ភ្នំពេញ ៖ ធនាគារ អេស៊ីលីដា ភីអិលស៊ី ដែលជាធនាគារដ៏ធំ និងឈានមុខគេមួយនៅប្រទេសកម្ពុជា នៅថ្ងៃទី២៣ ខែកុម្ភៈនេះ បានចេញសេចក្ដីប្រកាសព័ត៌មានមួយ ដោយបញ្ជាក់ ថា ធនាគារ អេស៊ីលីដា ពុំមានកម្មវិធីចាប់ឆ្នោតផ្សងសំណាង ឬក៏ផ្ដល់រង្វាន់ជាទឹកប្រាក់ណាមួយជួនដល់អតិថិ និងសាធារណជនឡើយ។
សេចក្ដីប្រាកស់ព័ត៌មានរបស់ធនាគារ អេស៊ីលីដា ភីអិលស៊ី ដូចនេះ ពីព្រោះតែក្នុងរយៈពេលថ្មីៗកន្លងទៅនេះ មានជនខិលខូចមួយចំនួន បានអះអាងថា ខ្លួនជាបុគ្គលិករបស់ធនាគារ អេស៊ីលីដា ភីអិលស៊ី ឬយកឈ្មោះ ធនាគារ អេស៊ីលីដា ទៅប្រើប្រាស់ ដើម្បីឆបោកប្រាក់ ពីអតិថិជន និងសាធារណជន មួយចំនួនតាមរយៈទូរស័ព្ទ ឬតាមរយៈមធ្យោបាយផ្សេងៗទៀត។ ជនខិលខូចទាំងនោះបានតម្រូវឲ្យអតិថិជន ឬសាធារណជន ផ្ទេរប្រាក់មួយចំនួនជាមុនសិន ដើម្បីចំណាយរត់ការជាថ្នូរ នឹងការទទួលបានរង្វាន់ ជាទឹកប្រាក់ពីធនាគារ អេស៊ីលីដា ភីអិលស៊ី។
ត្រង់ចំណុចនេះ ធនាគារ អេស៊ីលីដា បានបញ្ជាក់ច្បាស់ថា ធនាគារ គ្មានកម្មវិធីបែបនេះឡើយ។ ក្នុងករណីដែលអតិថិជន និងសាធារណជនទាំងអស់បានជួបករណីដូចបានជម្រាប់ខាងលើ សូមទាក់ទងទៅកាន់ការិយាល័យទំនាក់ទំនងអតិថិជន បម្រើសេវា ២៤ម៉ោង របស់ធនាគារ អេស៊ីលីដា ភីអិលស៊ី ០២៣៩៩៤ ៤៤៤ ឬ០១៥ ៩៩៩ ២៣៣៕
