ដោយមិនបានប្រតិកម្មធ្ងន់ៗវាយបកអាមេរិក ករណី ក្រុងវ៉ាស៊ីនតោនរៀបចំធ្វើសង្ក្រាមពាណិជ្ជកម្មប្រឆាំងនឹងខ្លួន ក្រុងប៉េកាំង គ្រាន់តែនិយាយថា មិនមាននរណាឈ្នះរឿងនេះ។ តែរដ្ឋាភិបាលរបស់លោក ដូណាល់ត្រាំ ទំនងមិនដកថយឡើយ។
កញ្ញា យីលុយ ហ៊ាង ជូនសេចក្ដីរាយការណ៍៖
ថ្លែងនៅក្នុងសន្និបាតសភា ប្រជាជន កាលពីថ្ងៃអង្គារ លោកនាយករដ្ឋមន្ត្រីចិន លី កឺឈាង បង្ហាញក្ដីសង្ឃឹមថា ប្រទេសទាំងពីរ អាចរក្សារឿងនៅស្ងាត់ស្ងៀមបានបន្តទៀត។ លោករំពឹងថាសហរដ្ឋអាមេរិក នឹងបន្ធូរបន្ថយ ការរឹតត្បិត ការនាំទំនិញចូលប្រទេសចិន។
តែយោងតាម ច្បាប់ពាណិជ្ជកម្ម ត្រង់ប្រការ ៣០១ បានចែងផ្ដល់សិទ្ធិឲ្យរដ្ឋាភិបាលមួយ ធ្វើសេចក្ដីសម្រេចដោយឯកតោភាគី ដាក់ទណ្ឌកម្មលើប្រទេសណា ដែលខ្លួនរកឃើញថា មានភាពមិនត្រឹមត្រូវលើជញ្ជីងពាណិជ្ជកម្ម។ យោងតាមប្រការនេះ នាំឲ្យអាមេរិកមានសិទិ្ធសម្រេច ដាក់ទណ្ឌកម្មលើប្រទេសចិនដោយ ប្រការណាមួយដែលខ្លួនគិតថាចាំបាច់។
តាមបណ្ដាញផ្សាយព័ត៌មានBBC រដ្ឋការរបស់លោកត្រាំ កំពុងតែរៀបចំគម្រោងនៃការប្រកាសដាក់ទណ្ឌកម្មលើប្រទេសចិន ក្នុងពេល ឆាប់ៗខាងមុខនេះហើយ។ក្រុងវ៉ាស៊ីនតោន មានវិធានការដូចនេះ បន្ទាប់ពីការស៊ើបអង្កេត ដោយបានរកឃើញ ចិននៅតែបន្តលួចប្រើប្រាស់ និងផ្ទេរកម្មសិទ្ធិបញ្ញាលើប្រភេទផលិតផលរបស់អាមេរិកក្នុងការធ្វើពាណិជ្ជកម្មដែលក្រុងវ៉ាស៊ីនតោន ហៅថាជាចោរលួចកម្មសិទ្ធិបញ្ញា។
BBC ចុះផ្សាយនៅថ្ងៃនេះថា ការប្រកាសដាក់ទណ្ឌកម្មនៅពេលនេះ បន្ទាប់ពីអាមេរិកបាន ពិភាក្សាជាមួយចិនជាច្រើនឆ្នាំមកហើយ ប៉ុន្តែចិននៅតែមិនព្រមផ្លាស់ប្តូរជំហរ ដែលជាហេតុធ្វើឱ្យបរាជ័យការការពារកម្មសិទ្ធិបញ្ញា។ ការដាក់ទណ្ឌកម្មនេះគឺគ្រោងធ្វើឡើងតាមរយៈ ការរឹតបន្តឹងពន្ធនាំចូលពីចិន ហើយរួមទាំងការដាក់វិធានការផ្សេងៗទៀត។ វិធានការនេះ សេតវិមាននឹងដំឡើងពន្ធនាំចូលនិង ការវិនិយោគផ្សេងៗពីចិនមានប្រមាណពី៣០ទៅ៦០ពាន់លានដុល្លារ។ ជាមួយគ្នានេះ អាមេរិកព្រមានថា អាមេរិកក៏កំពុងតែរៀបចំពាក្យបណ្តឹងដាក់ទៅអង្គការពាណិជ្ជកម្មពិភពលោកជុំវិញករណីនេះដែរ។
មន្ត្រីជាន់ខ្ពស់របស់អាមេរិកដែលកាន់សំណុំរឿង នេះគឺលោក Robert Lighthizer បានថ្លែងប្រាប់សមាជិកសភាកាលពីថ្ងៃទី២១មីនាថា អាមេរិកកំពុងស្វែងរកការដាក់ទណ្ឌកម្មធ្ងន់បំផុតលើប្រទេសចិន។លោកថាការការពារកម្មសិទ្ធិបញ្ញារបស់អាមេរិកគឺជាការរក្សាសេដ្ឋកិច្ចរបស់អាមេរិក។ មានការព្រមានថា ការដាក់ទណ្ឌកម្មរបស់អាមេរិក ប្រឆាំងចិននាំឱ្យមានសង្គ្រាមពាណិជ្ជកម្មរីករាលដា។
មន្ត្រីអាមេរិកម្នាក់ បាននិយាយប្រាប់អ្នកសារព័ត៌មានថាក្រុងវ៉ាស៊ីនតោនមានភសត្តុតាងក្នុងដៃរូចហើយ ដើម្បីប្រឆាំងចិន ដោយបង្ខំឱ្យចិនព្រមានទៅក្រុមហ៊ុនរបស់ខ្លួនកុំ បន្តលួច កម្មសិទិ្ធបញ្ញានេះទៀត។ លោក អះអាងថាភសត្តុតាងទាំងនេះ នឹងអាចនាំចិនឡើងតុលាការ ហើយ ប្រឈមមុខនឹង បទចោទប្រឆាំងនឹងខ្លួន។ តែបែបនេះក្នី លោកRobert Lighthizer រំពឹងថា ចិនពិតជាសងសឹង ហើយធ្វើអោយប៉ះពាល់ ផលិតផលកសិកម្ម របស់អាមេរិក។ តែមិនអាចបញ្ឈប់អាមេរិកបានឡើយ។ អ្នកសង្កេតការណ៍ព្រមានថា បើអាមេរិកនាំមុខក្នុងការដាក់ទណ្ឌកម្មលើប្រទេសចិន ករណីជម្លោះពាណិជ្ជកម្ម គឺសហភាពអឺរ៉ុបអាចនឹងធ្វើតាមអាមេរិក ហើយពេលនោះចិន នឹងកាន់តែប្រឈមមុខកាន់តែខ្លាំង៕
