វេណេហ្សូអេឡា៖ វេនយុទ្ធនាការឃោសនាកបោះឆ្នោតប្រធានាធិបតីនៃប្រទេសវេណេហ្សូអេឡា ដែលប្រឈមុខជាខ្លាំងចំពោះការទទួលភាពស្របច្បាប់ពីសហគមន៍អន្តរជាតិនិងអង្គការសហប្រជាជតិ បានចាប់ហើយនៅថ្ងៃទី២៣មេសានេះខណៈបក្សប្រឆាំងប្រកាសធ្វើពហិការ។
លោក រឿន រិទ្ធី ជូនសេចក្ដីរាយការណ៍!!
តាមទីភ្នាក់ងារសារព័ត៌មាន Reuters លោកប្រធានាធិបតី នីកូឡាស់ ម៉ាឌូរ៉ូ បានបើកឃោសនារកសំឡេងឆ្នោតនៅថ្ងៃនេះតែម្ដង។ លោកបានស្រែកទៅកាន់អ្នកគាំទ្រលោកថា ការបោះឆ្នោតថ្ងៃទី ២០ ឧសភានេះ ប្រៀបបាននឹងការធ្វើយុទ្ធនាការ សង្រ្គាមសេដ្ឋកិច្ចមួយប្រឆាំងអាមេរិក និងប្រទេសណាដែលដាក់ទណ្ឌកម្មលើប្រទេសវេណេហ្សូអេឡា។
លោក ម៉ាឌូរ៉ូ ក៏បានសន្យាធ្វើអោយជីវភាពប្រជាជនវេណេហ្សូអេឡាមានភាពល្អប្រសើរជាងមុន។ ប៉ុន្តែការបោះឆ្នោតដែលអ្នកសង្កេតការណ៍គិតថា អ្នកចេញទៅបោះឆ្នោតមានចំនួនតិចជាងមុន ខណៈបក្សប្រឆាំងធ្វើពហិការ គឺជាការឃោសនានាំមកជាមួយនូវកាដូ និងជំនួយទិញទឹកចិត្តអ្នកបោះឆ្នោតត្រូវបានទីភ្នាក់ងារសារព័ត៌មាន Reuters ចុះផ្សាយមានពាសពេញប្រទេស។
យ៉ាងណាក៏ដោយការបោះឆ្នោតនេះក៏មានបេក្ខជនមកពីបក្សតូចៗជាច្រើនចូលរួម។ តែក្រុមនេះ ត្រូវបានអ្នកសង្កេតការណ៍បានហៅក្រុមបក្សតូចៗនេះថា គ្រាន់តែការបង្ហាញតុល្យភាពនៃការដណ្ដើមសន្លឹកតិចតួចប៉ុណ្ណោះ។
សូមជម្រាបថា គណៈកម្មាធិការរៀបចំបោះឆ្នោតប្រទេសវេណេហ្សូអេឡាបានលើកពេលបោះឆ្នោតប្រធានាធិបតីម្ដងហើយ ដែលបម្រុងធ្វើឡើងកាលពីថ្ងៃទី ២៤មេសា។
ការលើកពេកនេះ បន្ទាប់ពីលោក ម៉ាឌូរ៉ូ នៅរង់ចាំការចូលរួមរបស់មេដឹកនាំបក្សប្រឆាំងដែលនិរទេសខ្លួនត្រឡប់ចូលប្រទេសវិញ។ តែបែបនេះក្ដី ក្រុមប្រឆាំងដែលគាំទ្រដោយសហរដ្ឋអាមេរិកនៅតែបន្តធ្វើពហិការដោយចាត់ទុកថា បរិយាកាសបោះឆ្នោតធ្វើឡើងដោយភាពភ័យខ្លាចគំរាមកំហែង និងទិញសន្លឹកឆ្នោត។
ទាំងសហរដ្ឋអាមេរិក និងសហភាពអឺរ៉ុបបានព្រមានថា នឹងមិនទទួលស្គាល់លទ្ធផលបោះឆ្នោតនោះទេ។ ជាមួយគ្នានេះឧត្តមស្នងការសិទិ្ធមនុស្ស របស់អង្គការសហប្រជាជាតិក៏បានទាមទារអោយការបោះឆ្នោតនេះ ត្រូវតែមានវត្តមានមេបក្សប្រឆាំងដែលនិរទេសខ្លួន បើពុំនោះទេភាពស្របច្បាប់របស់រដ្ឋាភិបាលចេញពីការបោះឆ្នោតនឹងប្រឈមមុខជាខ្លាំងនឹងការទទួលស្គាល់ពីសហគមន៍អន្តរជាតិ៕
