ភ្នំពេញ៖សម្ដេចនាយករដ្ឋមន្រ្ដី ហ៊ុន សែន ប្រមុខរដ្ឋាភិបាលកម្ពុជា បានថ្លែងអះអាងថា ប្រទេសកម្ពុជាមិនអនុញ្ញាតឲ្យក្រុមណា បុគ្គលណា ឬបក្សនយោបាយណាមួយយកធ្វើចំណាប់ខ្មាំងបាននោះឡើយ ។ការលើកឡើងរបស់សម្ដេចដូចនេះ នៅក្នុងពិធីចែកសញ្ញាបត្រដល់និស្សិតសកលវិទ្យាល័យភូមិន្ទនីតិសាស្ដ្រ និងវិទ្យាសាស្ដ្រសេដ្ឋកិច្ច នៅព្រឹកថ្ងៃទី២២ ខែឧសភា ឆ្នាំ២០១៨នេះ។
លោក រឿន រិទ្ធីរាយការណ៍ពីព័ត៌មាននេះ!
នៅក្នុងពិធីនេះ សម្ដេច ហ៊ុន សែន បានបញ្ជាក់ថា ការបោះឆ្នោតជ្រើសរើសតំណាងរាស្រនីតិកាលពី៦ នឹងប្រព្រឹត្តទៅតាមកាលកំណត់នាថ្ងៃទី២៩ ខែកក្កដា ឆ្នាំ២០១៨ខាងមុខដ៏ខ្លីនេះ ដោយគ្មានការប្រែប្រួលនោះឡើយ។
ទាក់ទិននឹងការលើកឡើងរបស់សម្តេចនាយករដ្ឋន្ត្រី លោក ហង្ស វិទូ ប្រធានអ្នកវិភាគវ័យក្មេង យល់ឃើញថា កម្ពុជាគឺជាប្រទេសមួយដែលមានអធិបតេយ្យភាព មានសិទ្ធិមានអំណាច ដែល អាចសម្រេចចិត្តលើផលប្រយោជន៍ ឬក៏កិច្ចការងារផ្សេងៗ។ ក៏ប៉ុន្តែលោកយល់ថាកម្ពុជា ក៏ជាប្រទេសដែលជាសមាជិករបស់អង្កការសហប្រជាជាតិ ហើយកម្ពុជា ក៏ជាផ្នែកមួយរបស់សហគមន៍អន្តរជាតិ គឺ មានន័យប្រទេសកម្ពុជាគួតែអើពើ នឹងខ្វល់ខ្វាយចំពោះមតិរបស់អន្តរជាតិមួយចំនួនដែលគេតែងតែខ្វល់ខ្វាយពីកម្ពុជា។
គួបញ្ជាក់ផងដែរថា ការបោះឆ្នោតជ្រើសសមាជិកសភា អណ្ណតិទី៦ គឺនិងធ្វើឡើងនៅថ្ងៃទី២៩កក្តដាឆ្នាំ ២០១៨ ខាងមុខនេះ។ ដោយឡែកគិតមកត្រឹមថ្ងៃទី២២ឧសភានេះ មានគណបក្សនយោបាយចំនួន១៦ហើយដែល បានចុះឈ្មោះក្នុងបញ្ជីបោះឆ្នោតផ្លូវការដែលទទួលស្គាល់ដោយ គជប។
ប្រសាសន៍របស់សម្ដេចនាយករដ្ឋមន្ត្រីស្របពេលសហគមន៍អន្តរជាតិមានអាមេរិក និងសហភាពអឺរ៉ុបបានព្រមានថា នឹងមិនទទួលស្គាលលទ្ធផលបោះឆ្នោតនោះទេ ព្រោះមិនតំណាងអោយឆន្ទៈពលរដ្ឋគាំទ្របក្សប្រឆាំងដែលមានជាង៣លាននាក់។ តែបែបនេះក្ដីសម្ដេចហ៊ុនសែនថ្លែងថា ការបោះឆ្នោតទោះជាគ្មានបក្សប្រឆាំង ឬបក្សសង្រ្គោះជាតិចូលរួមក៏ដោយ តែពលរដ្ឋនៅតែបង្ហាញឆន្ទៈរបស់ខ្លួនបាន តាមរយៈគណបក្សផ្សេងៗទៀត ដែលចូលរួមបោះឆ្នោត៕
