ភ្នំពេញ ៖ សមត្ថកិច្ចខេត្ដព្រៃវែង បានប្រាប់ឲ្យដឹងថា ជនសង្ស័យ ករណីរំលោភហើយសម្លាប់កុមារីអាយុ ០៥ឆ្នាំ កាលពិថ្ងៃទី១៧ ខែមេសា សមត្ថកិច្ចបានកំណត់មុខសញ្ញាហើយ។ សមត្ថកិច្ចបញ្ជាក់ថា នឹងចាប់ជនល្មើសមកផ្ដន្ទាទោស ឲ្យបាន។
លោក លៀ ស៊ីណា រាយការណ៍ ៖
អំពើដែលសង្គមស្អប់ខ្ពើម និងថ្កោលទោសខ្លាំងបំផុតមួយ បានកើតឡើងទៅលើកុមារីម្នាក់អាយុ ០៥ឆ្នាំ ត្រូវបានជនដៃដល់ចាប់រំលោភហើយសម្លាប់ ដោយបោះចូលទៅក្នុងស្រះទឹក។ កុមារីម្នាក់នេះ មានឈ្មោះ ចាន់ ស្រីជេត រស់នៅក្នុងភូមិសទ្ធា ឃុំរំចេក ស្រុកព្រះស្ដេច ខេត្ដព្រៃវែង។
លោកឧត្ដមសេនីយ៍ត្រី ពៅ ជីវី ស្នងការរងខេត្ដព្រៃវែង បានប្រាប់វិទ្យុស្ដ្រីនៅថ្ងៃទី១៨ ខែមេសានេះថា ហេតុការណ៍ដ៏រន្ធត់នេះ បានកើតឡើងកាលពីថ្ងៃទី១៧ ខែមេសា ឆ្នាំ២០១៨ វេលាម៉ោង ១៤៖៣០នាទី រសៀល ស្ថិតនៅក្នុងវត្ដសទ្ធា ដែលកុមារីរងគ្រោះ ត្រូវបានចាប់រំលោភនៅក្នុងចេតិយ ហើយសម្លាប់បំបិទមាត់ ដោយបោះចូលទៅក្នុងស្រះទឹកនៅក្នុងវត្ដ។ ទង្វើដែលមនុស្សគ្រប់គ្នាកំណត់ថា ជាអំពើអសីលធម៌នេះ បានកើតឡើងខណៈប្រជាពលរដ្ឋដែលរស់នៅក្នុងខេត្ដនេះ កំពុងប្រារព្ធពិធីស្រង់ព្រះ ក្នុងឱកាសពិធីបុណ្យចូលឆ្នាំថ្មីប្រពៃណីជាតិ។ យ៉ាងណាលោកសង្កត់ធ្ងន់ថា ពេលនេះ សមត្ថកិច្ចបានកំណត់មុខសញ្ញា និងតម្រុយពីជនប្រព្រឹត្ដក្នុងករណីនេះបានហើយ។
លោកឧត្ដមសេនីយ៍ត្រី ពៅ ជីវី ៖«បាទខាងខ្ញុំកំពុងតែស្វះស្វែងស្រាវជ្រាវយ៉ាងហ្មត់ចត់ ឥឡូវយើងមានតម្រុយហើយ ប៉ុន្ដែការងារតម្រុយនេះខ្ញុំអត់អាចជូនទៅបានទេ ព្រោះស្ថិតនៅក្នុងអាថ៌កំបាំងក្នុងការស៊ើបអង្កេត»។
បញ្ហានេះបានក្លាយជាក្ដីបារម្ភមួយសម្រាប់ប្រជាពលរដ្ឋក្នុងភូមិស្រុក ពិសេសគឺឪពុកម្ដាយ ដែលមានកូនស្រី។ ត្រង់ចំណុចនេះ លោកឧត្ដមសេនីយ៍ត្រី ពៅ ជីវី បានបញ្ជាក់ថា ក្នុងនាមជាអាជ្ញាធរ ក៏មានក្ដីបារម្ភជាខ្លាំងមិនចាញ់អាណាព្យាបាលទាំងនោះប៉ុន្មានទេ។ លោកបន្ដថា កន្លងមកអាជ្ញាធរបានព្យាយាមក្នុងការចុះផ្សព្វផ្សាយអប់រំ ដល់ឪពុកម្ដាយ កុំបណ្ដោយកូនរបស់ខ្លួននៅជាមួយអ្នកផ្សេង ក្រៅពីការគ្រប់គ្រងរបស់ខ្លួន។
លោកឧត្ដមសេនីយ៍ត្រីមើលឃើញថា ដោយសារតែភាពជឿនលឿនៃបច្ចេកវិទ្យាកាន់តែខ្លាំង ការប្រើប្រាស់គ្រឿងញៀន រួមផ្សំនិងការធ្វេសប្រហែសពីឪពុកម្ដាយ បានធ្វើឲ្យជនល្មើសហ៊ានប្រព្រឹត្ដទង្វើដែលសង្គមស្អប់ខ្ពើមដូចនេះ។
លោកឧត្ដមសេនីយ៍ត្រី ពៅ ជីវី ៖«រឿងហ្នឹងតាមមើលគឺការអភិវឌ្ឍនៃប្រទេស ហើយក៏ដូចជាការជឿនលឿននៃវិទ្យាសាស្ដ្រវាធ្វើឲ្យការប្រែប្រួលក៏ដូចជាអ្វីៗទាំងអស់។ ដូចយើងដឹងថា ព័ត៌មានវិទ្យាទី១ វាមានផ្សាយដូចជារូបភាពអាសអាភាសអីអញ្ចឹង ទី២ វាប៉ះពាល់ដោយការប្រើប្រាស់គ្រឿងញៀនអីផ្ដេសផ្ដាស់អញ្ចឹងទៅ ហើយទី០៣ គឺដោយសារការធ្វេសប្រហែសពីឪពុកម្ដាយក្នុងការថែទាំ»។
លោកឧត្ដមសេនីយ៍ត្រី ពៅ ជីវី ប្ដេជ្ញាថា នឹងតាមចាប់ជនល្មើសរូបនោះឲ្យបាន ដើម្បីយកមកផ្ដន្ទាទោសទៅតាមផ្លូវច្បាប់។ ទន្ទឹមការប្ដេជ្ញាចិត្ដនេះ លោកក៏សំណូមពរដល់ប្រជាពលរដ្ឋ ឲ្យមានការសហការផ្ដល់ព័ត៌មានដល់សមត្ថកិច្ចឲ្យបានច្រើន តាមអ្វីដែលខ្លួនដឹង ដើម្បីឈានទៅដល់ការចាប់ជនល្មើស និងបង្ក្រាបសកម្មភាពអសីលធម៌ដូចនេះ៕
