ភ្នំពេញ៖ ក្រុមប្រឹក្សាភិបាលនាយកប្រតិបត្តិធនាគារពិភពលោកនៅថ្ងៃទី ២៦ ខែមេសា ឆ្នាំ ២០១៨ សម្រេចអនុម័តហិរញ្ញប្បទានទឹកប្រាក់៩០លានដុល្លារ ដើម្បីលើកកម្ពស់គុណភាពកម្រិតឧត្តមសិក្សា និងការងារស្រាវជ្រាវនៅកម្ពុជា។
យោងតាមសេចក្តីប្រកាសព័ត៌មាន គម្រោងនេះ នឹងជួយបង្កើនលទ្ធភាពសម្រាប់សិស្សក្រីក្រកម្ពុជាទទួលបានការអប់រំនៅថ្នាក់ឧត្តមសិក្សា។
ជាមួយគ្នានេះ គម្រោងនេះមានរយ:ពេល ៦ឆ្នាំដើម្បីជួយបង្កើនសមត្ថភាពស្ថាប័តឧត្តមសិក្សា និងជួយបង្កើនគុណភាពអប់រំ និងកិច្ចការស្រាវជ្រាវ រួមទាំងបង្កើនអភិបាលកិច្ចក្នុងវិស័យអប់រំ។
គម្រោងទឹកប្រាក់ ៩០លានដុល្លារនេះ ផ្តោតការយកចិត្តទុកដាក់លើមុខវិជ្ជា វិទ្យាសាស្រ្ត បច្ចេកវិទ្យា វិស្វកម្ម គណិតសាស្រ្ត កសិកម្ម។
គេរំពឹងថា និស្សិតកម្ពុជានឹងទទួលបានជំនាញ និងចំណេះដឹង ក្នុងការឆ្លើយតបជាមួយតម្រូវការទីផ្សារកាងារក្រោយបញ្ចប់ការសិក្សា។
គម្រោងនេះក៏ជួយគាំទ្រគោលនយោបាយការអភិវឌ្ឍឧស្សាហកម្មតាមរយៈសកម្មភាពធំចំនួន៥ រួមមាន ការផ្តល់មូលនិធិសម្រាប់សិក្សាស្រាវជ្រាវលើមុខវិជ្ជាអាទិភាព ពង្រីកបន្ទប់សិក្សា មន្ទីរពិសោធន៍ និងសាងសង់និវេសនដ្ឋានសម្រាប់និស្សិតក្រីក្រស្នាក់នៅ។
ពិសេសនិសិ្សតស្រ្តីមកពីគ្រួសារក្រីក្ររស់នៅតំបន់ដាច់ស្រយាល ហើយជួយពង្រឹងប្រព័ន្ធធានាគុណភាពនិងប្រព័ន្ធព័ត៌មាន និងធ្វើការជាមួយដៃគូរអន្តជាតិក្នុងការកែលម្អ កម្មវិធី និងវិធីសាស្រ្តបង្រៀនចំពោះមុខវិជ្ជាអាទិភាព។
ព្រមទាំងការសង់និវេសនដ្ឋានសម្រាប់សិស្សនៅរាជធានីភ្នំពេញ និងពង្រីកអាគារសិក្សា ឬហេដ្ឋារចនាសម្ព័ន្ធស្ថាប័នឧត្តមសិក្សាចំនួនពីរនៅខេត្តបាត់ដំបង និងស្វាយរៀង។
លោកស្រី អ៊ីហ្គូណា ដូបាច្រា នាយិកាគ្រប់គ្រងធនាគារពិភពលោកប្រចាំនៅកម្ពុជាមានប្រសាសន៍ថា ការកសាងសមត្ថភាពស្រាវជ្រាវអោយមានគុណភាពខ្ពស់ជាការត្រៀមនិស្សិតថ្នាក់ឧត្តមសិក្សាក្រោយបញ្ចប់ការសិក្សាដោយគម្រោងនេះ នឹងជួយក្រសួងអប់រំ យុវជន និងកីឡាកសាងសមត្ថ ភាពនិស្សិតខ្មែរ ដើម្បីឆ្លើយតបតម្រូវការទីផ្សារការងារ។
ទាក់ទងគម្រោងនេះ លោក អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុឲ្យដឹងថា គម្រោងនេះនឹងជួយបង្កើនយុទ្ធសាស្រ្តគ្រប់ជ្រុងជ្រោយរបស់រដ្ឋាភិបាលសម្រាប់អភិវឌ្ឍសិស្សក្នុងថ្នាក់ឧត្តមសិក្សា និងជាឱកាសកាន់តែច្រើនក្នុងការចល័ត និងផ្ទេរបច្ចេកវិទ្យានៅបណ្តាប្រទេសជាសមា ជិកអាស៊ាន៕
