ភ្នំពេញ ៖ ក្រសួងការបរទេស និងសហប្រតិបត្ដិការអន្ដរជាតិ បានចេញសេចក្ដីថ្លែងការណ៍ប្រតិកម្មទៅនឹងសេចក្ដីសម្រេចរបស់រដ្ឋាភិបាលអាល្លឺម៉ង់ ករណីផ្អាក ការផ្ដល់ទិដ្ឋាការអាទិភាពចំពោះមន្ដ្រីជាន់ខ្ពស់កម្ពុជា រួមទាំងសម្ដេចនាយករដ្ឋមន្ដ្រី ហ៊ុន សែន ដោយចាត់ទុកថា នេះគឺជាការមើលស្រាលឯករាជ្យភាព នៃប្រព័ន្ធច្បាប់ និងតុលាការរបស់កម្ពុជា។
កាលពីថ្ងៃទី២១ ខែកុម្ភៈ ឆ្នាំ២០១៨ ស្ថានទូតសាធារណរដ្ឋសហព័ន្ធអាល្លឺម៉ង់ ប្រចាំប្រទេសកម្ពុជា បានជូនព័ត៌មានដល់ក្រសួងការបរទេសកម្ពុជា ស្ដីពីការផ្អាកផ្ដល់ទិដ្ឋាការតាម លក្ខខណ្ឌពិសេសចំពោះមន្ដ្រីជាន់ខ្ពស់កម្ពុជា។ ការសម្រេចរបស់អាល្លឺម៉ង់នេះ ត្រូវបានក្រសួងការបរទេសកម្ពុជា ចាត់ទុកថា គឺជាការប្រកាន់យកវិធានការ ដោយមិនបានពិចារណា ពីតថភាពនយោបាយកម្ពុជា។
លើសពីនេះ ក្រសួងការបរទេស និងសហប្រតិបត្ដិការអន្ដរជាតិ បន្ថែមទៀតថា អ្វីដែលអាល្លឺម៉ង់ បានធ្វើនេះ គឺមានមូលហេតុនយោបាយ និងមានភាពលម្អៀង មិនប្រកបដោយគតិច្បាប់ ហើយមិនតែប៉ុណ្ណោះវាបានផ្ទុយ នឹងការខិតខំប្រឹងប្រែងនាពេលបច្ចុប្បន្នរបស់ប្រទេសទាំងពីរ នៅក្នុងការអភិវឌ្ឍទំនាក់ទំនងយូរអង្វែង និងកិច្ចសហប្រតិបត្ដិការទ្វេភាគីទៀតផង។ ក្រសួងការបរទេសកម្ពុជា បានវាយតម្លៃថា ប្រតិកម្មរបស់អាល្លឺម៉ង់ ចំពោះការវិវត្ដស្ថានការនយោបាយនៅកម្ពុជា ថា គ្មានភាពស្មោះត្រង់ និងមានស្ដង់ដារពីរ បើពិនិត្យទៅលើ ប្រព្រឹត្ដិកម្មខុសគ្នា របស់អាល្លឺម៉ង់ ចំពោះប្រទេសផ្សេងៗ ពាក់ព័ន្ធនឹងបញ្ហាលទ្ធិប្រជាធិបតេយ្យ និងសិទ្ធិមនុស្ស។
បើទោះជាក្រសួងការបរទេសកម្ពុជា បង្ហាញការមិនពេញចិត្ដចំពោះការសម្រេចរបស់អាល្លឺម៉ង់យ៉ាងនេះក្ដី ប៉ុន្ដែក្រសួងការបរទេស បានអះអាងថា កម្ពុជានៅតែតាំងចិត្ដ ក្នុងអនុវត្ដលទ្ធិប្រជាធិបតេយ្យ សេរីពហុបក្ស ដោយអនុលោមទៅតាមរដ្ឋធម្មនុញ្ញរបស់ប្រទេសកម្ពុជា ក្នុងការពង្រឹងនីតិរដ្ឋ និងរៀបចំការបោះឆ្នោតសភាពនីតិកាលទី ០៦ នៅថ្ងៃទី២៩ ខែកក្កដា ឆ្នាំ២០១៨ខាងមុខ ដោយសេរី យុត្ដិធម៌ និងមានរបៀបរៀបរយ។
យោងតាមការចុះផ្សាយដោយគេហទំព័រវិទ្យុសំឡេងសហរដ្ឋអាមេរិក VOA បានស្រង់សម្ដី អ្នកនាំពាក្យការិយាល័យកិច្ចការបរទេសរបស់អាល្លឺម៉ង់ ដោយបញ្ជាក់ថា អាល្លឺម៉ង់ ពិតជាបានសម្រេចព្យួរទិដ្ឋាការ ពិសេសសម្រាប់ការធ្វើដំណើរឯកជនរបស់សមាជិករាជរដ្ឋាភិបាលកម្ពុជាទាំងអស់ពិតមែន ហើយនៅក្នុងនោះក៏មានឈ្មោះសម្ដេច ហ៊ុន សែន នាយករដ្ឋមន្ដ្រី នឹងក្រុមគ្រួសារ ក្រុមមន្ដ្រីយោធាជាន់ខ្ពស់ និងប្រធានតុលាការកំពូលរបស់កម្ពុជាផងដែរ។
គេហទំព័រដដែល បានបញ្ជាក់ទៀតថា អាល្លឺម៉ង ក្រៅតែពីចេញវិធានការនេះដោយខ្លួនឯងហើយ អាល្លឺម៉ង់ ក៏បានលើកទឹកចិត្ដសមាជិក សហភាពអឺរ៉ុបផ្សេងៗទៀត ឲ្យដាក់វិធានការស្រដៀងគ្នានេះមកកម្ពុជា បន្ទប់ពីមានសកម្មភាពបង្ក្រាប របស់រាជរដ្ឋាភិបាលកម្ពុជា លើប្រព័ន្ធផ្សព្វផ្សាយ អង្គការមិនមែនរដ្ឋាភិបាល និងគណបក្សប្រឆាំង៕
