ក្រុងភ្នំពេញ៖ ប្រមុខរដ្ឋាភិបាលកម្ពុជា សម្តេច ហ៊ុន សែន បានផ្ញើសារចូលរួមអបអរសារទរ និង ជូនពរជ័យចំពោះសាសនិកជនជាតិឥស្លាមកម្ពុជាទាំងក្នុងនិងក្រៅប្រទេស ព្រមទាំងនៅលើសកលលោក ឲ្យមានសិរីសួស្តី សុភមង្គល បវវរមហារប្រសើរ ក្នុងឱកាសពិធីបុណ្យចូលខែ រ៉ាម៉ាដន។
សារជូនពររបស់សម្តេចនាយករដ្ឋមន្រ្តី បានបង្ហោះនៅក្នុងបណ្តាញសង្គមហ្វេសបុក កាលពីព្រឹកថ្ងៃទី ១៧ ខែ ឧសភា ឆ្នាំ ២០១៨។
សម្តេច ហ៊ុន សែន បានសរសេថា៖ «ខ្ញុំសូមអបអរសាទរ និងសូមជូននូវពរជ័យ សិរីសួស្ដី សុភមង្គល បវរមហាប្រសើរ ជូនដល់បងប្អូនសាសនិកឥស្លាមកម្ពុជា ក្នុង និងក្រៅប្រទេស រួមទាំងបងប្អូន សាសនិកឥស្លាម នៅទូទាំងពិភពលោកផងដែរ ដែលបានចូលបួសខែរ៉ម៉ាឌន ដែលកម្ពុជានឹងចាប់ផ្ដើម នៅថ្ងៃព្រហស្បតិ៍ទី ១ ខែ រ៉ម៉ាដនឆ្នាំ ១៤៣៩ ម៉ូហាំម៉ាត់ សករាជ ត្រូវនឹងថ្ងៃទី ៣ កើត ខែ ជេស្ឋ ឆ្នាំច សំរឹទ្ធស័ក ព.ស ២៥៦២ ដែលត្រូវនឹងថ្ងៃទី ១៧ ខែ ឧសភា ឆ្នាំ ២០១៨ ។ខ្ញុំសូមបួងសួងអោយបងប្អូនទាំងអស់ទទួលបាននូវសេចក្កីសុខសប្បាយ ក្ដីមេត្តា ករុណាពីអល់ឡស់គ្រប់ៗគ្នា និង សុំអោយអល់ឡស់ទទួលយកនូវកុសលផលបុណ្យខែបួសរ៉ម៉ាឌន ទាំងអស់ដែលបងប្អូនបានប្រតិបត្តិ សាងឡើងកុំបីអាក់ខានឡើយ »។
សូមបញ្ជាក់ថា ពិធីបុណ្យខែរ៉ាម៉ាដន ឬបុណ្យតបអាហាររបស់អ្នកកាន់សាសនាឥស្លាម គឺ ពិធីនេះឡើងដើម្បីបង្ហាញពីភាពស្មោះស្ម័គ្ររបស់សាសនិកឥស្លាមចំពោះព្រះអល់ឡោះ ជាម្ចាស់។ ម្យ៉ាងទៀតព្រះអាល់ឡោះ បានដាក់កាតព្វកិច្ចបួសដល់អ្នកកាន់សាសនាឥស្លាមទាំងអស់នេះប្រយោជន៍អោយពួកគេមានជំនឿហើយខំកសាងកុសល ដើម្បីជាតិក្រោយ ។
សាសនិកឥស្លាម មានជំនឿថា ការបួសរបស់ពួកគាត់នៅលើលោកនេះ ពួកគាត់នឹងទទួលបានវិញនូវផលបុណ្យដ៏ធំធេងនៅថ្ងៃបរលោក៕
