តុលាការកំពូលបានសម្រេចបើកសវនាការរឿងក្តីលោកស្រី ថាក់ ឡានី អតីតសមាជិកព្រឹទ្ធសភាគណបក្ស សម រង្ស៊ី ករណីចោទប្រកាន់ថា សម្តេនាយករដ្ឋមន្ត្រី ហ៊ុន សែន នៅពីក្រោយនៃការសម្លាប់លោក បណ្ឌិត កែម ឡី ។
អគ្គព្រះរាជអាជ្ញានៃមហាអយ្យកាអមតុលាការកំពូលបញ្ជាក់ថា សវនាការលោកស្រី ថាក់ ឡានី ចាប់ផ្ដើម នៅសាលសវនាការទី១ វេលាម៉ោង ៨ ព្រឹក ថ្ងៃទី២៦ ខែកុម្ភៈ ឆ្នាំ២០១៨ នេះ ខណៈដែលលោកស្រី ថាក់ ឡានី កំពុងរស់នៅក្រៅប្រទេស ។
នៅក្នុងខ្លឹមសារនៃដីការកោះហៅរបស់តុលាការកំពូលដដែលនេះ លោកស្រី ថាក់ ឡានី ត្រូវបានជាប់ចោទពីបទ«បរិហារកេរ្តិ៍ជាសាធារណៈ និងញុះញង់ឱ្យប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» ដែលប្រព្រឹត្តនៅភូមិតាប៉ាង ឃុំប៉ាតាង ស្រុកលំផាត់ ខេត្តរតនគិរី កាលពីថ្ងៃទី ២៩ ខែកក្កដា ឆ្នាំ២០១៦ វេលាម៉ោង៨ :៣០នាទី តាមមាត្រា ៣០៥ មាត្រា៤៩៤ និង មាត្រា ៤៩៥ នៃក្រមព្រហ្មទណ្ឌ ។
ការសម្រេចបញ្ជូនសំណុំរឿងរបស់សមាជិកព្រឹទ្ធសភាគណបក្សប្រឆាំងនេះដែរ ធ្វើឡើងបន្ទាប់ពីព្រឹទ្ធសភាចំនួន ៤៦ មកពីគណបក្សប្រជាជនកម្ពុជា កាលពីថ្ងៃទី ០១ ខែ កញ្ញា ឆ្នាំ ២០១៦កន្លងមក បានបោះឆ្នោតលើកអភ័យឯកសិទ្ធិសភា របស់ លោកស្រី ថាក់ ឡានី ដើម្បីបើកផ្លូវឱ្យតុលាការបន្តនីតិវិធី។
កាលពីដើមខែសីហា ឆ្នាំ២០១៦ សម្តេចនាយករដ្ឋមន្ត្រី ហ៊ុន សែន បានប្តឹងសមាជិកព្រឹទ្ធសភាមកពីគណបក្សប្រឆាំង លោកស្រី ថាក់ ឡានី និងលោក សម រង្ស៊ី ដោយទាមទារសំណងចំនួន ១០០រៀល ករណីលោកស្រី និងប្រធានគណបក្សសង្គ្រោះជាតិបានចោទសម្តេច ហ៊ុន សែន ថា ជាអ្នករៀបចំការបាញ់សម្លាប់លើលោកបណ្ឌិត កែម ឡី៕
