គ្រោះថ្នាក់ចរាចរណ៍ដ៏គួរឲ្យរន្ធត់មួយបានកើតឡើងនៅព្រឹកថ្ងៃទី ១៩ខែឧសភា នេះរវាងរថយន្តដឹកកម្មកររោងចក្រកាត់ដេរ និងរថយន្តដឹកអ្នកដំណើររបស់វៀតណាម បណ្តាលឲ្យមនុស្ស ២១នាក់បានស្លាប់បាត់បង់ជីវិត និង មួយចំនួនទៀតរងរបួសធ្ងន់ នៅឯខេត្តស្វាយរៀង។ បន្ទាប់ពីមាន ហេតុការនេះកើតឡើងភ្លាម លោកនាយករដ្ឋមន្ត្រីហ៊ុន មានការសោកស្តាយជាខ្លាំងចំពោះការស្លាប់បាត់បង់ជីវិតរបស់ពួកគេ។
គ្រោះថ្នាក់ចរាចរណ៍នេះ កើតស្ថិតនៅភូមិដើមពោធិ៍ ឃុំកណ្តៀងរាយ ស្រុកស្វាយទាប ខេត្តស្វាយរៀង។ ថ្លែងក្នុងពិធីប្រគល់សញ្ញាប័ត្រដល់និស្សិតសាកល វិទ្យាល័យភូមិន្ទភ្នំពេញនាព្រឹកថ្ងៃទី១៩ នៅមជ្ឈមណ្ឌលកោះពេជ្រ លោកនាយករដ្ឋមន្ត្រី ហ៊ុន សែន បានសម្តែងការចូលរួមរំលែកទុក្ខនិងសោកស្ដាយចំពោះការបាត់បង់ជីវិតកម្មកររោងចក្រទាំង ២១នាក់នៅក្នុងហេតុការណ៍គ្រោះថ្នាក់ចរាចរណ៍នៅខេត្តស្វាយរៀងនេះដែរ។
ស្រដៀងគ្នានេះដែរ លោក ឆេង ឈន់ ប្រធានសម្ព័ន្ធសហជីពការងារឯករាជ្យ បានលើកឡើងថា « ខ្ញុំមានការសោកស្តាយចំពោះការបាត់បង់ជីវិតកម្មករទាំង ២១រូប និង១៨រងរបួសធ្ងន់ នៅក្នុងគ្រោះថ្នាក់ចរាចរណ៍នៅលើកំណាត់ផ្លូវជាតិលេខ១ ខេត្តស្វាយរៀង»។ លោកក៏បានសំណូមពរដល់អាជ្ញាធរពាក់ព័ន្ធទាំងឡាយក្នុងខេត្តស្វាយរៀង និងរាជរដ្ឋាភិបាលត្រូវកែលំអចំណុចខ្វះខាតក្នុងការត្រួតពិនិត្យសណ្ដាប់ធ្នាប់នៃការបើកនៅក្នុងខេត្តស្វាយរៀង។
លោក ឆេង ឈន់ ប្រធានសម្ព័ន្ធសហជីពការងារឯករាជ្យបានបញ្ជាក់ទៀតថា «ហេតុការណ៍គួរឱ្យរន្ធត់នេះ អាចមានចំនួនអ្នកស្លាប់កើនឡើងជាបន្តទៀត ដោយសារស្ថានភាពកម្មកររងរបួសធ្ងន់ធ្ងរខ្លាំង បន្ទាប់ពីយកទៅសង្គ្រោះបន្ទាន់នៅមន្ទីរពេទ្យខេត្តស្វាយរៀង»។
ប្រមុខរដ្ឋាភិបាលកម្ពុជា ក៏បានអំពាវនាវផងដែរទៅកាន់ប្រជាពលរដ្ឋកម្ពុជាទាំងអស់ឲ្យធ្វើដំណើរបើកបរដោយភាពប្រុងប្រយ័ត្នខ្ពស់ និងត្រូវចូលរួមអនុវត្ត គោរពច្បាប់ចរាចរណ៍ឲ្យបានខ្ជាប់ខ្ជួនដើម្បីជៀសវាងកុំឲ្យមានគ្រោះថ្នាក់ចរាចរណ៌កើតឡើង៕
