ភ្នំពេញ៖ ក្រសួងការបរទេសអាមេរិកសម្តែងការខកចិត្តយ៉ាងខ្លាំង ចំពោះរាជរដ្ឋាភិបាលកម្ពុជាដែលសម្រេចមិនអនុញ្ញាតឲ្យអតីតគណបក្សសង្គ្រោះជាតិចួលរួមការបោះឆ្នោតជាតិ។ មន្ត្រីជាន់ខ្ពស់រដ្ឋាភិបាលចាត់ទុកជំហរអាមេរិកជាការរំលោភច្បាប់ និងមិនគោរពអធិបតេយ្យភាពកម្ពុជានោះទេ។
យោងតាមសេចក្តីថ្លែងការណ៍ចេញផ្សាយកាលថ្ងៃទី ១៧ ខែ ឧសភាម្សិលមិញថា ក្រសួងការបរទេសអាមេរិកមានការសោកស្តាយយ៉ាងខ្លាំង ដែលរាជរដ្ឋាភិបាលកម្ពុជាបានសម្រេចមិនអនុញ្ញាតឱ្យគណបក្សសង្គ្រោះជាតិដែលត្រូវបានរំលាយកាលពីខែវិច្ឆិកាឆ្នាំមុន ចួលរួមការបោះឆ្នោតជាតិនៅថ្ងៃទី ២៩ ខែ កក្កដា ឆ្នាំ ២០១៨ខាងមុខនេះ។
លោកស្រី Healther Nauert អ្នកនាំពាក្យក្រសួងការបរទេសអាមេរិក បញ្ជាក់ក្នុងសេចក្តីថ្លែងការណ៍ថា ការសម្រេចនេះបានទប់ស្កាត់សិទ្ធិជាមូលដ្ឋានរបស់ពលរដ្ឋខ្មែររាប់លាននាក់ក្នុងការបង្ហាញឆន្ទៈបោះឆ្នោតជ្រើសរើសបេក្ខជនដែលខ្លួនពេញចិត្ត និងចោទសួរអំពីសុចរិតភាពដល់ដំណើរការបោះឆ្នោត។
ជំហររបស់អាមេរិកធ្វើឡើង បន្ទាប់ពី គ.ជ.ប បិទបញ្ជប់ដំណើរការចុះបញ្ចីបេក្ខជនឈរឈ្មោះបោះឆ្នោតកាលពីថ្ងៃទី ១៤ ខែ ឧសភានេះ ដោយគ្មានគណបក្សសង្គ្រោះជាតិចូលរួមការបោះឆ្នោត។
ក្រសួងការបរទេសអាមេរិកទទូចឲ្យរាជរដ្ឋាភិបាលកម្ពុជាទទួលស្គាល់បេក្ខជនអតីតគណបក្សសង្គ្រោះជាតិឡើងវិញ ហើយអាមេរិកក៏ទទូចឲ្យដោះលែងអតីតប្រធានគណបក្សសង្គ្រោះជាតិ លោក កឹម សុខា ជាបន្ទាន់ផងដែរ។
គណបក្សសង្គ្រោះជាតិត្រូវបានតុលាការកំពូលសម្រេចរំលាយកាលពីខែវិច្ឆិកាឆ្នាំមុន ដោយសារលោក កឹម សុខា រងការចោទប្រកាន់អំពើក្បត់ជាតិ ហើយបច្ចុប្បន្នកំពុងជាប់ឃុំក្នុងពន្ធនាគារត្រពាំងថ្លុង ខេត្តត្បូងឃ្មុំ។
លោក សុខ ឥសាន អ្នកនាំពាក្យគណបក្សប្រជាជនកម្ពុជា(CPP) ក៏បានបង្ហាញការសោកស្តាយចំពោះជំហរអាមេរិក ដែលទទូចដោះលែង លោក កឹម សុខា អតីតប្រធានគណបក្សសង្គ្រោះជាតិ និងផ្តល់ភាពស្របច្បាប់ដល់បេក្ខជនបក្សប្រឆាំងឱ្យមានសិទ្ធិឈរឈ្មោះបោះឆ្នោតឡើងវិញ គឺជាទង្វើមិនគោរពអធិបតេយ្យភាពរបស់កម្ពុជា។
លោក សុខ ឥសាន៖ «ពីព្រោះអតីតមេបក្សប្រឆាំងឬអតីតបក្សប្រឆាំងដែលត្រូវរំលាយដោយតុលាការកំពូលនេះគឺកើតចេញពីបទល្មើសធ្ងន់ធ្ងរដែលបង្កើតឡើងដោយខ្លួនឯងទេ គ្មានអ្នកណាបង្កើត ឬរដ្ឋាភិបាល ឬកណបក្សកាន់អំណាចជាអ្នកបង្កើតឲ្យគាត់ទេ។ ខ្ញុំមានការសោកស្តាយដែលអស់លោកអ្នកដែលសម្តែងការសោកស្តាយកាន់ជើងបក្សប្រឆាំងមិនយល់ពីច្បាប់កម្ពុជា ហើយមិនគោរពឯករាជ្យភាព និងអធិបតេយ្យភាពកម្ពុជា។»
លោក សុខ ឥសាន ទទួលស្គាល់ថា គ្មានឈ្មោះគណបក្សសង្គ្រោះជាតិក្នុងបញ្ជីបោះឆ្នោតពិតប្រាកដមែនដោយសារគណបក្សនេះ បានប្រព្រឹត្តិល្មើសច្បាប់យ៉ាងធ្ងន់ធ្ងរដែលធ្វើឲ្យបានបាត់បង់សិទ្ធិក្នុងការចូលរួមការបោះឆ្នោត។ លោកបន្ថែមថា ការទទូចរបស់សហរដ្ឋអាមេរិកនឹងគ្មានប្រសិទ្ធភាពឲ្យរាជរដ្ឋាភិបាលកម្ពុជាអនុវត្តតាមឡើយ។
កាលពីសប្តាហ៍មុនសម្តេចនាយករដ្ឋមន្ត្រី ហ៊ុន សែន ថ្លែងចំពោះមុខកម្មកររាប់ម៉ឺននាក់នៅក្រុងបាវិត ខេត្តស្វាយរៀងថា គ្មានការលើកទោសឲ្យអតីតប្រធានគណបក្សសង្គ្រោះជាតិលោក កឹម សុខា ជាដាច់ខាត៕
