្ឌលសុនខជាតិ។
ដើម្បីសម្រេចគោលដៅនេះ អង្គភាពស៊ីម៉ាក់ដាក់ពង្រាយកម្លាំងប្រតិបត្តិការចំនួន ២៣០ នាក់។គម្រោងនេះនឹងផ្តល់ប្រយោជន៍ដោយផ្ទាល់ដល់ប្រជាជនរាប់ពាន់គ្រួសារ និងការស្រាវជ្រាវព័ត៌មានភូមិចំនួន ៨៤០ ហើយជួយពង្រឹងសមត្ថភាពធនធានមនុស្ស និងពង្រឹងសុនខហិតមីន។
មជ្ឈមណ្ឌលសកម្មភាពកំចាត់មីនកម្ពុជាបានសម្អាតគ្រាម់មីន និងសំណល់ជាតិផ្ទុះ សល់ក្រោយសម័យសង្គ្រាមក្នុងរយៈពេល ២៥ ឆ្នាំ បានចំនួន ២ លាន ៧ សែន គ្រាប់ និងសម្អាតផ្ទៃដីចម្ការមីនជាង ១ ពាន់គីឡូម៉ែត្រ។
ក្នុងប្រតិបត្តិការសម្អាតមីនមន្ត្រីអង្គភាពស៊ីម៉ាក់ចំនួន ១៥ នាក់ពលីជីវិត ៨២នាក់ ក្លាយជាជនពិការ និង ២៥០ នាក់បាត់បងលទ្ធភាពពលកម្ម៕
