ភ្នំពេញ ៖ សម្ដេច ស ខេង ឧបនាយករដ្ឋមន្ដ្រី និងជារដ្ឋមន្ដ្រីក្រសួងមហាផ្ទៃ មានប្រសាសន៍ក្នុងពិធីបញ្ចុះបឋមសិលា បើកការដ្ឋានសាងសង់អគារមន្ទីរពេទ្យបង្អែកខេត្ដបាត់ដំបង ដោយស្នើដល់មន្ទីរពេទ្យ និងមន្ដ្រីអាជ្ញាធរខេត្ដទាំងអស់ ពង្រឹងការគ្រប់គ្រងវិស័យសុខាភិបាលឯកជន និងធ្វើយ៉ាងណាលុបបំបាត់ឲ្យបាន នូវសេវាសុខាភិបាលខុសច្បាប់ និងឱសថក្លែងក្លាយ ដែលនាំគ្រោះថ្នាក់ដល់សុខភាពពលរដ្ឋ។
លោក លៀ ស៊ីណា រាយការណ៍ ៖
ការបើកការដ្ឋានសាងសង់អគារមន្ទីរពេទ្យបង្អែកខេត្ដបាត់ដំបង ធ្វើឡើងកាលពីថ្ងៃទី១៤ ខែមីនា ឆ្នាំ២០១៨ ដែលជំនួយ នៃការសាងសង់នេះ ទទួលបានពីប្រទេសជប៉ុន តាមរយៈអង្គការ JICA។ សម្ដេច ស ខេង ឧបនាយករដ្ឋមន្ដ្រី និងជារដ្ឋមន្ដ្រីក្រសួងមហាផ្ទៃ ថ្លែងនៅក្នុងពិធីនេះថា បញ្ហានៃការហូរចូលឱសថក្លែងក្លាយគឺជាក្ដីបារម្ភដ៏ធំបំផុត របស់រាជរដ្ឋាភិបាលកម្ពុជា ព្រោះតែវាមានគ្រោះថ្នាក់បំផុតដល់សុខភាពប្រជាពលរដ្ឋ។ បន្ថែមលើនេះសម្ដេចថា វិស័យសុខាភិបាលឯកជន ដែលខុសច្បាប់ក៏ជាក្ដីកង្វល់ មួយផងដែរ ដែលករណីនេះ ទាំងមន្ទីរសុខាភិបាលខេត្ដ អាជ្ញាធរគ្រប់លំដាប់ថ្នាក់ ត្រូវធ្វើយ៉ាងណាទប់ស្កាត់ និងលុបបំបាត់ឲ្យបាន។
សម្ដេច ស ខេង បន្ថែមទៀតថា ថ្នាំពេទ្យមានគ្រោះថ្នាក់ខ្លាំងបំផុតដល់អាយុជីវិតមនុស្ស ប្រសិនបើថ្នាំពេទ្យនោះជាផលិតផលក្លែងក្លាយ ហើយប្រជាពលរដ្ឋមិនបានដឹង បានយកឱសថនោះទៅប្រើប្រាស់។
សម្ដេច ស ខេង ៖«ចំពោះថ្នាំពេទ្យវាចូលទៅក្នុងសសៃឈាមចូលទៅក្នុងខ្លួនមនុស្ស ពេលដែលយើងចាក់ ពេលដែលយើងលេប អញ្ចឹងហើយវាមានឥទ្ធិពលគ្រោះថ្នាក់ណាស់ បើកាលណាថ្នាំពេទ្យនោះវាមិនមែនជាថ្នាំពេទ្យពិតប្រាកដ វាក្លែងក្លាយ អញ្ចឹងវាមិនទៅជាព្យាបាល វាទៅជាបន្ថែមជំងឺឲ្យកាន់តែធ្ងន់ធ្ងរថែមទៀត»។
តែយ៉ាងណារដ្ឋមន្ដ្រីក្រសួងមហាផ្ទៃ ទទួលស្គាល់ថា ក្នុងរយៈពេលកន្លងមកអាជ្ញាធរពិតបានខិតខំប្រឹងប្រែង ក្នុងការទប់ស្កាត់ផលិតផលក្លែងក្លាយ ពិសេសគឺថ្នាំពេទ្យនេះតែម្ដង។ ក៏ប៉ុន្ដែសម្ដេច បន្ដថា ដើម្បីលុបបំបាត់ឲ្យបានទាំងស្រុង ក៏ត្រូវមានការចូលរួម ពីប្រជាពលរដ្ឋផងដែរ ដោយមិនត្រូវ ចេះតែទៅទិញថ្នាំ ទាំងដែលមិនដឹងថា ខ្លួនកំពុងឈឺអ្វីនោះទេ។ លើសពីនេះ សម្ដេច ស ខេង ក៏ស្នើឲ្យគ្រប់បណ្ដាក្លីនិច និងឱសថស្ថានឯកទាំងអស់ មិនត្រូវលក់ថ្នាំឲ្យពលរដ្ឋឡើយ ប្រសិនបើគាត់គ្មានវិជ្ជបញ្ជាពីគ្រូពេទ្យ។
សម្ដេច ស ខេង៖«គ្លីនិចទាំងឡាយ អ្នកល់កថ្នាំទាំងឡាយ គឺមិនលក់ដាច់ខាត នៅពេលដែលអ្នកទៅគ្មានវិជ្ជបញ្ជា គ្មានសំបុត្រពេទ្យ មានសំបុត្រពេទ្យទើបអាចទិញបាន»។
ទន្ទឹមការអំពាវនាវនេះ សម្ដេច ស ខេង បានសង្កត់ធ្ងន់ថា រាជរដ្ឋាភិបាលនឹងបន្ដរឹតបន្ដឹងការត្រួតពិនិត្យផលិតផលក្លែងក្លាយឲ្យបានកាន់តែខ្លាំងថែមទៀតនៅក្នុងឆ្នាំនេះ។ ប្រសិនបើរកឃើញថា មានអ្នកលក់ថ្នាំក្លែងក្លាយ រាជរដ្ឋាភិបាលក្រៅតែពីរឹបអូសយកឱសថទាំងនោះមកកម្ទេចចោលហើយ អ្នកលក់ក៏នឹងត្រូវផ្ដន្ទាទោសធ្ងន់ធ្ងរផងដែរ។
សូមជម្រាបថា ក្នុងអំឡុងខែតុលា ឆ្នាំ២០១៧ កងកម្លាំងសមត្ថកិច្ចចម្រុះ នៃគណៈកម្មាធិការប្រយុទ្ធប្រឆាំងផលិតផលក្លែងក្លាយ បានដុតកម្ទេចចោលនូវ ថ្នាំពេទ្យ និងគ្រឿងសម្អាងក្លែងក្លាយ ប្រមាណ ៨០តោន ដែលគិតជាទឹកប្រាក់ប្រមាណជិត ៦លានដុល្លារ។ យ៉ាងណាសម្ដេច ស ខេង បានបញ្ជាក់ថា នៅពេលខាងមុខនេះ អាជ្ញាធរនឹងដុតកម្ទេចចោលនៅពពួកផលិតផលក្លែងក្លាយនេះ ប្រមាណជា ៦០តោនទៀត៕
