ភ្នំពេញ៖លោកសាស្ត្រាចារ្យសកលវិទ្យាល័យកម្ពុជាដែលរងការវាយដំពីសំណាក់មហាជនចោទករណីបង្កគ្រោះថ្នាក់ចរាចរណ៍ហើយព្យាយាមរត់គេចបានច្រានចោលថាខ្លួនមិនបានប្រព្រឹត្តដូចការចោទប្រកាន់ទេ។ តែជាមួយគ្នានេះ មនុស្ស៣នាក់ត្រូវបានចោទប្រើហិង្សាលើលោកសាស្ត្រាចារ្យត្រូវបានសមត្ថកិច្ចឃាត់ខ្លួនហើយកសាងសំណុំរឿងឡើងតុលាការ ។
កាលពីថ្ងៃអាទិត្យ ទី១១ ខែមីនា សប្តាហ៍មុន លោក ស៊ុយ សារ៉េត សាស្ត្រាចារ្យភាសាអង់គ្លេសនៅសកលវិទ្យាល័យកម្ពុជាត្រូវបានមហាជនឃាត់រថយន្តវាយដំរងរបួសធ្ងន់ធ្ងរ។ហ្វូងមនុស្សវាយប្រហារលើលោកសាស្ត្រាចារ្យបានចោទបុរសនេះថាបានបើកឡានបុកមនុស្ស ហើយរត់គេចខ្លួនពីការទទួលខុសត្រូវ។លោកសាស្ត្រាចារ្យត្រូវបានហ្វូងមនុស្សវាយតំដោយប្រើដុំថ្ម ដុំឥដ្ឋ រងរបួសធ្ងន់បាក់ថ្គាម រង្កើធ្មេញបែកក្បាលហូរឈាមស្រោចខ្លួន។
ការចំណាយពេលសម្រាកព្យាបាលជំងឺអស់រយៈពេលជិត១០ថ្ងៃនៅប្រទេសវៀតណាមធ្វើអោយលោក ស៊ុយ សារ៉េត មានស្ថានភាពធូរស្រាលហើយនិយាយបានទៀតផង។
កាលពីថ្ងៃ ចន្ទ ទី១៩ ខែមីនា ម្សិលមិញនៅលើបណ្តាញសង្គមហ្វេសប៊ុកគេបានឃើញលោកសាស្ត្រាចារ្យដេកលើគ្រែពេទ្យ ហើយនិយាយតិចៗដោយបដិសេធថា លោកពុំបានបើកឡានបុកម៉ូតូទេគឺម៉ូតូរបស់បុរសម្នាក់នោះទេ ជាអ្នកបើកបុកគូទឡានគាត់នៅផ្នែកស្តាំហើយដួល។
លោក ស៊ុយ សារ៉េត វ័យ ៥២ ឆ្នាំ ពន្យល់នៅក្នុងវីដេអូឃ្លីបដោយសំឡេងស្អក់ៗថាមុនម៉ោងកើតហេតុលោកបានបើកឡានចេញពីម្តុំអតីតផ្ទះចាស់របស់លោកនៅខណ្ឌឬស្សីកែវរាជធានីភ្នំពេញដើម្បីទៅទទួលភរិយា របស់លោកចេញពីហូបការ។
នៅពេលនោះលោកថាមានក្មេងស្ទាវម្នាក់ជិះម៉ូតូបណ្តើរលេខទូរស័ព្ទបណ្តើររួចក៏បុកគូទឡានបុរសម្នាក់ធ្វើឲ្យលោកបង្ខំចាប់ហ្វ្រាំងឡាន។លោកបន្ថែមថាចាប់ហ្វ្រាំងឡានក៏មានបុរសវ័យចំណាស់ពីរនាក់បើកបរក្នុងស្ថានភាពស្រវឹងមកគៀរឡានគាត់នៅផ្នែកខាងស្តាំ។ប៉ុន្តែលោកមិនបញ្ជាក់អំពីស្ថាន ភាពម៉ូតូបើកបរដោយបុរសវ័យកណ្តាលមានស្ថានយ៉ាងណាឡើយ។
លោក ស៊ុយ សារ៉េត៖«ប្អូនម្នាក់វាលេងទូរស័ព្ទដល់ឡានខ្ញុំចាប់ហ្វំាងវាក៏ជិះទៅបុខគូទឡានគេ ហើយវាក៏ដួលនៅខាងមុខខាងស្តំាដៃ ហើយខ្ញុំក៏ចាប់ហ្វំាងដោយចាប់ហ្វំាងទៅមាម៉ូតូស្រវឹងមានមនុស្សចាស់ខ្ទង់វ័យ៤០ពីរនាក់ដូចអត់អាវបើតាមខ្ញុំដឹង អត់មានពាក់មួកទៀត(សុវត្ថិភាព)ដោយជិះមកគៀរឡានខ្ញុំនៅខាងស្តំា។»
លោកសាស្ត្រាចារ្យបកស្រាយក្នុងវីដេអូឃ្លីបថាបន្ទាប់មកលោកក៏បើកឡានគេចពីម៉ូតូស្ទាវម្នាក់នោះដែលបុកគូទឡានគេហើយដួលនៅមុខឡានលោកផ្នែកខាងស្តាំគឺនៅពេលនោះហើយដែលមានក្រុមស្ទាវជិះម៉ូតូពីរបី គ្រឿងស្រែកឲ្យឈប់ឡានដោយចោទថាបើកឡានបុកគេហើយរត់គេច។មិនយូរប៉ុន្មានក្រុមស្ទាវទាំងនោះយកមួកសុវត្ថិភាពវាយបំបែកកញ្ចក់ឡានហើយវាយដំមកលើលោកដោយមិនស្តាប់ហេតុផលអ្វីទាំងអស់។
លោក ស៊ុយ សារ៉េត៖«ម៉ូតូស្ទាវពីរបីគ្រឿងអាចិនៗបុករះគេហើយអត់ទទួលខុសត្រូវ ឯងចិន ហើយវាយកមួកសុវត្ថិភាពវៃកញ្ចក់ឡានខ្ញុុំកញ្ជក់បែកហើយ ខ្ញុំក៏ទម្លាក់កញ្ចក់ថាអូនមិនបានជាអូនម៉ិចមកវាយឡានពូ អាមួយទៀតហក់មកវៃយកៗ ខ្ញុំបែកឈាមរហូតចង់សន្លប់ ហើយខ្ញុំគិតថាបើកឲ្យខាងមសត្ថកិច្ចជួយដ៏បើកទៅអត់មានអ្នកណាជួយ។»
ទាក់ទងរឿងនេះ មន្ត្រីអង្គការសង្គមស៊ីវិលអំពាវនាវឲ្យប្រជាពលរដ្ឋបញ្ឈប់ការប្រើអំពើហិង្សាលើជនសង្ស័យព្រោះជាអំពើខុសច្បាប់ហើយករណីនេះគួរ ត្រូវ រាយការណ៍ទៅសមត្ថកិច្ចអន្តរាគមន៍ករណីបទល្មើសខុសច្បាប់កើតឡើង។
ក្រោយកើតហេតុមួយថ្ងៃ លោក គង់ រតនៈ អនុប្រធានកម្មវិធីសុវត្តិភាពចរាចរណ៍ផ្លូវគោកនៃអង្គការ Handicap International បានប្រាប់វិទ្យុស្ត្រីថាទង្វើអ្នកវាយដំលើជនបង្កហេតុបើកឡានរត់គេចជាអំពើខុសច្បាប់គឺជាការប្រមាថលើក្រមសីលធម៌សង្គម។លោកបន្ថែមថាអ្នកបើកបរបង្កគ្រោះថា្នក់ត្រូវទទួលខុសត្រូវចំពោះមុខច្បាប់ហើយអ្នកវាយអ្នកបើកឡានក៏ត្រូវទទួលខុសត្រូវចំពោះមុខច្បាប់ដែរ។
ដូចគ្នានេះដែរ លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជាយល់ថាប្រជាពលរដ្ឋគួររាយការណ៍ទៅប៉ូលិសចរចារណ៍ជាជាងប្រើអំពើហិង្សាលើជនល្មើស។
លោក សន ជ័យ បង្ហាញទស្សនៈថាការវាយតំលើជនល្មើសប្រហែលជាការខ្វះជំនឿជាក់លើប្រព័ន្ធយុត្តិធម៌និងអាជ្ញាធរមានសមត្ថកិច្ចទើបប្រជាពលរដ្ឋសម្រេចអន្តរាគមន៍ក្រៅប្រព័ន្ធតុលាការ។ករណីវាយតំទៅលើលោកសាស្ត្រាចារ្យ ស៊ុយ សារ៉េត ត្រូវបានតុលាការសម្រេចឃុំខ្លួនជនសង្ស័យបីនាក់បណ្តោះអាសន្នដោយរង់ចាំជំនុំជម្រះក្ដី។
ជនសង្ស័យទាំងនោះឈ្មោះ យ៉ាត ទិត្យា លោក អាន វិនទី និងលោក អាន ផល្លី។នេះបើតាមអ្នកនាំពាក្យសាលាដំបូងរាជធានីភ្នំពេញ។អ្នកទាំងបីរូបត្រូវគេ នាំមកបង្ហាញមុខជាសាធារណដោយដៃជាប់ខ្នោះ ។ពួកគេ បានសារភាពពីការប្រើហិង្សាជ្រុលហួសហេតុ ។តែពួកគេ ថា ការវាយប្រហារលើ លោក ស៊ុយសារ៉េត មានអ្នកបង្អើល ថាគាត់បានបើកឡានមនុស្សស្លាប់ទើបធ្វើអោយពួកគាត់មានកំហឹងដូចនេះ។ពួកគាត់បាន សារភាពដូចនេះតាមការចោទសួររបស់អ្នកសារព័ត៌មានហើយត្រូវគេបង្ហោះវិដេអូឃ្លីបជាសាធារណ ។
ជនល្មើសម្នាក់៖«ពេលនោះខ្ញុំបានយកដំថ្មគាប់គាតមែនប៉ុន្តែខ្ញុំគប់បានម្តង់ហើយបានទាត់ឡាន។ខ្ញុំអត់បានត្រូវឬមិនត្រូវព្រោះខ្ញុំចោលទៅក្នុងឡាន។»
កាលពីថ្ងៃទី១៣ ខែមីនា កូនស្រី លោកបណ្ឌិត ស៊ុយ សារ៉េត បានប្តឹងទាសំណងជំងឺចិត្តប្រមាណ១ពាន់២រយលានរៀលស្មើប្រហែល៣០ម៉ឺនដុល្លារអាមេរិក។
យោងតាមក្រមព្រហ្មទណ្ឌត្រង់មាត្រា២១៧បានចែងថាអំពើហិង្សាដោយចេតនាលើអ្នកដទៃត្រូវផ្តន្ទាទោសដាក់ពន្ធនាគារពី១ឆ្នាំទៅ៣ឆ្នាំនិងពិន័យជាប្រាក់២លានរៀលទៅ៦លានរៀល។មាត្រា២១៨ បានចែងថាអំពើហិង្សាដោយចេតនា ដោយមានការគិតទុកជាមុន ដោយប្រើអាវុធឬគំរាមកំហែងនឹងអាវុធនិងអំពើហិង្សាដោយមនុស្សច្រើនក្នុងឋានៈជាចារី សហចារី អ្នកផ្តើមគំនិតនិងអ្នកសមគំនិតត្រូវផ្តន្ទាទោសដាក់ពន្ធនាគារពី២ឆ្នាំទៅ៥ឆ្នាំនិងពិន័យជាប្រាក់ពី៤លានរៀលទៅ១០លានរៀល៕
