ភ្នំពេញ៖ គ្រោះធម្មជាតិខ្យល់កន្ត្រាក់លាយឡំភ្លៀងកក់ខែនៅចុងសប្តាហ៍កន្លងមកនេះបណ្តាលឲ្យរលំ និងប៉ើងដំបូលផ្ទះប្រជាពលរដ្ឋយ៉ាងតិច៧ខ្នង ស្ថិតក្នុងស្រុកមួយនៃខេត្តសៀម និង រន្ទះបាញ់សម្លាប់មនុស្ស ២ នាក់ ស្ថិតនៅខេត្តបាត់ដំបង។
យ៉ាងតិចផ្ទះប្រជាពលរដ្ឋ ២ ខ្នងដួលរលំ និង ៥ ខ្នង របើកដំបូលផ្ទះ ដោយបណ្តាលឲ្យស្ត្រីម្នាក់រងរបួសស្រាលរលាតដៃជើង ស្ថិតនៅស្រុកជីក្រែង ខេត្ត សៀមរាប កាលពីថ្ងៃទី ២២ ខែ មេសានេះ។ នេះបើតាម លោក កែវ វី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ។
តាមលោកកែវ វី គ្រោះធម្មជាតិខ្យល់កន្ត្រាក់ និង ភ្លៀងកក់ខែបានធ្វើឲ្យផ្ទះរបស់ប្រជាពលរដ្ឋ ៣៦៧ ខ្នងរងផលប៉ះពាល់របើកដំបូល និង ដួលរលំ កាលពីអំឡុងថ្ងៃចូលឆ្នាំខ្មែរ ។
លោក កែវ វី ប្រាប់វិទ្យុស្ត្រីថា កាលពីល្ងាចថ្ងៃម្សិលមិញ (ថ្ងៃទី ២២ មេសា) មានករណីរន្ទះបាញ់បង្កឲ្យយុវជនឈ្មោះ តិញ តុលា អាយុ ២១ ឆ្នាំ ស្លាប់ នៅពេលដើរចេញទៅក្រៅពេលមេឃកំពុងភ្លៀង ។ ករណីរន្ទះបាញ់នេះ បានកើតឡើងនៅស្រុកឯកភ្នំ ខេត្តបាត់ដំបង។
ចំណែក រន្ទះបាញ់មួយករណីទៀតបណ្តាលបុរសវ័យ ៥៤ ឆ្នាំ ម្នាក់ ឈ្មោះ ខ្មែត សាវេត ស្លាប់ភ្លាមៗ នៅពេលគាត់ជិះម៉ូតូទៅស្រែពេលភ្លៀងធ្លាក់ខ្លាំង ស្ថិតនៅក្នុងស្រុកសង្កែ ខេត្តបាត់ដំបង។
លោក កែវ វី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ អះអាងថា ចាប់តាំងពីដើមឆ្នាំ ២០១៨នេះ យ៉ាងតិចមនុស្សស្លាប់ ១៦ នាក់ ដោយសាររន្ទះបាញ់។ ក្នុងនោះមានស្ត្រី ៤ នាក់ ហើយរបួសមនុស្ស ៩ នាក់ និង គោក្របីងាប់ ៨ ក្បាល។
យោងតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយនៅរយៈពេល ៣ ខែដើមឆ្នាំ ២០១៨នេះ ខ្យល់ព្យុះ ខ្យល់កន្ក្រាក់ដែលវាយប្រហារផ្ទះប្រជាពលរដ្ឋ និងអគារផ្សេងៗ មានចំនួនតិចជាងឆ្នាំ២០១៧ ពោលគឺខ្យល់ព្យុះ និងខ្យល់កន្ក្រាក់បានកើតឡើងចំនួន ២០ លើក ក្នុងនោះ នៅរាជធានីនិង ខេត្ដ ចំនួន ០៨។ គ្រោះធម្មជាតិបង្កឲ្យខូចខាត និងរលំផ្ទះប្រជាពលរដ្ឋធ្ងន់ធ្ងរ ៩៧ ខ្នង ខូចខាតមធ្យម និងរបើកដំបូល ២០១ ខ្នង។ របើកដំបូលសាលារៀន ៥ អគារ និងបង្កឲ្យមនុស្ស ០២នាក់រងរបួស។
ក្រសួងធនធានទឹកនិងឧតុនិយម នៅថ្ងៃចន្ទនេះ បានចេញសេចក្តីជូនដំណឹង អំពីបញ្ហាអាកាសធាតុថា កម្ពុជានឹងទទួលរងឥទ្ធិពលសម្ពាធទាប នឹងបង្កឲ្យមានភ្លៀងធ្លាក់ពីមធ្យមទៅច្រើនស្ទើរទូទាំងប្រទេសចាប់ពីថ្ងៃទី ២៣ ខែមេសា ឆ្នាំ ២០១៨ រហូតដល់ថ្ងៃទី ២ ខែ ឧសភា ឆ្នាំ ២០១៨។
ដើម្បីការពារខ្លួនកុំឲ្យកើតមានគ្រោះធម្មជាតិរន្ទះបាញ់ លោក កែវ វី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ អំពាវនាវឲ្យប្រជាពលរដ្ឋមានការប្រុងប្រយ័ត្នខ្ពស់កុំបើកវិទ្យុ ទូរទស្សន៍ និងទូរស័ព្ទដៃនៅពេលមេឃកំពុងភ្លៀង ហើយមិនគួរជ្រកភ្លៀងក្រោមដើមឈើ ឬ បើជ្រកភ្លៀងក្រោមដើមឈើគួរឈរឲ្យឆ្ងាយពីគល់ឈើយ៉ាងតិចបីម៉ែត្រ៕
