ភ្នំពេញ ៖ មន្ដ្រីជាន់ខ្ពស់ក្រសួងការងារ ដែលថ្លែងក្នុងពិធីវគ្គបណ្ដុះបណ្ដាលពង្រឹងសមត្ថភាពជនបង្គោលយេនឌ័រតាមអង្គភាពក្រោមឱវាទក្រសួងការងារ នៅថ្ងៃទី១៤ ខែមីនា នេះ បានស្នើដល់ក្រសួងស្ថាប័នពាក់ព័ន្ធទាំងអស់ បង្កើន និងដាក់បញ្ចូលបេក្ខភាពជាស្ដ្រី ឲ្យបានសមាមាត្រជាមួយបុរស ខណៈបច្ចុប្បន្នស្ដ្រី មានសមត្ថភាពកាន់ខ្លាំង។
លោក លៀ ស៊ីណា រាយការណ៍ ៖
វគ្គបណ្ដុះបណ្ដាលនេះ មានរយៈពេល ៣ថ្ងៃ ដែលនឹងបញ្ចប់នៅថ្ងៃទី១៦ ខែមីនា។ លោកស្រី ស៊ើង សរសុចិត្ដា រដ្ឋលេខាធិការ និងជាប្រធានគណៈកម្មការ ទទួលបន្ទុកការងារយេនឌ័រ នៃក្រសួងការងារ មានប្រសាសន៍ប្រាប់អ្នកសារព័ត៌មានថា បច្ចុប្បន្ននេះ តាមស្ថាប័នក្រសួងនានា បានអនុវត្ដគោលនយោបាយលើកកម្ពស់ស្ដ្រី ក៏ប៉ុន្ដែគឺបានតិចតូចនៅឡើយ។ លោកបន្ដថា ស្ដ្រីមានសមត្ថភាព ប៉ុន្ដែការការលើកកម្ពុស់ ការផ្ដល់ឱកាស ដើម្បីឲ្យសមាមាត្រគ្នា រវាងស្ដ្រី និងបុរស ក៏មិនទាន់បានល្អប្រសើនោះទេ។ តែយ៉ាងណា រដ្ឋលេខាធិការ ក្រសួងការងារ នៅតែទទូច សុំឲ្យគ្រប់ក្រសួងស្ថាប័ន បន្ដការខិតខំប្រឹងប្រែងបន្ថែមទៀត ដោយធ្វើយ៉ាងណាផ្ដល់ឱកាសឲ្យស្ដ្រីបានច្រើន។
លោកស្រី ស៊ើង សរសុចិត្ដា ៖«យើងឃើញថា សមត្ថភាពលោកមានគ្រប់គ្រាន់ហើយ ប៉ុន្ដែធម្មតាការលើកកម្ពស់ មានមកហើយ តែថា មានមកហើយប៉ុន្ដែមិនទាន់ហៅថា គ្រាប់គ្រាន់នៅឡើយទេ។ អញ្ចឹងយើងនៅតែសំណូមដល់គ្រប់អង្គភាព គ្រប់ក្រសួងកស្ថាប័ន ចូលរួមលើកកម្ពស់បន្ដទៀត»។
លោកស្រី ស៊ើង សរសុចិត្ដា ក៏សំណូមពរដល់ស្ដ្រី ឲ្យបន្ដចាប់យកឱកាស និងពង្រឹងសមត្ថភាពរបស់ខ្លួនបន្ដទៀត ដើម្បីឲ្យស្របទៅនឹងគោលនយោបាយ ក៏ដូចជាកិច្ចខិតខំប្រឹងប្រែងរបស់រាជរដ្ឋាភិបាល ក្នុងការលើកកម្ពស់ស្ដ្រី។
សម្ដេច ហ៊ុន សែន នាយករដ្ឋមន្ដ្រីកម្ពុជា កាលពីថ្ងៃទិវាសិទ្ធិនារីអន្ដរជាតិ ០៨ មីនា ខួបលើកទី១០៧ មានប្រសាសន៍ថា ការរីកម្រើននៃប្រទេសមួយ ដែលអាចប្រព្រឹត្ដទៅបាន លុះត្រាតែមានការចូលរួមពីស្ដ្រី។ កត្ដានេះនឹងអាចរួមចំណែកក្នុងការពន្លឿន ដំណើរការនៃកិច្ចអភិវឌ្ឍន៍ ប្រទេសនីមួយៗបានផងដែរ។
នាយករដ្ឋមន្ដ្រីបន្ថែមថា កាលពីឆ្នាំ២០០៧ ស្ដ្រីដែលបានកាន់តំណែងមុខងារសាធារណៈ មាន ចំនួនត្រឹមតែ ៣២ភាគរយប៉ុណ្ណោះ ក៏ប៉ុន្ដែចំនួននេះបានកើនឡើងជាលំដាប់ រហូតដល់ ៤១ភាករយ ក្នុងឆ្នាំ២០១៧។ សម្ដេច ហ៊ុន សែន បង្ហាញក្ដីរំពឹងថា គ្រប់ក្រសួងស្ថាប័នពាក់ព័ន្ធទាំងអស់ នឹងសម្លឹងមើលបេក្ខភាពជាស្ដ្រី បន្ថែមទៀត ដើម្បីដំឡើងតួនាទី។ លើសពីនេះសម្ដេច ក៏ស្នើឲ្យថ្នាក់ដឹកនាំស្ថាប័នរដ្ឋទាំងអស់ ប្រគល់តួនាទីដល់ស្ដ្រី ក្នុងការធ្វើសេចក្ដីសម្រេចចិត្ដ មុនពេលដែលនិយាយថា ស្ដ្រីម្នាក់នោះមិនហ៊ានធ្វើសេចក្ដីសម្រេចចិត្ដ ឬក៏គ្មានបទពិសោធន៍ការងារ។
សម្ដេច ហ៊ុន សែន ៖«បើមិនទាន់តែងតាំគាត់ នៅក្នុងការកាន់ប៉ុស្ដិ៍ដើម្បីធ្វើការសម្រេចចិត្ដទេ យើងមិនទាន់អាចនិយាយថា គាត់មិនហ៊ានធ្វើសេចក្ដីសម្រេច ដូច្នេសង្ឃឹមថា នៅតាមស្ថាប័ននានា ចេះតែរុញបណ្ដើៗឲ្យមកកៀកជាមួយនឹងក្របខ័ណ្ឌដែលត្រូវបានទទួល»។
សូមជម្រាបថា ប្រទេសកម្ពុជា ត្រូវបានវេទិកាសេដ្ឋកិច្ចពិភពលោកចាត់ចំណាត់ថ្នាក់លេខ ៩៩ ក្នុងចំណោមប្រទេស ១៤៤ នៅឆ្នាំ២០១៧ ជាប្រទេសដែលបានចូលរួមយ៉ាងសកម្មក្នុងការកាត់បន្ថយគម្លាតយេនឌ័រ ខណៈកាលពីឆ្នាំ២០១៦ ប្រទេសកម្ពុជា ត្រូវបានវេទិការសេដ្ឋកិច្ចពិភពលោកផ្ដល់ចំណាត់ថ្នាក់លេខ ១១២។ តែយ៉ាងណា សម្ដេច ហ៊ុន សែន បានប្ដេជ្ញាថា កម្ពុជា នឹងនៅតែបន្ដលើកកម្ពស់ស្ដ្រី ដោយធ្វើយ៉ាងណាកាត់បន្ថយឲ្យបាន គម្លាតរវាងស្ដ្រី និងបុរសក្នុងសង្គមកម្ពុជា៕
