ភ្នំពេញ៖ គណៈកម្មាធិការជាតិរៀបចំការបោះឆ្នោត បានច្រានចោលរាល់ការចោទពីសំណាក់មជ្ឈដ្ឋានមួយចំនួនមកលើគ.ជ.បថា ជាស្ថាប័ននេះ មានភាពលម្អៀង និងមិនឯករាជ្យចំពោះការបំពេញការរងាររបស់ខ្លួន។ក្នុងន័យនេះគ.ជ.ប មានការសោកស្ដាយ ដោយទទូចថា ប្រជាពលរដ្ឋខ្មែរគួរតែមានមោទនភាពជាតិចំពោះសមិទ្ធផលដ៏ធំធេងដែលគ.ជ.បបានខិតខំបំពេញការងារកន្លងមក។
តាមខ្លឹមសារនៅក្នុងសេចក្ដីប្រកាសព័តត៌មានដែលចុះផ្សាយនៅថ្ងៃទី២៩ មេសា ឆ្នាំ ២០១៨ ដដែលនេះ គ.ជ.ប បញ្ជាក់ថា ការចុះបញ្ជីគណបក្សនយោបាយ គឺត្រូវបានបើកចំហ និងធ្វើឡើងដោយត្រឹមត្រូវ ស្របតាមច្បាប់ស្ដីពីគណបក្សនយោបាយ។
គ.ជ.ប ថា គណបក្ស និងបេក្ខជនមានសិទ្ធិចូលរួម ឬមិនចូលរួមក្នុងការបោះឆ្នោត ហើយជាពិសេសមាត្រា ៣៤ នៃរដ្ឋធម្មនុញ្ញឆ្នាំ ១៩៩៣ បានចែងយ៉ាងច្បាស់ អំពីសិទ្ធិរបស់ពលរដ្ឋកម្ពុជាដែលមានសិទ្ធិបោះឆ្នោត និងមានសិទ្ធឈរឈ្មោះឱ្យគេបោះឆ្នោត។
គ.ជ.ប អះអាងថា ការដែលសហរដ្ឋអាមេរិក និងសហភាពអឺរ៉ុបបានព្យួរជំនួយពី គ.ជ.ប គឺជាហេតុផលផ្សេងមិនមែន គ.ជ.ប ធ្វើការមិនត្រឹមត្រូវនោះទេ។
គ.ជ.ប បានលើកឡើងបន្ដថា លទ្ធផលការងាររបស់ខ្លួននៃការរៀបចំការបោះឆ្នោតសកលជ្រើសរើសក្រុមប្រឹក្សាឃុំ-សង្កាត់ កាលពីថ្ងៃទី៤ ខែមិថុនា ឆ្នាំ២០១៧ កន្លងមក អ្នកអង្កេតការណ៍ជាតិ និងអន្ដរជាតិបានទទួលស្គាល់ថា គ.ជ.ប ជាស្ថាប័នឯករាជ្យ និអព្យាក្រឹត ។
នៅក្នុងលិខិតដដែលនេះ បញ្ជាក់ថា គ.ជ.ប គ្មានហេតុផលអ្វីត្រូវបោះបង់ចោលសមិទ្ធផលជាប្រវត្តិសាស្រ្ដរបស់ខ្លួនដែលទទួលស្គាល់ដោយសហគមន៍ជាតិ និងអន្ដរជាតិ ជាពិសេសអ្នកជំនាញការរបស់សហរដ្ឋអាមេរិក សហភាពអឺរ៉ុប ជប៉ុន និងកូរ៉េខាងត្បូង ដែលមានទីស្នាក់ការផ្ទាល់ជាមួយ គ.ជ.ប ជាយូរឆ្នាំមកហើយនោះទេ។
សមាភាពគណៈកម្មាធិការជាតិរៀបចំការបោះឆ្នោតដែលកើតចេញពីកិច្ចព្រមព្រៀងនយោបាយ រវាងគណបក្សប្រជាជនកម្ពុជានិងអតីតគណ បក្សសង្រ្គោះជាតិ មានសមាជិក ៩រូប គឺ ៤រូប មកពីបក្សធំៗនេះហើយមួយរូបទៀតជាមកពីសង្គមស៊ីវិល។
តាមរយៈកិច្ចព្រមព្រៀងនេះបាននាំអោយសហភាពអឺរ៉ុប និងអាមេរិក ព្រមទាំងសង្គមស៊ីវិលឃ្លាំមើលការបោះឆ្នោតចាត់ទុកថា ជាតុល្យភាពនៃអំណាចរបស់ស្ថាប័ននេះ។ តែ គ.ជ.ប នៅពេលនេះ មានសមាសភាពថ្មីដែលរើសតាំងចេញពីគណបក្សហ្វ៊ុនស៊ិនប៉ិច ដែលមិនមានអាសនៈនៅរដ្ឋ សភា ខណៈសមាសភាព ៣រូប របស់បក្សប្រឆាំងបានលាលែងបន្ទាប់ពីបក្សនេះ ត្រូវបានរំលាយដោយតុលាការកំពូលកាលពីថ្ងៃទី ១៦ វិច្ឆិកា ឆ្នាំ ២០១៧។
លោក សំ គន្ធាមី នាយកប្រតិបត្តិគណៈកម្មាធិការអព្យាក្រឹត និងយុត្តិធម៌ដើម្បីការបោះឆ្នោតដោយសេរី និងត្រឹមត្រូវនៅកម្ពុជា (NICFEC) មើលឃើញថា ការដែលមានព័ត៌មានលើកឡើងថា គ.ជ.ប ធ្វើការដោយមិនមានភាពត្រឹមត្រូវ ឬមិនអព្យាក្រឹតនោះដោយសារតែកន្លងមកមានការផ្លាស់ប្ដូរសមាសភាពគ.ជ.ប ។ ប៉ុន្ដែយ៉ាងណាលោកថា គ.ជ.ប ក៏បានខិតខំប្រឹងប្រែងណាស់ដែរចំពោះការងារកន្លងមក។លោកសង្ឃឹមថា គ.ជ.ប នឹងបន្ដសម្មភាពការងាររបស់ខ្លួនអោយបានល្អជាងនេះទៀត។
លោក សំ គន្ធាមី ៖«យើងសង្កេតមើលឃើញថា កន្លងមកសមាជិក(គ.ជ.ប) ៣នាក់បានសុំលាឈប់ សមាជិកថ្មីមកពីគណបក្សនយោបាយចូលមក ការពិតទៅមើលមានការិះគន់មែន។ ប៉ុន្ដែតាមការសង្កេតមើលឃើញថា គ.ជ.ប មានការប្រឹងប្រែង ព្យាយាមដើម្បីរៀបចំការងារចាត់ចែងការបោះឆ្នោត អោយមានភាពឯករាជ្យភាព ត្រឹមត្រូវ »។
សូមរំលឹកថា ការបោះឆ្នោតសភា នីតិកាលទី៦នឹងធ្វើឡើងនៅថ្ងៃទី ២៩ ខែកក្កដា ឆ្នាំ២០១៨ ហើយនៅខណៈនេះ គ.ជ.ប ចាប់ផ្ដើមទទួលចុះបញ្ជីឈ្មោះគណបក្សនយោបាយដែលត្រូវចូលរួមប្រកួតនៅក្នុងការបោះឆ្នោតនេះ។ គណបក្សប្រជាជនកម្ពុជាដែលជាបក្សកាន់អំណាចជិត ៤០ឆ្នាំមកហើយនេះ គឺ បានចុះឈ្មោះបក្ស និងបេក្ខជនតំណាងរាស្ត្ររបស់ខ្លួនរួចរាល់ហើយ ៕
